1 Hermanos, e ucaꞌm carta waꞌ cantzꞌibaj pana che alak. Yey chupa ucabichal carta lic e cancꞌosoj uwach ri sakil naꞌoj alak rucꞌ pixabanic, chaꞌ ri naꞌoj alak cacꞌojiꞌ chi jusucꞌ. 2 Cꞌuna cꞌu chicꞌuꞌx alak ri xquibiꞌij lo rojertan ri kꞌalajisanelab re ri Dios, yey ri cubiꞌij ri takanic re ri Kanimajawal y Kacolobenel, ri xcꞌut che alak cuma tak rutakoꞌn ri Dios. 3 Lic chirajawaxic nabe na quetaꞌmaj alak waꞌ: Chupa tak ruqꞌuisbal kꞌij queyactaj lo winak e chꞌaminel, ri caquitakej ri quirayibal na chom ta uwach. 4 Caquibiꞌij cꞌu che alak: «¿Saꞌ xuꞌan riꞌ ri biꞌtisinic ꞌanom can puwi rutzelejic lo ri Cristo? Ma ya ne xecam ri kachu-kakaw, ri nabe xecojow rubiꞌ ri Cristo; y ronoje junam uꞌanom chwi lo rujekebal ruwachulew, na jinta cꞌo jalcꞌatajinak che» quechaꞌ. 5 Jecꞌuwaꞌ caquibiꞌij ma na cacaj taj caquimaj usucꞌ e rojertan e ri Dios rucꞌ Ruchꞌaꞌtem xuꞌan ruwa caj y xuꞌan ruwachulew, yey waꞌ xuwinakirisaj lo pa ri yaꞌ y xutiquibaꞌ chuxoꞌlibal waꞌ.✡Gn. 1:6-9 6 Yey ruma cꞌu ri yaꞌ re ri nimalaj jab xutak lo ri Dios, xsach quiwach tak ri winak re ojertan y xjalcꞌatix uwach ruwachulew. 7 Ecꞌu ruwa caj y ruwachulew e cꞌo woꞌora, e chajital chi ruma ri tzij ubiꞌim ri Dios cꞌa echiriꞌ queyaꞌ pa akꞌ chupa rukꞌijol ri kꞌatbal tzij, echiriꞌ casachisax quiwach ri ticawex lic e aj maquib.

8 Pero ralak hermanos, masach chicꞌuꞌx alak waꞌ: Chwach ri Kakaw e ri jun kꞌij e junam rucꞌ pachaꞌ chi juna mil junab; yey e ri jun mil junab e junam rucꞌ pachaꞌ chi juna kꞌij. 9 Ri Kanimajawal na camayin ta che uꞌanic janipa rubiꞌtisim lok, jelaꞌ pachaꞌ ri caquibiꞌij jujun. Ma Rire lic cꞌo unimal ucꞌuꞌx kucꞌ, y na caraj ta cꞌu casach uwach junok. Ri caraj Rire e conoje ri ticawex caquitzelej quitzij chwach.

10 Ecꞌu rukꞌijol rucꞌunibal ri Kanimajawal cacꞌun lok pachaꞌ ri oquibal re juna elekꞌom pa juna ja chakꞌab, ma ri elekꞌom na cubiꞌij ta apanok jampalaꞌ coponic. Chupa cꞌu waꞌ wa kꞌij casach uwach ruwa caj rucꞌ jun nimalaj chꞌawibal cajininic y ronoje tak ri cꞌo chwach casach quiwach ruma ri akꞌ. Yey ruwachulew y ronoje tak ri e cꞌo chwach queporotajic. 11 We ronoje cꞌu riꞌ waꞌ jelaꞌ rusachic uwach caꞌanic, ¿suꞌchac cꞌu riꞌ na cabin ta alak jusucꞌ rucꞌ jun sakil binic silabic chwach ri Dios? 12 Rucꞌ cꞌu ronoje cꞌuꞌx alak, lic choc alak il che royꞌexic rucꞌunibal rukꞌijol ri Dios. Ma chupa waꞌ wa kꞌij ruwa caj cumaj akꞌ y casach uwach, y ronoje tak cꞌu riꞌ ri cꞌo che ruwa caj cacꞌatic y cajakꞌur ruma rucꞌatibal ri akꞌ. 13 Noꞌj riꞌoj koyeꞌem jun cꞌacꞌ uwa caj y jun cꞌacꞌ uwachulew jelaꞌ pachaꞌ rubiꞌtisim ri Dios. Yey chiriꞌ, conoje xew e caquiꞌan ri lic jusucꞌ.

14 E uwariꞌche ralak hermanos, ruma oyeꞌem alak tak waꞌ, e chuꞌana ubis cꞌuꞌx alak ri carikitaj alak ruma ri Dios chi utzil chomal rucꞌ jun binic alak lic jusucꞌ, chaꞌ na jinta mac alak y na jinta junok catzꞌakaw mac chiꞌij alak. 15 Lic maja cꞌu alak usucꞌ waꞌ: Runimal ucꞌuꞌx ri Kanimajawal kucꞌ e re cojcolobetajic jelaꞌ pachaꞌ rutzꞌibam ri ka hermano Pablo che alak, yey ri xutzꞌibaj rire e chirij ri naꞌoj yaꞌtal che ruma ri Dios. 16 Ri Pablo lic xchꞌaꞌt chwi tak waꞌ. Chupa tak rucartas cꞌo ri lic cꞌayew umajic usucꞌ. Yey e tak cꞌu ri na jinta quimajom puwi waꞌ y na jinta ucowil ri cubulibal quicꞌuꞌx, na jusucꞌ ta chi ubiꞌxiquil caquiꞌan puwi tak rutzꞌibam ri Pablo yey jenelaꞌ caquiꞌan rucꞌ ri nicꞌaj chic Utzij Upixab ri Dios; y rucꞌ waꞌ e caquitzucuj ri kꞌatbal tzij re ri Dios paquiwiꞌ.

17 E uwariꞌche ralak hermanos, ruma etaꞌam chi alak chi utz saꞌ ri catajin lok, lic chajij cꞌu ib alak chaꞌ na cajeqꞌuetaj tubi alak ruma ri socosoꞌnic que ri lic na quebin ta jusucꞌ y chaꞌ na caya ta can alak ri Utzilaj Tzij cojom chi alak. 18 Ri ꞌana alak e qꞌuiya alak chupa ri unimal rutzil ucꞌuꞌx ri Dios y che ri retaꞌmaxic uwach chi utz ri Kanimajawal y Kacolobenel Jesucristo. Che cꞌu Rire takal wi ri yacbal kꞌij na jinta utakexic woꞌora y chikawach apanok. Amén.