Aints Job naartin chikich nungkanam Uz tutainum pujuyayi. Nuka nekas pengke aints asa Yusen umirnuyayi. Tura asa tunaunasha nakitnuyayi. Uchiri aishmangkuk aishmangkuk siete (7) armiayi. Tura nawantrisha tres armiayi. Tura uwijarisha siete mil (7,000) armiayi. Tura kamiyurisha tres mil (3,000) armiayi. Tura waakarisha, tura burrorisha, tura inatirisha untsuri armiayi. Tura nu nungkanmaka aints nuna nangkamasang kuikiartinka atsuyayi.

Nu Jobka kintajai metek kashik nantaki, ni uchiri tunau turamurin wainchayat, uchir tunau turinamtaikia, Yus ni tunaurin tsangkurati tusa, tangkurin maa nunia epea Yusen seayayi. Jobka nunaka tuke turinuyayi.

Chikich kintati iwianchi apuri Satanás naartin Yusnum jeamtai, Yus iniak:

—¿Tuniaya winame? —tamati Satanás ayaak:

—Wikia nungka weka wekaaka winajai, —timiayi.

Tamati Yus iniak:

—¿Wina inatir Job wina miatrusang umirtak puja nuka waintsumek? Nujai metekka aints kichkisha pengké atsawai. Nuka paseeka nintimtsuk, tura aintsnaka pasé awajtsuk, tunaunaka pengké turichuitai, —timiayi.

Yus tamati Satanás ayaak:

—Ja ai wainjai. Antsu Jobka amincha nangkamikia umirtamtsui. Ame timiá pengker awajmau asa, uchirisha tura tangkurisha timiá yujaruitai. Tura asa aminka umirtamak pujawai. Antsu ame nu mash jurukmiaka, amin pachitmas pasé chichastatui, —Satanás timiayi.

Tamati Yus chicharak:

—Watska, nekapsata. Ninu ainia nuka mash jurukminuitme. Antsu ni namangke takarsaip, —timiayi.

Yus tamati Satanás Yusnumia jiinkimiayi.

Chikich kintati Joba inatiri Joban tari chicharak:

—Sabeos ainau tariar, ami inatirmin mash maawar, waakancha mash tura burroncha mash kasamkar jukiari. Antsu wiki ampintrajai, —timiayi.

Nuna chichaak wajai, chikich inatiri tari chicharak:

—Yus nayaimpinmaya jiin akupak, uwija ainauncha tura inatirmincha mash maawari. Antsu wiki ampintrajai, —timiayi.

Tura chichaak wajai, chikich inatiri tari chicharak:

—Caldeo ainau tariar ami inatiram ainaun maawar, kamiyurmincha mash jukiari. Antsu wiki ampintrajai, —timiayi.

Nuna chichaak wajai, chikich inatiri tari chicharak:

—Uchiram ainau ni umajijai mash iruntrar yuwinak pujuinai, nase kakar nasentak, jea yumpunak uchirmin mash maayi. Antsu wiki ampintrajai, —timiayi.

Tamati Job wajaki, wejmakrin jaak tura muuken awamar, nungka pinakumar tepes Yusnasha kajertsuk chichaak:

—Wikia misu akiinawaitjai.

Antsu Yuska paseetai Jobka pengké tichamiayi.

Chikich kintati Satanás ataksha Yusnum jeamtai Yus chicharak:

—¿Tuniaya winame? —tu iniam Satanás ayaak:

—Nungka weka wekaaka winajai, —timiayi.

Tamati Yus chicharak:

—¿Wina inatir Job wina miatrusang umirtak puja nuka waintsumek? Nujaingkia metekka aints kichkisha pengké atsawai. Nuka paseeka nintimtsuk tura aintsnaka paseeka awajtsuk tunaunaka pengké turichuitai. Tura ame ninu ainia nuka mash jurukmiame. Turamaitiat tuke wina umirtak pujawai, —timiayi.

Tamati Satanás ayaak:

—Ja ai wainjai. Antsu ni namangke takasakminka, amin pachitmas paseetai turamtatui, —timiayi.

Tamati Yus Satanásan chicharak:

—Ame warí itiurta wakerame nusha turamnawaitme. Ni namangkesha takarsatnuitme, antsu maatka maawaip, —Yus tamati, Satanás Yusnumia jiinkimiayi.

Satanás Yusnumia jiinki, Joban mamurkati tusa sungkuran susamiayi. Tura mamu sungkuran susam, Joba namangke muuktuk tura sangkantuk mash purus wajakmiayi. Timiá tereau asamtai, jakach jakurun juki ni tereamurin meekmamramiayi. Tura yukuunam pujusmiayi.

