1 Cakatzꞌibaj pan wa carta che alak chwi ri Jun xex chi cꞌo lo wi echiriꞌ cꞌamajaꞌ ne caꞌan ruwachulew, puwi saꞌ tak ri xubiꞌij yey puwi ri kilom rucꞌ ri kawach. Ma pakatzij wi xkil uwach y xkachap ne rucꞌ ri kakꞌab. Cojtzꞌiban cꞌu riꞌ puwi ri Jun pakatzij wi e ri Tzij,✡Jn. 1:1 ri cuya cꞌaslemal. 2 Wa Jun cuya cꞌaslemal xcꞌun che ruwachulew yey riꞌoj xkil uwach. E uwariꞌche cakabiꞌij saꞌ ri kilom y cakakꞌalajisaj cꞌu che alak puwi wa Jun na jinta utakexic rucꞌaslemal. Rire xex chi cꞌo lo wi rucꞌ ri Kakaw Dios yey xukꞌalajisaj cꞌu rib chikawach riꞌoj. 3 Janipa cꞌu ri kilom y ri katom, e cakakꞌalajisaj pan che alak; ma e cakaj cuꞌan alak xa jun kucꞌ riꞌoj jelaꞌ pachaꞌ riꞌoj pakatzij wi xa jun kaꞌanom rucꞌ ri Kakaw Dios y rucꞌ Rucꞌajol, waꞌ e ri Kanimajawal Jesucristo. 4 Cakatzꞌibaj pan wa carta che alak chaꞌ junam caquiꞌcot alak kucꞌ.

5 Ecꞌu wa tzij katom che ri Kanimajawal Jesucristo e cakakꞌalajisaj che alak: Ri Dios e Kꞌijsak yey rucꞌ Rire na jinta cꞌana kꞌekuꞌmalil. 6 We cakabiꞌij xa jun kaꞌanom rucꞌ ri Dios yey cojbin chupa ri kꞌekuꞌmalil, riꞌ cojelic xa oj aj rakꞌul y na cojbin ta cꞌu chupa ri Kꞌijsak. 7 Noꞌj we cojbin chupa ri Kꞌijsak jelaꞌ pachaꞌ ri Dios cꞌo pa ri Kꞌijsak, riꞌ xa jun kaꞌanom chikawach. Yey ronoje ri kamac cachꞌajtaj*Echiriꞌ cubiꞌij cachꞌajtaj ronoje ri kamac, waꞌ e queꞌelawi, ri Dios cucuy ri kamac y na cape ta chi cꞌu rukꞌatbal tzij pakawiꞌ. cꞌu riꞌ ruma ruquiqꞌuel ri Kanimajawal Jesucristo, Rucꞌajol ri Dios. 8 Pero we cakabiꞌij na jinta kamac, riꞌ xa e cakasoc kib chikibil kib y na katzij ta ri cakabiꞌij. 9 Noꞌj we cakakꞌalajisaj ri kamac chwach ri Dios, Rire cucuy kamac y cojuchꞌaj che ronoje ri na utz taj cꞌo pa kanimaꞌ, ma Rire lic jusucꞌ y ujiquibam uwach cuꞌan waꞌ yey Rire na cuꞌan ta rakꞌubal. 10 We cakabiꞌij na oj ta macuninak, riꞌ e pachaꞌ cakaꞌan aj rakꞌul che ri Dios, ma cakabiꞌij na katzij ta ri ubiꞌim can Rire.✡Pr. 20:9; Ec. 7:20