1 Da Yawe inang nam ngarubini iwaꞌ da Sara ibi arangan nidan da ragadan ugu. 2 Ibinigi da Sara iwangun da irim Abraham narunggan marub da gubuꞌ Anutu ragadan ugu. Da gubuꞌ arigi da Abraham ifufi sib. 3 Abraham inuꞌ mamaꞌ narun igi binganggan Isak (wainggan ‘irubungꞌ’). 4 Gubuꞌ 8 ifa sib da Abraham isaf mamaꞌ narun igi riniubit ibi Anutu nidan. 5 Abraham udzufan iwaꞌ 100 da fininggan Sara irim arangan narunggan Isak. 6 Da Sara ini, “Anutu irim nam rubungꞌan da nugun tsiaꞌan tsiraꞌ da dzi, da rib santan ringantagin da nugun bungꞌ atsiaꞌ da narubungꞌ nampruꞌ da dzi.” 7 Da arangan itip ini ibiani, “Mungꞌ ugu da manga wanang da ini da Abraham ibi Sara isangꞌ i rima narun, imaꞌ. Da bitsintaꞌ dzi rim arangan narunggan marub da gubuꞌ arangan fufidan.”

8 Gubuꞌ mamaꞌ narun yingꞌan da tanginda sisun rai, da Abraham isu nam gadan tsiraꞌ angu gin. 9 Da Sara itsangan mamaꞌ narun Abraham rima da sagat Idzip ugu rima umpur i Isak 10 da ini da Abraham, “Wawat sagat gum araga da narunggan rai. I arangan narunggan anungꞌ uda u nanggam marafain u, i u nam bunumpam santan ani nasu dzi narunggangꞌ Isak nanggan.”

11 Sara nan gan nidan inang Abraham wangun ibarabin nidzun angu, i Ismail igi arangan narunggan impruꞌ ibinigi. 12 Da bitsintaꞌ Anutu ini da Abraham ini binaꞌ, “Wangum anungꞌ barabinda yusan i narunggam Ismail da rinanggan Hagar, u sagat gumam, u. Watsungꞌ Sara nan gan da wanang nabinigi, i mingꞌa Isak da u tafam rusam yanginggan taptap bungꞌ awaꞌ nautus i ruan nabi dzi nidan. 13 Da dzi bungꞌ autus i sagat gum narunggan tafan rusan nasu garam utup tsiraꞌ bingan nabinigi, i arangan u narunggam.”

14 Da tataꞌ maratait, Abraham yuriꞌ da iyu nam gadan da apu rini gangan ranguda mpui gin sib da yantungꞌ iyab Hagar sias. Da itangin narunggan ifan da Hagar da iwat ribarangan rai. Ibinigi da Hagar ifan da iyung nam manaꞌ dadauntan Birsiba ifan. 15 Gubuꞌ mpui ntsupan da arangan ifa tangin mamaꞌ igi rai imingꞌ gai isiꞌ mangan marayaung gan. 16 Da ifampa ruguntiꞌ pas i mamaꞌ igi, da ini da runggan, “Dzi wani tsanganda mamaꞌ igi mampan u.” Hagar impai da irang igampun ruan tsiraꞌ bingan.

17 Anutu iringantin i mamaꞌ rangan da Anutu angira gan inuꞌ Hagar imingꞌ gunungun ini binaꞌ, “Hagar! Ibianungꞌ? Agu anungꞌ ratan u. Anutu iringant i mamaꞌ rangan aga sib. 18 Wauriꞌ wafan da wagif mamaꞌ aga bangin da waraꞌ gin wayab, i dzi bungꞌ anang i gan yanginggan nawaꞌ nasu garam utup tsiraꞌ mangan.” 19 Da Anutu inang Hagar maran intap ruan da itsangan mpui rafan mangan rumingꞌan. Da arangan ifa rangu i apu rini gangan da iyu iba rim da mamaꞌ igi inum.

20-21 Anutu impa tayangꞌ mamaꞌ igi isangꞌ arangan suda garam tsiraꞌ. Arangan impa nam dadauntan Paran da isu garam bangi tatiꞌ nidzun i dampa. Impai nigi da gan rinanggan iyu sagat Idzip mangan da arangan isu i fininggan.

22 Gubuꞌ mangan da Abimelek (garam Gerar king gan ugu) da Fikol, garaman singaari gudzunggan, ifa tsanga Abraham da ini rutin, “Dzi tsanga Anutu irut agu i nam santan u nangan. 23 Ibinigi da mingꞌa Anutu maranggan da wani nan nidzun da dzi i agu anungꞌ tipa suda umpur da dzi ma dzi narungꞌ rusangꞌ ma dzi tafangꞌ rusangꞌ u. Wasantingꞌ maraampi aru dzi nangan da agu ugu da dzi, nampruꞌ da garam gar intap aru u bampada suda garam marawampua gin ani.”

24 Da Abraham ini, “Hai. Dzi ni nan nidzun bingan da agu imingꞌ Anutu maranggan.”

25 Da Abraham isantingꞌ wangunggan barabindan wasi da Abimelek iyab i mpui gan rafan Abimelek garam guman suda wain gin da paꞌa arangan garam guman gin. 26 Da bitsintaꞌ Abimelek ini, “Dzi wasruꞌgin i manga nang uwayant bida nigi. Aruani da u bungꞌ ini da dzi da nan igi isu faꞌ da dzi.”

27 Da Abraham iyu dumpa da makau fain da irim da Abimelek da rib iruꞌ igi yudzu nan gan. 28 Abraham itsaf dumpa naru faꞌ rinan 7 da irim imingꞌ Abimelek maran 29 da Abimelek igut i Abraham ini binaꞌ, “Dumpa naru faꞌ rinan 7 ani wainggan ibianungꞌ?”

30 Da Abraham ini arangan nan gan mungaꞌ ibiani, “Wau dzi dumpa gangꞌ naru faꞌ 7 ani nayab i santingꞌan bida dzi raf mpui gangꞌ ani.”

31 Ibinigi da ifaringꞌ gamp igi binganggan Birsiba (wainggan ibi ‘mpui udzuda nan gin’*binganggan Birsiba (wainggan ibi ‘mpui udzuda nan gin’) — Bingan Birsiba wainggan mangan ibi ‘mpui faringꞌa nida 7’.), i rib iruꞌ impruꞌ ruan yudzu nan gan.

32 Gubuꞌ nan udzudan da ruan mingꞌa Birsiba ntsupa sib, Abimelek da gan garam gudzunggan singaari Fikol, itip ifa gan gampan imingꞌ intap Filistia. 33 Abraham intang gai mangan nida tamaris gin imingꞌ Birsiba da iyugin da nifun itsaf Yawe, Anutu Mpada Ratar Ntingan Angu. 34 Da Abraham impa intap Filistia gubuꞌ guntiꞌ bingan isu garam marawampua.