Miqueas Israel ainaun ni tunaarin pachis kakar chicharak:

—Yus atum tunau turarme nunaka mash wainui. Tura asa atumin wait wajaktiniun suramsatnuitrume. Israel ainautiram, Jacobo yaktarin pujuinautiram, Yus ta nu antuktaram: Atumka wina chichamur umirtut nakitau asakrumin, Samaria yaktan yumpungtatjai. Apu ainauka aintsu tunaarin nekainayat, ni kuikiarin wakerinak, nu aintsun kársernum akuptsuk, antsu angkan pujusti tusar akupinawai. Tura sacerdote ainau aya kuikianak wakerinak takakminawai. Tura Yuse chichamen etserin ainausha kuikian jukiartas Yuse chichamen etserinawai. Tu pujuinayat nangkamiar: “Yus iijai pujawai. Iikia wait wajaktinka wainkashtinuitji”, tinawai. Tu pujuinau asaramtai, wikia Jerusalén yaktanka yumpungtatjai, Yus turamrume.

Antsu nukap arusar mash nungkanmaya ainau Jerusalénnum jear chichainak: “Winitaram. Yus ni jinti wekaasatniun iincha nuitamrati. Yus turamtai iisha Yuse jinti wekaasatnuitji. Ii turatin asar ii Apuri Murarin wakaar, iikia Yus juun seati jeanam jearmi”, tiartinuitai. Nu mura Sión tutainum Yus taa aints ainaun mash nuiniartinuitai. Tura Jerusalénnumia Yuse chichame mash nungka ainaun tinamtikratas jiinkitnuitai. Tura nuni Yus mash nungkanmaya ainau kajernaiyamuncha antuktinuitai. Tura yaachia nekas chichaman chichaawa nunasha nekaatnuitai. Tura mesetka yamaikia inaisataram titinuitai.

Yus tamati aints ainauka nangki jiru najanamun jukiar, jinum tseerar árak araatniun najanawartinuitai. Tura nangkirin tseerar, tseeng najanawar, nujaingkia aintsnaka maatsuk aya árak juutin najanawartinuitai. Nuniangka mesetka pengké atsutnuitai. Tura aints maatniuncha nintimtsuk angkan pujusartinuitai. Nunia mash aints ainau shamtsuk ni jeen ayamrartinuitai. Yus nekas kakaram aa nuka tawai tusam ujakta, —tusa Miqueas etserkamiayi.

Nunia Miqueas ataksha Yuse chichamen etserak:

—Judá nungkanam yakat Belén tutai mianchauka achatnuitai. Antsu nu yaktanam juun apu akiinatnua nuka Israela weari ainaun inartinuitai. Tura nu yaktanmaya jiinkitnua nuka yaanchuik tuke pujuyayi, —tusa Cristo akiinatniurin pachis nunaka eemak timiayi.✡Mat 2.6; Juan 7.42