Job timiá wait wajamtai nuwari chicharak:

—¿Ameka tuke tunaarinchau pujustasam wakeramek? Timiá wait wajau asam, yamaikia Yuska paseetai tita. Nu takumka jakachainme, —timiayi.

Tamaitiat Job ni nuwarin ayaak:

—Atsa, ameka nintinchau asam nuka tame. Iisha Yusnumia pengker aa nu tuke juyaji. ¿Antsu yamaikia Yusnumia wait wajaktincha jurumatsjiash? —timiayi. Tura Yusen pachis paseeka pengké chichaschamiayi.

Job mamurak pujamtai, kampatam amikri ainau niin jiisartas tariarmiayi. Tura arák wajasar Joban jiisar, timiá mamurak pujau asamtai:

—Auka Jobchawaitai, —tiarmiayi. Tura tejuwach tariar Job timiá wait wajamtai, Joban wainkar juutiarmiayi. Tura nijai tsaniasar chichatsuk siete (7) kinta nungká pujusarmiayi.

Nunia Job ni amikrin chicharak:

—Wikia akiinachuitkunka wait wajakchamin ayatun, akiinau asan nukap wait wajajai. Wi jakanka angkan pujusmin ayatun, jaachu asan angkanka pujutsuk timiá wait wajajai. Antsu tunau turamurnaka kichkisha aneaktsujai, —timiayi.

Tamati ni amikri kichik Yuska tita tachamaitiat ningki nintimsang chicharak:

—Ameka tunaunaka turichuitjai tinu asam nukap wait wajame. ¿Waruka Yus ami tunaarum ujaatsme? Nu turakmeka angkan pujustatme, —timiayi.

Tamati Job ayaak:

—¿Warí tunauna turinja? tusam ujatkata. Wikia tunaunaka pengké turichuitjai. Tura asamtai ame tunaawitme turutme nuka nangkami tame, —timiayi.

Tamati chikich amikri Yuska tita tachamaitiat ningki nintimsang Joban chicharak:

—Ami uchiram ainau nekasar tunau turinau asar jakaru ainawai. Aints nekas tunaarinchau pujamtaikia, Yus ajapangka ukukchatnuitai. Antsu pasé aints ainaunka yaingchatnuitai, —timiayi.

Tamati Job ayaak:

—Wikia yamaikia iwiaaku pujutan nakitajai. Timiá wait wajau asan Yusen sean: Yusru, wait aneasam wiasmamtikrukaip. ¿Antsu warukantsuk timiá wait wajaj? nu nekamtikruata tajame, —Job tamati, chikich amikri Yuska tita tachamaitiat ningki nintimsang chicharak:

—Ame nukap chichaayatum, nekas chichamka chichaa weatsme. Tura asakmin wikia ujaktaj tusan wakerajme. Ame chichaakum: Wi taja nuka nekasaintai, tura tunaachawaitjai tayatum, Yus amin ni nekamtairinka tura yumtin chichamnasha nekamtikramatnuitai. Yus nekamtikramamtaikia, wina tunaarujai metekka wait wajaktinka surutsuk, antsu japchirin surusi tusam nekaamnawaitme, —timiayi.

Tamati Job ayaak:

—Atumka tsuwakratin chikich aintsun tsuwartatkamawar tujintina nunisketrume. Tura asaram nekas chichamka chichaa weatsrume. Antsu atumi chichame nungka tsetseria tumau ainawai. Yamaikia itatkataram tusan tajarme. Wina chichamur aints ainau tuke ausarti tusan wakerajai. Tura asan jirunam tura kayanam wina chichamrunka aartasan wakerajai. Wina uwemtikrurtin pujawapi tusan nekajai. Tura nungka amuamunam wina uwemtikrurtin ju nungkanam wajastinuapita tusan nekajai. Tura wina namangkur akarak kauramtaikia, jakayatun wikia chikich namangkrujai nantakin Yusen jiistinuapitja. Tura yutairun wi yuumaja nuna nangkamasnak Yuse chichamen antuktasan timiá wakerinuyajai.

Wikia nawan ainauncha pengké wakerutsuk pujuyajai. Pasé aints ainau tunaun turinau asaramtai, Yus timiá kakaram aa nuka wait wajaktiniun susatnuitai tusan nekajai. Tura wi turamurnaka mash nekawai. Chikich ainaunka pengké anangchau ayajai. Tura wait chichamnaka etserchau ayajai. Tura chikichnau aa nunaka pengké juchau ayajai. Tura wina irutkamuru nuwarincha wakerichu ayajai. Tura wina inatir ainaunka paseeka awajchauyajai. Tura kuikiartichu ainaunka paseeka awajtsuk antsu ni yuumamurinka tuke suyajai. Tura waje ainaun tura mitaik ainauncha pengker awajnuyajai. Tura kuikiartin ayatun, kuikianka aneetsuk miajuitjai tichau ayajai. Tura tsaasha tura nantusha tsantina nunaka: Wina Yusruitme tichau ayajai. Wi nuna tamatikia, Yus wait wajaktiniun surusai tusan tichauyajai.

Tura wina nemasur wait wajainamtai warachuyajai. Tura jakati tusanka yumingchauyajai. Tura chikich nungkanmaya aints taaramtaisha tuke: Wina jearun kanurtaram tinu ayajai. Tura asamtai chikich ainau wina pachitsar tunaawitai tinau wainiat, Yus timiá pengker aa nuka wina pujutrun mash nekau asa wina aujtusti. Ni turamtai Yusnasha wina turamurnaka shamtsuk ujaktinuitjai, —Job ni amikrin timiayi.✡Luc 18.10-14

Job nekasan tunaachawaitjai tinu asamtai, ni amikri ainau chichatsuk pujuarmiayi.

Tura Joba amikri chichatsuk pujuinamtai, Yus nasenmaya Joban chicharak:

—¿Waruka nintimchayatmesha chichaame? Ame wi turaja nuka nekatsme. Watska, aishmang asam wajakta. Turakmin wikia amin iniastajme. Wi turamtai ame nuiturta turam airkata. Wi nungkan najanmatai ¿amesha tuni pujumiame? Watska ame mash nekau akumka ujatkata. ¿Tura juun entsa nungkan netkashti tusa surimia nuka yáki tusam nekamek? Ameka kinta tsawaarti tura tsaa tsantrati tusam ¿chicham akupkamnaukitam? ¿Tura michasha najanamnaukitam? ¿Tura nase tuniaya winá tusam nekamnaukitam? ¿Tura yumi jitawai tura saratui tame nunasha nu akupawai tusam nekamek? ¿Ame yumi jiturti tusam chicham akupkamnaukitam? ¿Tura musach, tura tunim tura yaa ainau nayaimpinam tsantrarat tusam chicham akupkamnaukitam? ¿Tura angkuaji tsapuiti tusam chicham akupkamnaukitam?

¿Tura nanamtin ainau ni uchirin yurawarat tusa yáki nekamtairincha sua? ¿Amesha nu nekamek? ¿Kawai ainaun ni kakarmarin sua nuka amekitam? ¿Tura pinchu ainau yakí nanamiarti tusam nuininkitam? ¿Tura kukui ni pasungken yakí najanati tusam chicham akupkamnaukitam? ¿Tura nanamtin ainausha ni yutairin wainkartas itiur yakí nanamina tusam nekamnaukitam?

Ame mash nekachiatmesha ¿itiur winasha pajakim airkatasmesha wakerutame? —Yus Joban timiayi.

Yus tamati Job ayaak:

—Yusru, ameka pengké tujinkachuitme tusan wikia nekajme. Antsu nintinchau asan nekachiatnak chichakmajai. Yaanchuikia amin pachisan chikich ainau chichainaun antuku asan, warukuki tusan nekachu ayajai. Antsu yamaikia aminu chichamin antuku asan, nekasan tunaawaitjai tajame, —Job Yusen timiayi.

Nunia Yus Joba amikrin chicharak:

—Atumka wina pachitsaram Job nekas chicham ujakchau asakrumin, wikia atumin kajerkan tajarme: Yamaikia werum waaka uchiri siete (7) jukiram, tura uwija uchirisha siete (7) jukiram maaram epeataram. Tura Job chicharkuram: Wait aneasam Yus seatrita titaram. Tura atum wina pachitsaram nekas chicham ujakchau asakrumin, Job atumin pachis wina seatmatai wikia tsangkuratatjarme, —Yus timiayi.

Tamati Joba amikri ayu tusar, Yusen miatrusarang umirkarmiayi. Turinamtai ni amikrin pachis Job Yusen seatmiayi. Tura Yusen seamtai, Yus Joba mamurin tsuwarmiayi.

Tura Joba tangkuri mash mengkakaru asaramtai, Joba weari ainau tura ni amikri ainau Joban uwejnum wetai kuri najanamun tura kuikiancha susarti tusa Yus nintimtikramiayi.

Yus Joban pengker awajsau asa, tangkuri ukunam nukap yujarar, uwijari catorce mil (14,000) armiayi. Tura kamiyurisha seis mil (6,000) armiayi. Tura waaka ainausha tura burro ainausha untsuri yujararmiayi. Nunia ataksha uchin siete (7) yajutmarmiayi. Tura nawantrincha ataksha kampatman yajutmarmiayi. Ni wait wajakmaurin inangkar Job ataksha ciento cuarenta (140) musach pujusmiayi. Tura asa tirangkincha tura nuna uchirincha wainkamiayi. Tura nunia juunmar jakamiayi.✡Stg 5.11