4
Dàd Nyam ecʼodad a
1 Sica mʼam dadʼŋ Nyam ecʼany af lele Jesu Krist eke bʼow jɛj agŋ ekʼanŋ owr lel agŋ ekʼuw ab ecʼów ok a ecʼany af, mʼam dadʼŋ Jesu Krist e mowrer a lel in ecʼes ɛw ab ab sosiɛm mʼɛsɛ: 2 nɛny átʼŋ es dad Nyam ecʼodad a, ekʼow el lɛgŋ mamn ɛm oglog lɛgŋ ŋuŋ ɛm yɛji, dád eb agŋ, ɛ́nym agŋ abr oglog átr agŋ sos es, ke ↄ́ny low eku nↄnↄ agŋ e low yɛgm ɛm. 3 Tasi ɛm a, lɛgŋ bʼow ow ekʼagŋ kʼow erurm eke kʼiri low yɛgm nawrɛ tasi a, ke bʼow erur us ɛl obi ecʼów eke bʼaw ɛl a jam, ɛtŋ -li bʼow -lʼɛsŋ low yɛgm ɛsɛl nↄnↄ eke bʼow dad ɛl ów a eke -li bʼerur eke -li kʼiri a. 4 -Li bʼow -li bʼabl ↄru low nawrɛ ecʼiri e lís, ke -lʼɛwl -nʼam iri agŋ ecʼów eke bi kↄkn dad a. 5 Ŋ ecʼa, òk sos es low low fɛŋ ɛm, ɛ̀gŋ gbre ij eb, kòk ŋ ecʼAmani Mamn e kokoba ↄb e juma a, kòk ŋ e Nyam juma a íy nɛny.
6 Ɛm ecʼa, wanci ow eke wɛl kʼoc wawrʼm egb; wanci eke mi kʼɛlu wus na es a ow. 7 Mʼogŋ mum mamn a, mʼim toŋ mʼigŋ ɛm ecʼes uru a e nuŋ, mʼucu ɛm ecʼↄmn a mʼↄny es. †mʼucu ɛm ecʼↄmn a mʼↄny es:agŋ bɛb bʼiri ɛsɛ: mʼel cɛcɛ ɛm e nɛny ij a e lís. 8 Sica any eke mʼeb eci labm sↄg a, am ekuʼm. Ow ow el nɛny nyam ij e tufɛ a eke Ɛs Kↄtↄkↄ, jɛj ok ɛs nɛny nyam ɛs a bʼow ↄŋʼm jɛj ok e lɛgŋ a. Ɛtŋ ow elm ɛm cɛ li kʼow nʼↄↄm im, kↄ agŋ a fɛŋ ekʼam eku erur ɛm wanci a eke li bʼow lʼɛlu sos ↄkm a.
Uwar ɛm ecʼów
9 Àtr sos es ow fafa ɛŋnʼm, 10 aŋke Demas igŋ ɛluʼm es wus ecʼów ecʼerur eke nʼↄny nↄnↄ a sosiɛm eci; lʼeb ejagb nʼim Tesaloni. Kresan eb ejagb im Galasi ɛtŋ Tit im Dalmasi. †DemasKolↄs 4.14; Filemↄ 24; Tit: 2 Korɛnt 8.23; Galat 2.3; Tit 1.4. 11 Luk sↄny cɛ anŋ ɛm ab. Òc Mark ke ów in ab, aŋke lʼↄtu eke li kʼɛlum im abu ɛm e juma ab ɛm. †Luk:Kolↄs 4.14; Filemↄ 24; Mark: Ob Kok 12.12,25; Kolↄs 4.10; Filemↄ 24. 12 Mʼɛrm Tisik Efɛs. †Tisik:Ob Kok 20.4; Efɛs 6.21-22; Kolↄs 4.7-8; Tit 3.12. 13 Lɛgŋ eke bʼow ow a, ìsmʼm ɛm e mob af ɛw a eke mʼɛw es Troas Karpↄs ogŋ a, ke ísmʼm silɛl a yɛji, ab brobro ɛl a eke wɛl nↄn ndey lɛl af a. †ndey lɛl:ow el silɛl ekʼil an. Kʼaw kʼow el Amani Sig ɛm e Nyam e Silɛl a.
