10
1 Kambꞌiꞌij che alaq hermanos, paqatzij wi ri lik kurayij nukꞌuꞌx y ri lik kantzꞌonoj che ri Dios pakiwi ri e aj Israel e chaꞌ rike kakiriq ri kolobꞌetajik. 2 Riꞌin kambꞌiꞌij ri wilom chike: Rike lik kakitij uqꞌij kekꞌojiꞌ chi utz chwach ri Dios, pero waꞌ na kakiꞌan ta rukꞌ saqil naꞌoj. 3 Ma na kakaj taj kakimaj usukꞌ suꞌanik ri Dios kuꞌan jusukꞌ chike ri tikawex; ri kakaj e kebꞌuꞌana jusukꞌ xa pa ke rike. Y na kiyaꞌom ta kꞌu kibꞌ kaꞌan jusukꞌ chike jelaꞌ pachaꞌ ri karaj ri Dios. 4 Yey ri Tzij Pixabꞌ katzꞌaqat uwach rukꞌ ri Cristo; jekꞌulaꞌ china ri kakubꞌiꞌ ukꞌuꞌx rukꞌ Rire, e kaꞌan jusukꞌ che chwach ri Dios.
5 E puwi ri kuꞌana jusukꞌ ri tikawex ruma kutaqej ri Tzij Pixabꞌ, jewaꞌ xutzꞌibꞌaj ri Moisés:
China ri kaꞌanaw re ronoje ri kubꞌiꞌij ri Tzij Pixabꞌ,
riꞌ kꞌo ukꞌaslemal chwach ri Dios ruma kuꞌan waꞌ. Lv. 18:5
6 Noꞌj puwi ri kuꞌana jusukꞌ ri tikawex ruma ri kubꞌulibꞌal kꞌuꞌxaj, jewaꞌ kubꞌiꞌij pa Ruchꞌaꞌtem ri Dios: «Mabꞌiꞌij pa awanimaꞌ: ¿China kꞌu ri keꞌek kꞌa chilaꞌ chikaj*Dt. 30:12 che ukꞌamik lo ri Cristo?» 7 O «¿China kꞌu ri kaqaj kꞌa chupa ri siwan katzꞌirir upa che ukꞌamik lo ri Cristo chikixoꞌl ri ekaminaq?» 8 Na kajawax taj keꞌek junoq, ma ¿saꞌ riꞌ ri kubꞌiꞌij pa Ruchꞌaꞌtem ri Dios? Jewaꞌ kubꞌiꞌij:
Rutzij ri Dios lik xa naqaj kꞌo wi chawe.
Kꞌo chupa rawanimaꞌ y kel lo pachiꞌ. Dt. 30:14
Ekꞌu chꞌaꞌtem waꞌ ri kaqatzijoj riꞌoj puwi ri kubꞌulibꞌal kꞌuꞌxaj: 9 We riꞌat kaqꞌalajisaj rukꞌ ruchiꞌ aqul: «Ri Jesús e Wajawal» y kakoj kꞌu chupa rawanimaꞌ Rire xkꞌastaj lo ruma ri Dios chikixoꞌl ri ekaminaq, riꞌ katkolobꞌetajik. 10 Ma pa ri qanimaꞌ kaqakoj wi waꞌ chaꞌ kojuꞌan jusukꞌ chwach ri Dios; yey rukꞌ kꞌu ruchiꞌ qaqul, kaqaqꞌalajisaj Rire e Qajawal chaꞌ jelaꞌ kojkolobꞌetajik. 11 Ma Ruchꞌaꞌtem ri Dios jewaꞌ kubꞌiꞌij puwi ri Cristo:
China ri kakubꞌiꞌ ukꞌuꞌx rukꞌ, na kakꞌixbꞌesax taj
ma kukꞌul na ri royeꞌem che Rire Is. 49:23
kachaꞌ. 12 Echiriꞌ kubꞌiꞌij «china», waꞌ keꞌelawi tobꞌ e aj judiꞌabꞌ o na e ta aj judiꞌabꞌ, ma xaqi junam kiwach. Ma ri Qanimajawal e Kajawal ke konoje, tobꞌ junwi taq ri kitinamit. Yey Rire kuya ri unimal rutzil ukꞌuꞌx chike konoje ri kakitzꞌonoj toꞌbꞌal ke che. 13 Ma Ruchꞌaꞌtem ri Dios jewaꞌ kubꞌiꞌij:
E janipa ri kakitzꞌonoj kolobꞌetajik
chupa rubꞌiꞌ ri Qanimajawal,
riꞌ kekolobꞌetaj na Jl. 2:32
kachaꞌ.
