1 Tekꞌuchiriꞌ, xinwil ri Qꞌapoj Bꞌexex takꞌal chwi ri juyubꞌ Sion y rukꞌ Rire e kꞌo ciento cuarenta y cuatro mil tikawex, yey che rukurusil ri kipalaj tzꞌibꞌital rubꞌiꞌ Rire y rubꞌiꞌ Ruqaw. 2 Y xinta jun chꞌawibꞌal re chilaꞌ chikaj katatajik pachaꞌ utzaꞌm yaꞌ echiriꞌ kakꞌunik y uchꞌawibꞌal unimal jabꞌ; y ri chꞌawibꞌal xinto e pachaꞌ ukꞌiyal tikawex e riꞌ kakichꞌawisaj ri ki arpas. 3 Y kakibꞌixoj jun kꞌakꞌ bꞌix chwach ri Jun tzꞌul chupa ri tzꞌulibꞌal re taqanik, chikiwach ri kajibꞌ kꞌo kikꞌaslemal pachaꞌ e ángeles*Ap. 4:6-8 y chikiwach ri nimaq winaq.*Ap. 4:4 Yey ri emajayom re wa bꞌix xew e ri ciento cuarenta y cuatro mil xekolobꞌetaj chikixoꞌl ri winaq che ruwachulew, ma xew chike rike yaꞌtal wi kakimaj wa jun bꞌix. 4 E taq achijabꞌ waꞌ na xkimin ta kibꞌ kukꞌ ixoqibꞌ. Rike e keterej chirij ri Qꞌapoj Bꞌexex tobꞌ pachawi keꞌek wi. Waꞌ e ri xekolobꞌetaj chikixoꞌl ri winaq che ruwachulew re kebꞌuꞌan pachaꞌ ri nabꞌe qasaꞌn chwach ri Dios y chwach ri Qꞌapoj Bꞌexex. 5 Yey na jinta kꞌana raqꞌubꞌal xtataj chikichiꞌ ma lik chom ri kibꞌinik kisilabꞌik chwach ri Dios.

6 Tekꞌuchiriꞌ, xinwil jun chik ángel kaxikꞌikꞌ chikaj. Rire ukꞌamom lo ri Utzilaj Tzij na jinta utaqexik chaꞌ kutzijoj waꞌ chike konoje ri winaq e kꞌo che ruwachulew, chike konoje taq ri tinamit y konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal. 7 Ri ángel jewaꞌ kasikꞌin che ubꞌiꞌxikil: «Chixiꞌij iwibꞌ chwach ri Dios y chiloqꞌnimaj uqꞌij ma xopon ru orayil ri qꞌatbꞌal tzij kuꞌano; chiyaka kꞌu uqꞌij ri xꞌanaw re ruwa kaj, ruwachulew, ri mar y taq rakꞌal pa kalax wi lo ri yaꞌ» kachaꞌ.

8 Tekꞌuchiriꞌ, xkꞌun rukaꞌm ángel jewaꞌ kubꞌiꞌij: «¡E laꞌ xtzaqik! E laꞌ xtzaq ri nimalaj tinamit Babilonia, ri xebꞌuqꞌabꞌarisaj konoje taq ri tinamit y xebꞌumin pa mak chaꞌ rukꞌ ri kirayibꞌal kaketzꞌabꞌej kiqꞌij kukꞌ jujun chik na kikꞌulel taj» kachaꞌ.

9 Tekꞌuchiriꞌ, xkꞌun rurox ángel y kasikꞌin che ubꞌiꞌxik: «We kꞌo junoq kuloqꞌnimaj uqꞌij ri nimalaj itzel chikop y ri jun ukꞌaxwach uꞌanom yey kukꞌul ri retalil che rukurusil rupalaj o che ruqꞌabꞌ, 10 riꞌ kutij na ri kꞌaxkꞌobꞌik kape ruma ri royowal ri Dios; y kakꞌaq kꞌu bꞌi pa ri aqꞌ kajinow rukꞌ azufre.*“Azufre”: Waꞌ echiriꞌ kaporoxik, lik chu ri ruxlabꞌ y kebꞌuya pa yabꞌil o pa kamik ri tikawex kesiqow re. Yey kaꞌan waꞌ che chikiwach taq ri santowilaj ángeles y chwach ri Qꞌapoj Bꞌexex. 11 Rusibꞌol wa kꞌaxkꞌobꞌik kabꞌuqlanik kel chikaj y na jinta chi kꞌisbꞌal re. Ekꞌu ri kakiloqꞌnimaj uqꞌij ri nimalaj itzel chikop rukꞌ ri jun ukꞌaxwach uꞌanom yey kakikꞌul ri retalil rubꞌiꞌ, chike kꞌu rike na jinta kꞌana uxlanem chipaqꞌij chichaqꞌabꞌ» kachaꞌ. 12 E uwariꞌche chirajawaxik che rutinamit ri Dios, waꞌ e ri kitaqem Rutzij Upixabꞌ ri Dios y lik kubꞌul kikꞌuꞌx rukꞌ ri Qanimajawal Jesucristo, kakichuqꞌubꞌej kibꞌ chwach taq ri kꞌaxkꞌobꞌik.

