1 Hermanos, ri Dios lik ukꞌutum ri unimal rutzil ukꞌuꞌx che alaq. Ruma kꞌu waꞌ, lik kantzꞌonoj che alaq yaꞌa ronoje ri cuerpo alaq puqꞌabꞌ ri Dios pachaꞌ juna qasaꞌn kꞌaslik,*Rojertan xyaꞌiꞌ chwach ri Dios qasaꞌn ke awaj, yey waꞌ kekamisaxik y keporoxik. Noꞌj woꞌora ri qasaꞌn kutzꞌonoj ri Dios e riꞌoj, yey Rire na karaj ta ri kamik qeꞌoj; ri karaj e kaqaya ronoje puqꞌabꞌ Rire: ri qacuerpo, ri qabꞌinik y ri qakꞌaslem. na jinta kꞌana chꞌul che y lik kukꞌul ukꞌuꞌx Rire; ma waꞌ e uloqꞌnimaxik taqalik kaꞌan ralaq che. 2 Maꞌan chi e alaq pachaꞌ ri kakiꞌan ri winaq re ruwachulew waqꞌij ora. E yaꞌa alaq luwar che ri Dios kujalkꞌatij ri naꞌoj alaq y kuꞌan kꞌakꞌ che ronoje ri bꞌinik silabꞌik alaq. Jelaꞌ kꞌu riꞌ ketaꞌmaj alaq y kaꞌan alaq janipa ri utz karaj ri Dios che alaq; waꞌ e ri lik kukꞌul ukꞌuꞌx Rire y e ri lik jusukꞌ chwach.

3 Ruma kꞌu ri unimal rutzil ukꞌuꞌx ri Dios, yaꞌtal lo chwe riꞌin kambꞌiꞌij che onoje alaq: Lik maꞌan nim che ibꞌ alaq rukꞌ ri uyaꞌom ri Dios paqꞌabꞌ alaq. Puwi ri yaꞌtal che alaq, mikꞌow uwiꞌ ri kachꞌobꞌ alaq chwa ri taqal che alaq; e chꞌobꞌo alaq rusukꞌ puwi taq ri uyaꞌom ri Dios chijujunal alaq ruma ri xkubꞌiꞌ kꞌuꞌx alaq rukꞌ. 4 Ma jelaꞌ pachaꞌ ri qacuerpo xa jun uꞌanom tobꞌ lik kꞌi uchapom wi ribꞌ, pero junwi taq ri kichak ronoje ri chapayom re; 5 jekꞌuriꞌlaꞌ, riꞌoj, tobꞌ lik oj kꞌi, xa jun qaꞌanom rukꞌ ri Cristo, y qonoje kꞌu riꞌ kojajawax taq chiqawach. 6 Ekꞌu ri Dios, jalajuj taq rusipanik uyaꞌom chiqe chiqajujunal chaꞌ kaqaꞌan ruchak; waꞌ e chirij taq ri karaj Rire chiqe ruma ri unimal rutzil ukꞌuꞌx. E uwariꞌche, ri yaꞌtal che kaqꞌalajisan puwi runaꞌoj ri Dios, chuꞌana xew e chirij ri bꞌiꞌtal che ruma ri Dios. 7 Ri yaꞌtal che lik kebꞌutoꞌ jujun chik, e chuꞌana riꞌ. Ri yaꞌtal che kakꞌutunik, e chuyaꞌa ribꞌ che ri kꞌutunik. 8 Ri yaꞌtal che kapixabꞌanik, e chuyaꞌa ribꞌ che ri pixabꞌanik. Ri yaꞌtal che kasipanik, e chuꞌana riꞌ ri kasipan rukꞌ ronoje ukꞌuꞌx. Ri yaꞌtal che kukꞌam kiwach jujun chik, e chuyaꞌa ribꞌ che uꞌanik waꞌ chi utz. Ri yaꞌtal che kukꞌut ri kꞌaxnaꞌbꞌal ukꞌuꞌx, e chuꞌana riꞌ rukꞌ kiꞌkotemal.

9 Kꞌax naꞌa ibꞌ alaq pa saqil wi, na xa ta rukꞌ kebꞌ palaj alaq. Makꞌul che ri bꞌinik silabꞌik alaq ri na utz taj; e taqej alaq uꞌanik ri utz. 10 Chijujunal alaq lik kꞌax naꞌa ibꞌ alaq pa saqil wi, ma chaqꞌ ibꞌ alaq chwach ri Qaqaw. Matzukuj ri yakbꞌal qꞌij ralaq; e yaka alaq kiqꞌij ri jujun chik. 11 ꞌAna alaq ri lik alaq sakꞌaj, maꞌan alaq lik alaq xepu; e loqꞌnimaj alaq ri Qanimajawal rukꞌ ronoje kꞌuꞌx alaq. 12 Rukꞌ kiꞌkotemal choyeꞌej alaq janipa ri ubꞌiꞌtisim ri Dios che alaq. Chꞌija alaq uchuqꞌabꞌ ri kꞌaxkꞌobꞌik kape pawiꞌ alaq y lik moqꞌotaj alaq uꞌanik orar. 13 Chetoꞌo alaq ri kikojom rubꞌiꞌ ri Cristo rukꞌ taq ri kajawax chike. Tijoj ibꞌ alaq che kikꞌulik chi utz janipa ri kebꞌopon chi ocho alaq. 14 Tzꞌonoj alaq ri rutzil ukꞌuꞌx ri Dios pakiwi ri kiternabꞌem alaq rukꞌ kꞌax; matzꞌonoj alaq ri na utz taj pakiwiꞌ, e tzꞌonoj alaq ri utz. 15 Kiꞌkota alaq kukꞌ ri e kꞌo pa kiꞌkotemal; choqꞌa alaq kukꞌ ri kebꞌoqꞌik. 16 Chuꞌana xa jun kꞌuꞌx alaq chiwach alaq. Maꞌan alaq nim che ibꞌ alaq; e ꞌana alaq xa jun kukꞌ ri na jinta kiwach. Machꞌobꞌ alaq lik kꞌo naꞌoj alaq chikiwa jujun chik.

17 Matzelej alaq uwach ri na utz taj kuꞌan junoq chiꞌij alaq. E choka alaq il che uꞌanik ri utz chikiwach konoje ri tikawex. 18 ꞌAna kꞌu alaq janipa ri kꞌo paqꞌabꞌ alaq chaꞌ kakꞌojiꞌ alaq chi utzil chomal kukꞌ konoje ri tikawex. 19 Ralaq nu hermanos ri kꞌax kannaꞌ alaq, we kꞌo kaꞌanaw ri na utz taj chiꞌij alaq, matzelej alaq ukꞌaxel che. E yaꞌa alaq puqꞌabꞌ ri Dios chaꞌ e Rire ri kayaꞌw ri tojbꞌal re, ma jewaꞌ tzꞌibꞌital chupa Ruchꞌaꞌtem: