1 Yusru wi ujaajme nu anturtukta.

Wina nemasur kakaram ainia nunia ejarkata.

2 Tura pasé aints ainau anumkar chichaman najatrina nunia uurkata.

Tura nu aints ainau chichaman najatrina nunia angkanmamtikruata.

3 Ni inajingkia saapi tsakamua nunisarang ainawai.

Tura ni chichamengka tsentsak tseasjai paingmawa nunisarang ainawai.✡Rom 3.13-14

4 Tura anumkar aints tunaarinchau ainaun nangkirin ketinawai.

Nuna turinak aneachmau shamtsuk turinawai.

5 Tura mai nuwamtak pasé turami tusar nintimtiknainawai.

Tura anumkar ejatak puusami tinawai.

6 Tura asar aints kichkisha iincha waitmakchatnuitji tu nintiminawai.

Antsu nu aintsu nintimaurinka uukmau wainiat,

Yusek ni pasé nintimaurincha nekaamnawaitai.

7 Yus aneachmau nu pasé aints ainaunka ni nangkirijai ijutnuitai.

8 Turamtai ni pasé chichatirijai

ningki wiasmatmamkartin ainawai.

Turinau asaramtai chikich aints ainau niin wainkar wishikrartin ainawai.

9 Mash aints ainau Yusen:

Ameketme juuntam tiartinuitai,

tura Yuse turamurin pachisar chichainak:

Yus aitkayi tiartinuitai.

10 Tura asaramtai pengke aints ainau ni Apurin warartusartinuitai.

Iin waitkartukta tusar,

Yusen seartin ainawai.

Tura aints anangmichu ainauka mash pengker nintimsar pujusartin ainawai.