13 Ekꞌuchiriꞌ, xinta jun qulaj xchꞌaw lo chilaꞌ chikaj, jewaꞌ kubꞌiꞌij lo chwe: «Chatzꞌibꞌaj: Chwi kꞌu woꞌora, lik nim kiqꞌij kalaxik ri kekam chupa rubꞌiꞌ ri Qanimajawal Jesucristo» kachaꞌ.

«Qatzij,» kacha ri Ruxlabꞌixel ri Dios, «ma rike kebꞌuxlan che taq ri kichak, yey ronoje ri utzilaj chak kiꞌanom na kasach ta uwach ma kakikꞌul rajil ukꞌaxel chilaꞌ chikaj» kachaꞌ.

14 Tekꞌuchiriꞌ, xinwil jun sutzꞌ lik saq y chwi kꞌu riꞌ waꞌ kꞌo Jun tzꞌulik, kilitajik e Ralaxel Chikixoꞌl Tikawex.*Dn. 7:13 Che kꞌu rujolom kꞌo jun corona re oro y puqꞌabꞌ rukꞌaꞌam jun jos†“Jos”: Waꞌ keꞌeloq “hoz” pa kaxtila. lik kꞌo reꞌ. 15 Chupa kꞌu ri Rocho Dios xel lo jun chik ángel, jewaꞌ ri kasikꞌin pan che ubꞌiꞌxikil che ri Jun tzꞌul chwi ri sutzꞌ: «Kojo la ri jos che taq ri tikoꞌn kꞌo che ruwachulew ma ya xriꞌjobꞌ ruwach; ꞌana kꞌu la ri molonik ma ruqꞌijol waꞌ ya xoponik» kachaꞌ. 16 Ekꞌu ri Jun tzꞌul chwi ri sutzꞌ xukoj rujos che taq ri tikoꞌn kꞌo che ruwachulew y jelaꞌ xuꞌan ri molonik.

17 Chupa kꞌu ri Rocho Dios chilaꞌ chikaj xel lo jun chik ángel rukꞌaꞌam jun jos lik kꞌo reꞌ. 18 Xel kꞌu lo jun chik ángel chwa raltar; rire yaꞌtal puqꞌabꞌ kataqan puwi ri aqꞌ.‡Wa jun ángel laj e ri kuchajij ri aqꞌ chwi raltar o e ángel yaꞌtal puqꞌabꞌ kuya pa kꞌax ruwachulew rukꞌ aqꞌ. Ap. 16:8 Lik ko kꞌu xsikꞌin pan che ri jun kꞌo ri jos lik kꞌo reꞌ puqꞌabꞌ, jewaꞌ kubꞌiꞌij pan che: «Chachapa rajos lik kꞌo reꞌ y chaqꞌata ri jutaq chuyaꞌj uvas che taq ri tikoꞌn re uvas kꞌo che ruwachulew, ma lik qꞌan chik» kachaꞌ. 19 Ri ángel xuchap rujos y xuqꞌat ri jutaq chuyaꞌj uvas che taq ri raqan uvas kꞌo che ruwachulew yey xumol uchiꞌ pa kapuchꞌ wi; waꞌ keꞌeloq e pa kuqꞌat wi tzij ri Dios pakiwi ri tikawex. 20 Xpuchꞌiꞌ kꞌu ri uva chupa ri puchꞌubꞌal kꞌo lo naj che ri tinamit yey chupa waꞌ xel lo kikꞌ. Ri kikꞌ xel che, xuꞌan pachaꞌ yaꞌ kayenenik. Runajtijil raqan ri kikꞌ xumaj trescientos kilómetros yey ruchoyil upa e jun metro rukꞌ nikꞌaj.§“Jun metro rukꞌ nikꞌaj”: Pa ri chꞌaꞌtem griego kubꞌiꞌij: “Ri kikꞌ xopon ne kꞌa xeꞌ keꞌ taq ri kawayuꞌ, kꞌa pa kakꞌojiꞌ wi ri preno chike”.