1-2 Yusru ameka ii Yusrinme.

Mash aints ainauti warartustinmeka ametme.

Ameka seamurka anturtau asakmin,

aints wikia pengker aa nuna turatatjai tinu ainauka ni timiaurinka umikiartinuitai.

Mash nungkanmaya ainauka amin winiartinuitai.

3 Ii tunaaringkia iin inatminua nunisarang ainawai.

Turinau wainiatum ameka ii tunaaringkia tsangkukratkatnuitme.

4 Yusru ame aints ainau winar arti tusam,

tura wina pujutirun wijai pujusarti takumningkia,

nu aints ainausha nekasar pengker nintimsar pujusartin ainawai.

Tura ami jeemin pujakrinkia,

ami pengkeerumjai ii nintin piatkartukta.

5 Yusru ameka iin uwemtikiartuktin asam,

mash aints ainautin metek jiikratsam,

pasé aints ainauka wait wajaktin suwitme.

Tura amin umirtaminak pujuinauka pengker awajnuitme.

Tura asakmin mash nungkanam pujuinauka,

tura juun entsanam wekajinausha aminak nintimturmasartin ainawai.

6 Ameka mura ainau muchitsuk wajasarti tusam ami kakarmarmijai wainuitme.

7 Ameka juun entsa tampaaramurin:

Miaaku wajasti tusam inawaitme.

Tura aints ainau taetet wajainauka:

Titú pujustaram tusam itatmamtiknuitme.

8 Aints timiá arák pujuinausha ami wainchati takatrumin wainkar kurarartin ainawai.

Tsaa taakmaunumanini tsaa jeamunmaninisha aints ainau amin pachitmasar warainak untsumkartin ainawai.

9 Ame aja ainauka wainnuitme.

Tura yumisha jitumtiknuitme.

Tura arak ainausha tsapamtiknuitme.

Ameka entsa ainau nungkan chuprarat tusam najanawaitme,

turasha trigo nerekat tusam neremtiknuitme.

10 Ameka nungka mujukash tsairmau aa nu chupratnuitme.

Tura nungka minarat tusam yumisha jitumtiknuitme.

Turasha árak ainau pengker nerekarat tusam neremtiknuitme.

11 Ameka aja ainau musaachjai metek nerekarat tusam,

yumi nukap jitumtiknuitme.

12 Numi atsamunam tura mura ainamunam waaka ainau tura uwija ainausha chirichri nukap yuwaarat tusam samek najanuitme.

13 Ame turau asakmin,

paka nungkanam waaka ainau tura uwija ainausha untsuri iruninawai.

Tura trigo arakmau ainausha untsuri ainawai.

Tura asaramtai aints ainau mash kantan kantamkamaikiak warainak untsuminawai.✡Sal 104.10-16