1 Lik chirajawaxik chike konoje ri tikawex e kakiya kibꞌ ketaq kuma ri e aj wach re ri tinamit, ma na jinta wa taqanik pakiqꞌabꞌ rike we na e ta ri Dios yaꞌyom re chike. Janipa kꞌu ri taqanelabꞌ e kꞌolik, e ri Dios yaꞌyom ri taqanik pakiqꞌabꞌ. 2 E uwariꞌche china ri na kuya ta ribꞌ chuxeꞌ ri taqanik ke ri e aj wach re ri tinamit, riꞌ e kuyak ribꞌ chirij ri taqanik kojotal kan ruma ri Dios. Yey e janipa ri keꞌanaw re waꞌ, chikibꞌil kibꞌ kakitzukuj riꞌ ri qꞌatbꞌal tzij pakiwiꞌ. 3 Ma ri ketaqanik na e ta kojom re kakikoj xiꞌin ibꞌ che ri kuꞌan ri utz; ekojtalik re kakikoj xiꞌin ibꞌ che ri kuꞌan ri na utz taj. We kaꞌaj kꞌu la na kaxiꞌij ta ibꞌ la chikiwach ri ketaqanik, e ꞌana la ri utz y jelaꞌ kayak ne qꞌij la kuma ri ketaqanik. 4 Ma rike ekojotal paqawiꞌ ruma ri Dios chaꞌ kakiꞌan ri utz chiqe. Noꞌj we rilal kaꞌan la ri na utz taj, riꞌ xiꞌij ibꞌ la chikiwach, ma yaꞌtal pakiqꞌabꞌ rike kakiya pa kꞌax ri kuꞌan ri na utz taj.*“Ma yaꞌtal pakiqꞌabꞌ rike kakiya pa kꞌax ri kuꞌan ri na utz taj”: Pa ri chꞌaꞌtem griego kubꞌiꞌij “ruma waꞌ rike kukꞌaꞌam ri espada”. Yey e uchak ri Dios ri kakiꞌan rike echiriꞌ kakiya pa kꞌax ri kuꞌan ri na utz taj. 5 Ruma kꞌu laꞌ, lik chirajawaxik kaqaya qibꞌ kojtaq kuma ri e aj wach re ri tinamit. Kaqaꞌan waꞌ na xa ta ruma ri kꞌo pakiqꞌabꞌ rike kojkiya pa kꞌax, ma e ruma ri kaqanaꞌ chiqakꞌuꞌx lik chirajawaxik kaqaꞌan ri jusukꞌ. 6 Ruma ne riꞌ kaꞌan ralaq ri tojonik tzꞌonom che ri tinamit kuma ri e aj wach, chaꞌ rike utz kakiꞌan ri chak uyaꞌom ri Dios pakiqꞌabꞌ. 7 Yaꞌa kꞌu alaq chike chikijujunal janipa ri taqal chike kayaꞌik. Che ri taqal che kaꞌan tojonik,†“Tojonik”: Pa kaxtila waꞌ e “tributos e impuestos”. tojo alaq. Che ri taqal che kakoj utzij, kojo alaq utzij. Che ri taqal che kayak uqꞌij, yaka alaq uqꞌij.

8 We kꞌo kꞌas la rukꞌ junoq, manajtir la che utojik. Yey qonoje nenareꞌ kꞌo “qakꞌas” chiqawach, waꞌ e ri kꞌax kaqanaꞌ qibꞌ. Ekꞌu ri jun kꞌax kunaꞌ ri ratz-uchaqꞌ, riꞌ katajin che uꞌanik ri kataqan ri Tzij Pixabꞌ re ri Dios che. 9 Ma chupa ri Tzij Pixabꞌ re ri Dios kubꞌiꞌij waꞌ: «Matmakun chirij ri kꞌulanikil. Matkamisanik. Matelqꞌanik. Maꞌan raqꞌubꞌal chirij junoq. Marayij uwach ri na awe taj.»*Éx. 20:13-17 Waꞌ wa taqanik rukꞌ ronoje ri nikꞌaj chik taqanik re ri Dios, kuꞌana xa jun rukꞌ wa chꞌaꞌtem: «Kꞌax chanaꞌa rawatz-achaqꞌ jelaꞌ pachaꞌ ri kꞌax kanaꞌ awibꞌ riꞌat.»*Lv. 19:18; Mt. 22:39 10 Ma china ri kꞌo rutzil kꞌuꞌxaj rukꞌ, na kamakun ta chirij ri ratz-uchaqꞌ. E uwariꞌche echiriꞌ kaqakꞌut ri rutzil kꞌuꞌxaj kꞌo qukꞌ, e kojtajin che uꞌanik ri kataqan Rutzij Upixabꞌ ri Dios che.

11 ꞌAna kꞌu alaq ronoje waꞌ ma etaꞌam alaq ri qꞌij oj kꞌo wi. We kawar qawach, chirajawaxik chojkꞌastajoq,‡We riꞌoj pachaꞌ oj warinaq chwach ri Dios, chirajawaxik kakꞌun saq chiqawach chaꞌ jelaꞌ kaqetaꞌmaj y kaqaꞌan janipa ri karaj ri Dios chiqe. ma ruqꞌijol ri qakolobꞌetajik más xa naqaj chi kꞌo wi chwa echiriꞌ xqakoj rubꞌiꞌ ri Cristo. 12 E wa oj kꞌo wi e pachaꞌ xulan chi raqꞌabꞌ y xa naqaj chik kasaqir wi. Ruma kꞌu laꞌ maqaꞌan qeꞌoj janipa ri kaꞌan xa xeꞌlaqꞌay pa qꞌequꞌm; e qaꞌana janipa ri taqalik kaꞌan pa ri Qꞌijsaq. E lik qaꞌana qe che taq ri toꞌbꞌal uyaꞌom ri Dios chaꞌ kaqachꞌij uchuqꞌabꞌ taq ri na utz taj.*Ef. 6:11 13 Chojbꞌin kꞌu jusukꞌ jelaꞌ pachaꞌ ri taqal chike ri kebꞌin pa ri Qꞌijsaq. Maqaya qibꞌ che taq nimaqꞌij na utz ta uwach. Maqaya qibꞌ che qꞌabꞌarik. Maqachꞌulaj ri qacuerpo rukꞌ chꞌulilaj mak. Maqaya qibꞌ che chꞌaꞌoj chiqawach y muꞌan kꞌax qakꞌuꞌx chirij junoq. 14 Ri ꞌana alaq e wiqa ibꞌ alaq che ri Qanimajawal Jesucristo; waꞌ e keꞌelawi kuꞌan alaq xa jun rukꞌ Rire. Kꞌutu alaq waꞌ rukꞌ ri bꞌinik silabꞌik alaq y maya kꞌu alaq luwar kataqan pawiꞌ alaq ri rayibꞌal na utz ta uwach re ri tiꞌjil alaq.