1 Abraham itangin Mamri gampan rai da intsungꞌ iruꞌ Negeb da impa wasaꞌ i gamp Kadis da Sur. Raiyi da itip intsungꞌ ifan da impa Gerar. 2 Mingꞌa nigi da Abraham ini Sara igi arangan nafunggan. Ibinigi da Abimelek, garam Gerar king gan, itangin gan garam guman ifan da iyu Sara iba da arangan. 3 Da bitsintaꞌ idziang mangan da Anutu ini nan da Abimelek imingꞌ nam puafuban ibiani, “Agu da u garam bini angu i mampan, i sagat u yudan igi sagat gabun.”

4 Abimelek anungꞌ iwarip isu uts da Sara u, ibinigi da arangan ini binaꞌ, “Nifutsarif, dzi garam asub maꞌa gin da u bungꞌ asiat dzi da utupangꞌ santan? 5 Abraham runggan ini i sagat igi arangan nafunggan. Da sagat runi ibinigi i Abraham igi arangan nafunggan marub. Gubuꞌ dzi uda sagat igi da dzi marangꞌ ifur i dzi nang sanab rururungan da dzi wanang asub mangan u.”

6 Da Anutu itip ini da arangan imingꞌ nam puafuban ibiani, “Hai, dzi tsanga u sanabam rururungan bini igi da dzi aruani imunti sib i agu i anungꞌ nanga nam maisan mingꞌa dzi maranggangꞌ i anungꞌ ruta arangan gingꞌan u. 7 Da watip watangin Abraham fininggan nafa rutin, i arangan garam uda dzi nan gangꞌ da atsungꞌa gin da bungꞌ augin i agu da u wasangꞌ i mampan u. Da bida u mamida tanginda arangan fininggan fada rutin da agu da gam utupam santan bungꞌ amamp.”

8 Da maratait bingan da Abimelek yuriꞌ da inuꞌ gan garam guman santan impruꞌ da ini da ribarangan i nam santan Anutu nida rutin mingꞌa nam puafuban. Da ribarangan irat nidzun angu gin. 9 Ibinigi da Abimelek ini da Abraham iba munti i maran da igutin, “Wain idzuwai da u nang nam bida ani da agai? Dzi nang asub idzuwai da agu da u nang uwayant bida ani da dzi da gangꞌ utupangꞌ iwaꞌ da asub tsiraꞌ? Uwayant aru u nangan igi anungꞌ idaum mangan u. 10 Wain idzuwai da u nang ibiani?”

11 Abraham ini arangan nan gan mungaꞌ ibiani, “Dzi marangꞌ ifur i garam gamp ani wanatsarif Anutu u. Da bungꞌ ais dzi funub i uda dzi fininggangꞌ. 12 Nan nidzun, Sara igi dzi nafunggangꞌ. Dzi ramanggangꞌ irim da rinangꞌ mangan, aga wampruꞌ rinangꞌ u. Ida dzi yu isu dzi fininggangꞌ. 13 Da gubuꞌ Anutu nidan da dzi i tanginda ramanggangꞌ gampan rai da fada intap mangan da dzi ni da Sara ibiani, ‘Bida u maram arida i dzi da agi nida fada gamp bida anungꞌ da wani da garam da sagat nabiani, “Abraham igi dzi nafunggangꞌ.” ’ ”

14 Gubuꞌ Abraham nida nan sib, da Abimelek irim dumpa da makau da garam da sagat gum impruꞌ da Sara ifan da Abraham. 15 Abimelek ini da Abraham ibiani, “Watsangan. Intap ani dzi intapangꞌ. U maram fura i mpada anungꞌ da wafa mpa gin.” 16 Da ini da Sara ibiani, “Dzi rim 1,000 silva*1000 silva — Nan Hibru ini 1000 sekel silva, da barabin gan isangꞌ 11 kilogram. da u nafunggam i ntsuma barabin aru waꞌan da agu ani, i rib santan ruta agu mpadan sruꞌagin bida u wanang asub mangan u.”

17 Da Abraham yugin da Anutu, da Abimelek rinin idaum da isiat barabin udzuda arangan fininggan da sagat guman santan wangun i mamida rima narun ruas ugu. 18 I Yawe yudzu sagat santan mpada Abimelek ungaran wangun sib i wain iruꞌ, arangan iyu Sara, Abraham fininggan.