Yus Habacucan ni chichamen nekamtikiamiayi. Tura Habacuc Yusen iniak:

—Apuru, ¿warutik wi seamur anturtuktam? ¿Warutik ami aintsrum ainausha ayamruktam? ¿Waruka timiá wait wajaktincha wainmamtikrukmame? Aints ainauka kajernainak tuke maanin ainawai. Antsu ni tunaarin yapaijkiartin kichkisha atsawai. Pasé aints ainauka péngke aints ainaun papeenawai, —timiayi.

Tamati Yus ayaak:

—Atumin tentenmawar pujuinauka jiistaram. Tura shamkataram. Wikia pengké wainchatin turatatjai. Tura asan caldeos ainaun akuptuktatjarme. Nu aints ainauka wait anengratchau ainawai. Tura chikich aintsu nungkarin jiisar ninuchu waininayat nuni pujuinawai. Pengké shamrumtin ainawai. Ni kawairi ainau kakarman ampuinawai. Tura kawainum keeminauka untsuri asar, kukuiya nunisarang aneachmau arakia kauninawai. Tura tuni wekajinawa nuni mash mesenawai. Tura aints ainaun achikiar untsurin juwinawai. Atumi yaktari wenukrin jiisar aya wishikinawai. Timiá kakaram asar Yusnaka nintimtsuk: Iikia timiá kakarmaitji tinawai, —Yus timiayi.✡Hech 13.41

Yus tamati Habacuc ataksha Yusen iniak:

—¿Caldeos ainau aints redjai namakan achinawa nunisarang iincha tuke achirmakarchatjiash? ¿Tura iin wait anentramtsuk aints ainautincha mash mantamawarchatjiash? —tu iniam Yus ayaak:

—Atsa. Ju chichaman wi nekamtikiatatjame nu aints ainau ausarti tusam nuwenam aarta: Wi taja nunaka yamaikia umikchatatjai. Turayatun umitskeka ukukchatatjai. Wina pachitsaram Yus tímia nunaka pengké umitsuk ukuktatuapi tuuka nintimraip antsu nakasta. Jumchik arus taratata nuka nekas taratnuitai, tura ni timia nunisang taratnuitai.✡2 Pe 3.8-10

Yamaikia aarta: Pasé aints ainauka: Wikia miajuitjai tu nintiminawai. Antsu Yusen nekasampita tinauka tuke iwiaaku pujusartin ainawai, —Yus timiayi.✡Rom 1.17; Gál 3.11; Heb 10.37-38