17
Ri qꞌatbꞌal tzij puwi rixoq na chom ta ubꞌinik
1 Xkꞌun kꞌu jun chike taq ri wuqubꞌ ángeles, ri kꞌo ri wuqubꞌ copas re kꞌaxkꞌobꞌik pakiqꞌabꞌ. Xchꞌaꞌt kꞌu wukꞌ, jewaꞌ xubꞌiꞌij chwe: «Saꞌa wara y kankꞌut chawach ri qꞌatbꞌal tzij kaꞌan puwi ri jun ixoq na chom ta ubꞌinik, ri tzꞌul chwi taq ri yaꞌ. 2 Rukꞌ waꞌ wiꞌxoq emakuninaq taq wi ri taqanelabꞌ che ruwachulew y konoje ri winaq ejeqel che ruwachulew, ma eqꞌabꞌarinaq ruma ri vino xuya rixoq chike»*Jer. 51:7 xchaꞌ.
3 Tekꞌuchiriꞌ, chupa ri xkꞌut chinuwach ruma ri Ruxlabꞌixel ri Dios, ri ángel xinukꞌam bꞌi chupa jun luwar katzꞌintzꞌotik y chilaꞌ xinwil jun ixoq tzꞌul chwi jun nimalaj itzel chikop kaq rij, yey waꞌ tzꞌibꞌital ukꞌiyal bꞌiꞌaj chirij re kꞌaqibꞌal bꞌi uqꞌij ri Dios. Waꞌ kꞌo wuqubꞌ ujolom y lajuj rukꞌaꞌ. 4 Rixoq uwiqom ribꞌ rukꞌ kꞌul morato*“Morato”: Kil “púrpura” pa vocabulario. uwach y kaq uwach; yey wiqital rukꞌ oro, rukꞌ chomilaj taq abꞌaj y rukꞌ perlas. Rukꞌaꞌam jun copa re oro puqꞌabꞌ nojinaq che taq ri lik kꞌixbꞌal uwach y che ruchꞌulil ri mak kuꞌan kukꞌ taq rachijabꞌ. 5 Kꞌo kꞌu jun bꞌiꞌaj tzꞌibꞌital che rukurusil rupalaj yey lik kꞌayew umajik usukꞌ; e bꞌiꞌaj waꞌ:
Ri nimalaj tinamit Babilonia
e kichu rixoqibꞌ lik chꞌul kibꞌinik kisilabꞌik,
y rukꞌ rire petinaq wi ronoje ri lik kꞌixbꞌal uwach kaꞌan che ruwachulew.
6 Tekꞌuchiriꞌ xinwil rixoq lik kaqꞌabꞌar rukꞌ ri kikikꞌel rutinamit ri Dios y ri xekamisax ruma ri xkitzijoj ri Utzilaj Tzij re ri Jesús. Ekꞌu riꞌin lik xkam wanimaꞌ che ri xinwilo.
7 Xubꞌiꞌij kꞌu ri ángel chwe:
«¿Suꞌbꞌe lik kakam awanimaꞌ che? Riꞌin kanqꞌalajisaj chawe saꞌ keꞌelawi rixoq y ri nimalaj itzel chikop kꞌamayom lo re, ri kꞌo wuqubꞌ ujolom y lajuj rukꞌaꞌ. 8 Ritzel chikop xawilo e ri jun xkꞌojiꞌ lo ojertan yey ekꞌu woꞌora na jinta chik. Pero ya kopon ri qꞌij kel na lo chupa ri siwan na jinta utaqexik uchoyil upa, y kꞌisbꞌal kꞌu re, keꞌek chi tojbꞌal mak. Konoje kꞌu ri winaq ejeqel che ruwachulew, ri na tzꞌibꞌital ta ri kibꞌiꞌ chupa ri libro re kꞌaslemal chwi lo ri jeqebꞌal re ruwachulew, kakam kanimaꞌ che echiriꞌ kakil ri nimalaj itzel chikop re ojertan. Tobꞌ kꞌu riꞌ woꞌora na jinta chik, pero kawinaqir tanchi uloq.
9 »Kajawax naꞌoj chaꞌ jun kumaj usukꞌ waꞌ: Ri wuqubꞌ ujolom ri nimalaj itzel chikop e keꞌelawi wuqubꞌ chi juyubꞌ y puwi taq waꞌ tzꞌul wi rixoq; 10 yey e keꞌelawi wuqubꞌ chi taqanelabꞌ. Y woꞌobꞌ chike waꞌ ebꞌikꞌowinaq chik; jun kataqan woꞌora y ri jun chik kꞌamajaꞌ kujeq rutaqanik ma kꞌamajaꞌ kakꞌunik. Y we xkꞌunik, lik chirajawaxik wi na naj ta rutaqanik kuꞌano. 11 Jun chike ri wuqubꞌ taqanel e ri nimalaj itzel chikop, ri jun xkꞌojiꞌ ojertan y woꞌora na jinta chik, yey kataqan tanchik y kuꞌana ruwajxaq taqanel. Yey kꞌisbꞌal kꞌu re, keꞌek chi tojbꞌal mak.
12 »Ekꞌu ri lajuj rukꞌaꞌ xawilo, e keꞌelawi lajuj chi taqanelabꞌ kꞌamajaꞌ kakijeq ri kitaqanik; yey kayaꞌ na pakiqꞌabꞌ ketaqan junam rukꞌ ri nimalaj itzel chikop, pero xa jun ora uwach ri kitaqanik. 13 Wa lajuj taqanelabꞌ junam tzij kiꞌanom chikiwach puwi ri kitaqanik chaꞌ kakiya na kꞌu ri kichuqꞌabꞌ y ri kitaqanik puqꞌabꞌ ri nimalaj itzel chikop. 14 Rike kechꞌoꞌjin rukꞌ ri Qꞌapoj Bꞌexex, pero Rire kuchꞌij kichuqꞌabꞌ, ma e Kajawal konoje ri kꞌo kiwach y e Taqanel pakiwi konoje ri e taqanelabꞌ. Yey taq ri e kꞌo rukꞌ ri Qꞌapoj Bꞌexex, e ri esikꞌim y echaꞌom ruma ri Dios y na kesam ta kibꞌ puqꞌabꞌ Rire» xchaꞌ.
15 Je tanchi waꞌ xubꞌiꞌij chwe: «Ri yaꞌ xawilo pa tzꞌul wi rixoq na chom ta ubꞌinik,*Ap. 17:1 keꞌelawi e taq ri tikawex che taq ri tinamit, che rukꞌiyal kiwach taq ri tikawex che rukꞌiyal uwach chꞌaꞌtemal. 16 Ri lajuj rukꞌaꞌ ri nimalaj itzel chikop xawilo, waꞌ tzel kakil rixoq na chom ta rubꞌinik; kakoqꞌotaj kꞌu kan utukel y kakichꞌanabꞌaꞌ kanoq, kakitij rutiꞌjil y tekꞌuchiriꞌ kakiporoj pa aqꞌ. 17 Ma e ri Dios kakojow pa ri kanimaꞌ chaꞌ kakiꞌan ri karaj Rire, waꞌ e kakiꞌan tzij chikiwach chaꞌ chupa laꞌ la qꞌij ekꞌowi kakiya ri kitaqanik puqꞌabꞌ ri nimalaj itzel chikop kꞌa che ruqꞌijol echiriꞌ kuꞌana na ronoje ri ubꞌiꞌim kan ri Dios. 18 Rixoq xawilo e keꞌelawi ri nimalaj tinamit kataqan pakiwi konoje ri taqanelabꞌ che ruwachulew» xchaꞌ.