1 Agi sruꞌ gin sib i Kristus iyu tsakia i gan riniubitan, ibinigi da agam wangif uwayant bida nigi babampafan nasangꞌ Arangan. I wain, bida garam mangan uda tsakia i gan riniubitan, da arangan itangin sanab asub rai sib. 2 Ibinigi da gubuꞌ aranga rumpadan da nidzunggan, da arangan anungꞌ rungꞌ atsungꞌa garam gar nanggan wangun akatsan u, imaꞌ. Arangan natsungꞌ Anutu uwayantan. 3 I wain, agam iyung yatsungꞌ garam marautu uwayantan ibasangꞌ sib, uwayant bida uwayant araraꞌan, da wangun akatsan, da numa mpui maran didiruntan yusan, da fada i nam ngumpan i numa mpui ngkiangan yusan da araraꞌa i ruan, da uwayant isa Anutu nanggan faidagin udziꞌ i pumuꞌa anutu umpur. 4 Aruani da agam anungꞌ irut rib marautu inang uwayant maisan ampi bingan ibi ribarangan nangan igi u, da ribarangan irunt fafun gin da ini nan maisan i agam. 5 Da bitsintaꞌ Nifutsarif itip runggan sib i raruda garam mpada marataꞌ da garam mampa sib. Da bampan aga da ribarangan bungꞌ amuntiꞌ Arangan maranggan da nani da Arangan i wain idzuwai da ribarangan inang uwayant maisan bida nigi. 6 I wain arigi da garam muarutsan ifis i sisingꞌ bini da garam tuasaru mampa sib igi da gubuꞌ rungꞌ mpada marataꞌ. Hai, ribarangan riniuriatsan imamp ibi garam da sagat inang da inang asub da imamp i nanggan rarudan, da bitsintaꞌ sisingꞌ bini iba i ribaranga ganunggan mpada maran taꞌan bida Anutu runggan.

7 Gubuꞌ nam santan nanga i ntsupan iba su uts sib wa. Ibinigi da agam wau uwayant bini da wampa tayangꞌ uwayantam da nanggam mpadan, i agam sangꞌa i udagin bini da Anutu. 8 Agam maram wari i runggam ntuaꞌ nidzun angu, i wain, uwayant maran arida i rib faingꞌ inang da ibuafir asub ampi bingan da iyus uwayant santan aga. 9 Da wais yaring i ruam da rib muarutsan faingꞌ bida bada i ruta agam mpadan, da anungꞌ pusupusan i nanga gum bida nigi u. 10 Anutu irim maraampi gan da nam riman ruga rugan da agam santan bitsintaꞌ bitsintaꞌ i agam nanga i guman gin. Ibinigi da agam bitsintaꞌ bitsintaꞌ wampa abi garam gum bini mpada tayangꞌ Anutu maraampi gan igi i rima rib faingꞌ sib in. 11 Gubuꞌ garam mangan fisa i nan, da arangan nafis i nan nabi fisa i Anutu runggan nifunggan rururungan. Gubuꞌ garam mangan nanga gum i rima garam faingꞌ sib, da arangan nanang gum igi i Anutu riniurun gan nangan da rima rutin. I garam da sagat bungꞌ arim bingan tsiraꞌ da Anutu i Yisu binganggan. Arangan isangꞌ bingan tsiraꞌ da nampang mingꞌa ratar ntingan. Nan nidzun.

12 Dzi rinungꞌ rusangꞌ, barabin bits iwaꞌ da agam ibi dzaf i intsaꞌa agam. Da bitsintaꞌ agam anungꞌ runta fafun da uda uwayant bida ani, nam maran mangan nidzun angu iwaꞌ da agam, imaꞌ. 13 Mingꞌa wasaꞌ i nam intsaꞌan igi da agam ibuaringꞌ barabin ibi Kristus ibuaringꞌ ugu; ibinigi da agam nugum natsiaꞌ. I gubuꞌ Kristus binganggan tsiraꞌ waꞌa dzidziwan, da agam nugum bungꞌ anuf da natsiaꞌ nayus angu. 14 Agam iyu Kristus binganggan, da bida rib nida nan maisan i agam i wain arigi, da agam nugum watsiaꞌ, i wain, Anutu Marapayaman igi, Marapayam nampang da bingan tsiraꞌ, irut agam impai. 15 Bida agamam bits isa garam funub ma wapa nam ma nanga uwayant asub faingꞌ ma usuda runggan i garam faingꞌ nanggan, da arangan nayu tsakia gin. Da bitsintaꞌ agam anungꞌ nanga uwayant maisan bida nigi u, imaꞌ! Agam wayung rururungan. Bida agam nanga uwayant maisan da uda tsakia gin, da nigi imais wasi. 16 Da bitsintaꞌ bida agamam bits uda tsakia i sanab muarutsa Kristus, da arangan rinin anungꞌ miaꞌan u, imaꞌ. Arangan narim bingan tsiraꞌ da Anutu i ribigi ifaringꞌ bingan Kristus iyab i arangan. 17 I wain, Anutu gubuꞌ gan raruda garam inang i waꞌan, da bungꞌ awaꞌ da Arangan utupan nasu miamun. Da bida nam rarudan igi waꞌa i agi suda miamun, da bungꞌ antsup nabianungꞌ nampruꞌ da rib mamida i atangꞌa warangꞌ i Anutu sisingꞌ bini gan? 18 Da Anutu nanggan ini biani,

19 Ibinigi da bida garam fain buaringꞌa barabin atsungꞌa Anutu maranggan furan, da garam tuasarigi narim runggan santan nafa Anutu banginggan, i Arangan itip tuasarangan da iti inang nam santan Arangan nidan ugu. Da tuasarangan runais gudzun i nanga uwayant bini igi fadan.