14 ¿Suꞌanik kꞌu riꞌ kakitzꞌonoj kolobꞌetajik chupa rubꞌiꞌ ri Qanimajawal we na kikojom ta rubꞌiꞌ nabꞌe? ¿Yey suꞌanik kakikoj rubꞌiꞌ we na kitom ta puwi Rire? ¿Yey suꞌanik kakita ri tzijonik puwi Rire we na jinta junoq katzijow re chike? 15 ¿Yey suꞌanik e kꞌo ri ketzijon puwi ri Qanimajawal we na jinta junoq kataqaw bꞌi ke chaꞌ kakiꞌan wa tzijonik? E pachaꞌ ri tzꞌibꞌital kan chupa Ruchꞌaꞌtem ri Dios:
¡Lik chom ri kikꞌunik ri kakikꞌam lo ri tzijonik
re ri utzil chomal,
ri kekꞌun che utzijoxik ri Utzilaj Tzij! Is. 52:7
kachaꞌ. 16 Noꞌj na konoje ta kꞌut xekojow re ri Utzilaj Tzij xtzijox chike. E pachaꞌ ri xubꞌiꞌij kan ri Isaías:
Qajawal, ¿kꞌo nawi junoq kojoyom re ri qatzijom chik? Is. 53:1
xchaꞌ. 17 Ri kubꞌulibꞌal kikꞌuꞌx ri tikawex kujeqo echiriꞌ kakita ri katzijox chike; yey waꞌ wa kakito, e Ruchꞌaꞌtem ri Dios puwi ri Cristo. 18 Noꞌj kantzꞌonoj kꞌut: ¿Na xkita ta nawi ri Utzilaj Tzij? ¡Qatzij, xkito! Ma e pachaꞌ ri kubꞌiꞌij Ruchꞌaꞌtem ri Dios:
Che ronoje ruwachulew xtataj wi ri kiqul
ri xetzijon puwi ri Dios;
y ri kichꞌaꞌtem oponinaq pa ronoje luwar
kachaꞌ. 19 Kantzꞌonoj tanchi kꞌut: ¿Raj Israel na ketaꞌam ta nawi waꞌ? ¡Ketaꞌam! Nabꞌe na, e pachaꞌ ri xutzꞌibꞌaj kan ri Moisés puwi ri xubꞌiꞌij lo ri Dios chike raj Israel:
Riꞌin kanꞌan chiwe kuꞌan kꞌax ikꞌuꞌx
chirij jun “tinamit” na tinamit taj;
kampetisaj iwoyowal chirij jun tinamit
na jinta ketaꞌam puwi ri Qꞌijsaq†Chikiwach ri e aj Israel, xew taqal chike rike kakikꞌul ri rutzil ukꞌuꞌx ri Dios. Ruma waꞌ xpe koyowal echiriꞌ ri Dios xukꞌut ri rutzil ukꞌuꞌx chike taq ri tinamit che ruwachulew. Dt. 32:21
xchaꞌ. 20 Jekꞌulaꞌ, ri Isaías xuchꞌij ubꞌiꞌxikil ri ubꞌiꞌim lo ri Dios pakiwi ri na e ta aj Israel:
Xinriqitaj kꞌu kuma ri na kinkitzukuj taj,
yey xinqꞌalajisaj kꞌu wibꞌ chikiwach
ri na xinkitzꞌonobꞌej taj Is. 65:1
xchaꞌ.
21 Noꞌj pakiwi raj Israel, jewaꞌ xubꞌiꞌij lo ri Dios:
Lik xinelaj chike jun tinamit
e aj palajiy tzij y e titzꞌitaq
chaꞌ ketzelej tanchi lo wukꞌ Is. 65:2
xchaꞌ.
*10:6 Dt. 30:12
*10:18 Wa jun versículo re Salmos e kachꞌaꞌt chwi taq ri chꞌumil, ri kakiqꞌalajisaj ruchuqꞌabꞌ y ruchomalil ri Dios y kebꞌilitaj pa ronoje luwar che ruwachulew. Jekꞌulaꞌ ri Pablo xujunimaj waꞌ rukꞌ rutzijoxik ri Utzilaj Tzij re ri Dios che ronoje ruwachulew.
†10:19 Chikiwach ri e aj Israel, xew taqal chike rike kakikꞌul ri rutzil ukꞌuꞌx ri Dios. Ruma waꞌ xpe koyowal echiriꞌ ri Dios xukꞌut ri rutzil ukꞌuꞌx chike taq ri tinamit che ruwachulew.