1 Aruani da dzi ni nida nan da agam garam gudzu gudzun ampan mararam gan. Dzi ni nan ani i wain, dzi garam gudzun mangan ibi agam, da dzi maranggaꞌ da dzi tsanga Kristus uda tsakia, da dzi bungꞌ arut Arangan nayu bingan tsiraꞌ nida waꞌa dzidziwan. Ibinigi da dzi ni raꞌa i agam i nanga gum bida ani. 2 Wampa tayangꞌ Anutu ampanggan bini, i ribarangan impa ibi dumpa iyab agam banginggam. Wasangꞌ dauman bida ampan fain usuda agam i nanga gum igi, imaꞌ. Agam nugum watsiaꞌ i mpada tayangꞌ ampan igi, nabi Anutu maran yari i agam nangan. Da agam anungꞌ maram fura i nanga gum igi i uda nam ntsuman gin, aꞌa. Watsangan nabi agam maram yari iyus i nanga gum bida nigi. 3 Agam anungꞌ tsanganda bida agam garam tsiraꞌ tsiraꞌ da agam rasuda ampan aru Anutu rima yaba agam banginggam ugu, imaꞌ. Agam wanang uwayant bini angu, i ribarangan tsangandan da atsungꞌa gin. 4 Bida agam nanga bida nigi, da gubuꞌ Garam Suda Gudzun i Garam Mpada Tayangꞌ Dumpa waꞌa dzidziwan, da agam bungꞌ ayu bingan tsiraꞌ mingꞌa ratar i gum igi mungaꞌ gan, nabi dampun gudzun garam bada miamun i nam runtan udan.

5 I sanab bida nigi da agam garam rinifaꞌ watangꞌ warangꞌ i garam gudzun rusam. Da agam garam muarutsan santan watsungꞌ sanab rasuda runggam da atangꞌa warangꞌ i ruam. I wain, Anutu nanggan ini ibiani, “Anutu inang da irasu garam tsarifa runggan, da bitsintaꞌ Arangan inang da isu maraampi da garam rasuda runggan.”Snd 3:34 6 Ibinigi da agam warasu runggam da watangꞌ warangꞌ i Anutu banginggan riniurun. Da waꞌa gubuꞌ Arangan tagadan, da Arangan bungꞌ araꞌ i agam. 7 Anutu inang da igaib agam. Ibinigi da agam wangu barabin gam santan agam buaringꞌan, da agam warim wafa i gan banginggan.

8 Agam uwayantam nadzidziwan bini da warim maram. Sadang, aru agam ipiapam, arangan iwaꞌ ibi apu buman laion giriringa tsiraꞌ. Gubuꞌ sib angu da iyung isau garam i gadan. 9 Wamunti babampaf i nanggam muarutsan da wasiat arangan. I wain, agam isruꞌ gin ibi raim ruas muarutsan mpada intap santan ibuaringꞌ tsakia isangꞌ ibi arigi. 10 Anutu, maraampi wainggan, inuꞌ agam i Kristus ugu, i agam ruta Arangan mpada Arangan puatsadan gan da binganggan tsiraꞌ mingꞌa ratar ntingan. Ibinigi da gubuꞌ agam uda tsakia gubuꞌ uts pas angu sib, da Arangan runggan bungꞌ anang agam nawaꞌ bini, da narim riniurun da agam nanggam muarutsan da nanang agam namunti babampaf. 11 Arangan isangꞌ nampang santan mingꞌa ratar ntingan. Nan nidzun.

12 Sailas, aru dzi tsanganda bida agi rainggangꞌ nidzun muntida babampafan i nam muarutsan ugu, irim dzi sib i kakara nan uts ani da agam i rima riniurun da agam nanggam muarutsan da nida nan wasi bida nan dzi kakaran ani yaba i Anutu maraampi gan igi nan nidzun. Da wamunti babampaf in.

13 Ampan mararam mpada mingꞌa Babilon,*Babilon — Garam mararuru ampi bingan maran ifur ibi bingan Babilon ani da isu nan maradzigin i bingan Rom. I wain, gubuꞌ arigi da rib Rom uwayantan maisan nanga i ampan muarutsan isangꞌ rib Babilon uwayantan maisan nanga i rib Israil mungꞌ ugu. aru Anutu tagada sib mpruꞌan da agam ugu, irim gubuꞌ wasaꞌ gan da agam. Da dzi narunggangꞌ Markus ibinigi irim gubuꞌ wasaꞌ gan. 14 Watsutsuf rugianggam ntuaꞌ†Watsutsuf rugianggam ntuaꞌ — Nan “watsutsuf” igi yatsungꞌ rib Yuda mpadan da gubuꞌ arigi sanaban tsanganda ruan da maran arida i ruan. i santingꞌa bida agam maram yari i ruam nidzun angu da irim wangum da ruam. Nan nufan narut agam rib muarutsa Kristus.