14 Alesandr †Alesandr:1 Timote 1.20. lôw ofŋ ɛs a kok low ekʼakplm ɛm e lís; Ɛs Kↄtↄkↄ bʼow sↄgʼr low ŋuŋ a e li kokʼm a e labm. 15 Ŋ yɛji ↄsu sos in e lís, aŋke ɛy e sodad a e dad ɛm lʼatar ɛy ab lɛc ɛm.
16 Lɛgŋ eke mʼↄg es mʼim odad jɛj ok ɛm a, ɛgŋ kaka anm ɛm ab, ɛl fɛŋ -lʼigŋ -lʼɛluʼm es. Ke blel Nyam kʼↄ́bm ɛl low ow eci. 17 Gbɛkↄ Ɛs Kↄtↄkↄ, in anŋ ɛm ab ɛtŋ lʼatrʼm sos es, ow ↄŋ mʼↄny abusu mi dad in ecʼodad a mʼok Nyam any uwm ɛsɛl amua fɛŋ. Ɛtŋ li sↄgʼm kukuma amua e nɛnym. 18 Ɛs Kↄtↄkↄ ɛmɛny bʼow eb ɛluʼm es low ŋuŋ fɛŋ e lís, ɛtŋ mi bʼow mʼanŋ kpoŋ kpoŋ mʼɛy in ecʼAfr eci gbreŋgbi usu a. In ecʼél anygbɛl sɛgŋ fɛŋ! Amɛn.
Ɛsŋn es abal el
19 Ɛ̀sŋn Prisil, Akilas lele Onesifↄr e bosu ab ab ↄŋʼm. †Prisil, Akilas:Ob Kok 18.2; Onesifↄr: 1 Timote 1.16-17. 20 Eras anŋ Korɛnt ɛtŋ mʼɛw Trofim es Mile, aŋke ↄl am ↄnyʼn. †Eras:Ob Kok 19.22; Rom 16.23; Trofim: Ob Kok 20.4; 21.29. 21 Àtr sos es ow gbuŋ ke lɛfr e lɛgŋ a ów. Ebul, Pudɛs, Linus, Klodia lel agŋ lisijimɛl ɛjecʼa fɛŋ ab am ɛsŋnʼŋ.
22 Ke Ɛs Kↄtↄkↄ ánŋ ŋ ab.
Ke Nyam ecʼↄwrↄ a ánŋ ↄny ab.
†4:7 mʼucu ɛm ecʼↄmn a mʼↄny es:agŋ bɛb bʼiri ɛsɛ: mʼel cɛcɛ ɛm e nɛny ij a e lís.
†4:10 DemasKolↄs 4.14; Filemↄ 24; Tit: 2 Korɛnt 8.23; Galat 2.3; Tit 1.4.
†4:11 Luk:Kolↄs 4.14; Filemↄ 24; Mark: Ob Kok 12.12,25; Kolↄs 4.10; Filemↄ 24.
†4:12 Tisik:Ob Kok 20.4; Efɛs 6.21-22; Kolↄs 4.7-8; Tit 3.12.
†4:13 ndey lɛl:ow el silɛl ekʼil an. Kʼaw kʼow el Amani Sig ɛm e Nyam e Silɛl a.
†4:14 Alesandr:1 Timote 1.20.
†4:19 Prisil, Akilas:Ob Kok 18.2; Onesifↄr: 1 Timote 1.16-17.
†4:20 Eras:Ob Kok 19.22; Rom 16.23; Trofim: Ob Kok 20.4; 21.29.