1 Inati ainautiram, chikich aints ainau Yusen pachisar, tura Yuse chichame ii nuikiartaji nuna pachisar pasé chichasarai tusaram, atumin inatminka pengker umirkataram. 2 Inamnujai mai metek Cristonu asar, inati ni inamurincha nakitrachartinuitai. Antsu ni inamurisha Yuse aneamuri tura Cristo nemarin asamtai, chikich inati ni apurin umirina nuna nangkamasarang pengker umirkartinuitai.

Ju chichamka nuiniarta. Tura umirkataram tusam etserkata. 3 Aints ii Apuri Jesucristo chichamen nekas aa nuna nuikiartachuka, tura Yus pengker umirkatnun nuikiartachuka, antsu niish wait chichaman nuikiartak pujauka 4 nekachiat nangkami: Wikia miajuitjai tawai. Nuka nangkami chichaman chichaa chichaaka jiyanitnasha, tura kajernaitancha, tura katseknaitancha tura pengker nintimtunitsuk pujustinasha wakerawai. 5 Nu aints ainau tunau tuke nintiminau asar nekas chichamnaka pachinatsui. Tura asar jiyanitan tuke wakerinawai. Tura kuikian nukap jukin Yusnaka pengker awajsachainjash tu nintiminawai. 6 Iikia Yus umirkurkia, tura tunau takatsuk pujakrikia, warinchuwach tura kuikiasha nukap wakerutsuk pujakrikia, nekasar maaketai titinuitji. 7 Iikia warinchusha takutsuk akiinamiaji. Tura jakarsha nunisrik warinchusha kichkisha jukishtinuitji.✡(Sal. 49.17) 8 Tura asar ii yutairi amatisha, tura ii entsatiri amatisha, maaketai tusar pengker nintimsar pujustinuitji. 9 Antsu kuikiartin wajastaj tu nintiminauka kuikian timiá wakerinau asar tunau wajainawai. Tura asaramtai kuikian nukap achikiartas wakerin ainaunka kuntin ejatkanam napinawa nunisang iwianch nu aintsnaka achiawai. Tura jakatniunam nunia wait wajaktinnum akupawai. 10 Kuikian nukap aneenauka tunau tuke turatnun nangkaminawai. Tura asaramtai chikich aints kuikian aneenau asar, Criston nekasampita tinachu asar, nukap wait wajakarmiayi.✡(Hebr. 13.5)

11 Uchiru, ameka Yusnau asam, kuikiaka nintimtsuk asata. Antsu tunauka nintimtsuk Yus pengker awajsata. Tura Cristo nekasampita tusam chikich ainausha aneeta. Tura jaimiasam: Wikia miajuitjai tumamtsuk asata. 12 Antsu Cristo pengker umirkum kakaram wajasta. Nu turakmeka pujut nangkankashtin jukitnuitme. Yuska nu jukita tusa aminka eatmakmiayi. Tura asamtai aints untsuri antinamunam ameka Cristo nekasampita tinuyame. 13-14 Ataksha tajame: Ii Apuri taatsaing, wi taja nuka kajinmatsuk tura yapaijtsuk umikta. Nu turakmeka natsaamtsuk pujustinuitme. Yus iwiaaku ainautin mash pujutan sukartin asa amincha waitmawai. Tura Poncio Pilato Criston iniam, Ni shamtsuk nekas chichaman etserkamia nuka amincha waitmawai.✡(Juan 18.37)

15 Ni kintari jeamtai, Yus ni Uchirin nayaimpinmaya akupkatnuitai. Ningki timiá pengker asa, junia apu ainau Apurintai. Tura junia juun ainau nangkamasang juuntaitai. 16 Ni tuke pujuu asa pengké jakashtinuitai. Tura tuke paaniunam pujuwitai. Tura asamtai aints kichkisha ningkikia nuningkia jeacharminuitai. Aints kichkisha Yusnaka pengké wainkacharmiayi, tura pengké wainkachartinuitai. Tura asamtai Yus timiá kakaram asa, aints ainaun tuke inartinuitai. Nekasaintai.

17 Uchiru, kuikiartin ainau ujakta: Atumka jampesrum kuikiartinuitjai tiirap tita. Kuik wári mengkakatin asamtai, kuikiarka nukap pujawai, tuuka nintimtsuk pujustaram tusam, antsu Yusek nintimrataram tita. Yuska tuke iwiaaku pujuu asa, ii yuumamurincha tuke mash sukartin asamtai, iisha pengker nintimsar yuumatsuk pujustinuitji. 18 Kuikiartin ainausha ujakta: Chikich ainau wait anentakrum pengker aa nuka mash turataram. Turaram chikich aints yuuminak pujuinausha nukap susataj tusaram, pengker nintimsaram yainiktaram. Nuna turinaunaka Yuska pengker awajsatnuitai tita. 19 Kuikiartin nuna turinauka nukap arusar Cristonam jear, chikich ainaun susarmia nuna nangkamasarang nisha warasartinuitai. Tura pujut nangkankashtinun Cristo susatnua nuna jukiartinuitai.

20 Uchiru Timoteowa, Yuse chichame etserkata timiaja nuka aints ainamunam tenapkesam etserkata. Antsu chikich chichaman etserina nuka, tura ju nungkanmaya pachisar aujmatina nuka antukaip. Tura nangkamiar: Wisha nekajai tinauka nuna chichamengka antukaip. 21 Tura chikich aints tu nintimsar pujuinauka Cristo umirtanka inaisarmiayi.

Ii Apuri amin yainmakti. Maaketai.