1 “Agam wangum anungꞌ barabindan da maram fura nam ampi bingan u! Wamuaruts Anutu da wamuaruts dzi nampruꞌ. 2 Mumai ampi bingan imingꞌ wasaꞌ i Ramangꞌ ungaran, da dzi bungꞌ afa i tipa agam mumai gam. Da bida maꞌan da dzi wasangꞌ nida nan igi wasi da agam. 3 Da gubuꞌ dzi fatipa agam mumai gam sib da dzi bungꞌ atip aba i uda agam, i gamp dzi mpada gin da agam bungꞌ ampa gin nampruꞌ. 4 Da agam isruꞌ i sanab fada gamp dzi fada gin igi sib wa.”

5 Tomas ini da Yisu ibiani, “Nifutsarif, aga uwayantangꞌ mangan wapuꞌ i gamp agu fada gin igi u. Da aga nabusruꞌ i sanab fadan igi nabianungꞌ?”

6 Yisu ini binaꞌ, “Dzi su sanab da nan nidzun da maran taꞌan wain. Garam mangan wasangꞌ badan da Ramangꞌ i sanab mangan u, imaꞌ, i dzi angu. 7 Bida agam sruꞌa i dzi nidzun angu, da agam bungꞌ asruꞌ i Ramangꞌ nabinigi. Aruani da fadan da agam isruꞌ i Arangan da itsanga Arangan sib.”

8 Filip ini da Arangan, “Nifutsarif, wasantingꞌ Ramanggam da agai, da nigi bungꞌ asangꞌ aga wangunggangꞌ.”

9 Yisu ini Filip nifunggan mungaꞌ ini binaꞌ, “Filip, dzi rut agam impa gubuꞌ guntiꞌ bingan sib wa, da ibianungꞌ da agu madabusruꞌ i dzi? Manga tsanganda dzi da itsanga Ramangꞌ. Da ibianungꞌ da u ni, ‘Wasantingꞌ Ramanggam da agai?’ 10 U sangꞌ muarutsa bida dzi mpa Ramangꞌ wasaꞌ da Ramangꞌ impa dzi wasaꞌ, ma? Nan santan dzi nidan da agam igi anungꞌ dzi runggangꞌ nan gangꞌ u, imaꞌ; Ramangꞌ aru mpada dzi wasaꞌ runggan inang gan guman igi. 11 Agam wamuaruts nan aru dzi nida bida, ‘Dzi impa Ramangꞌ wasaꞌ da Ramangꞌ impa dzi wasaꞌ.’ Da bida maꞌan, da wamuaruts dzi i gum dzi nangan da waꞌa sib ugu. 12 Nan nidzun bingan dzi nani da agam! Nugu muarutsa dzi da bungꞌ anang nam dzi nangan. Da arangan bungꞌ anang nam tsiraꞌ nayus nam dzi nangan igi, i wain ibi dzi nang i fadan da Ramangꞌ. 13 Da dzi bungꞌ anang nam idzuwai agam guta gin i dzi binganggangꞌ, da Ramangꞌ bungꞌ au bingan tsiraꞌ i Narun. 14 Bida agam guta dzi i nam idzuwai i dzi binganggangꞌ, da dzi bungꞌ anang.

15 “Bida agam maram arida i dzi da agam bungꞌ atangꞌ warangꞌ i nan dzi nidan. 16 Da dzi bungꞌ agut i Ramangꞌ da natangin Mangan aru rima agam sib naba da bungꞌ arut agam nanting. 17 Nigi Marapayam santingꞌa nan nidzun wasi. Garam intap wasangꞌ uda Arangan yaban u, i ribigi wararab da isruꞌ i Arangan u. Da bitsintaꞌ agam isruꞌ i Arangan sib, i Arangan irut agam impai da bungꞌ ampa wasaꞌ i agam. 18 Dzi wasangꞌ tirida agam rai bida mamaꞌ marabirimpup u; dzi bungꞌ atip aba da agam. 19 Gubuꞌ uts pas angu da garam intap wasangꞌ i tipa tsanganda dzi, da bitsintaꞌ agam bungꞌ atsanga dzi. Dzi impa marataꞌ, da agam bungꞌ ampa marataꞌ nabinigi. 20 Waꞌa gubuꞌ arigi da agam bungꞌ atsangan nabi dzi mpa wasaꞌ i Ramangꞌ da agam impa wasaꞌ i dzi da dzi mpa wasaꞌ i agam. 21 Manga ringanta i dzi nan gangꞌ da atangꞌa warangꞌ gin, da arangan isu garam maran arida i dzi. Manga maran arida i dzi, da Ramangꞌ maran bungꞌ ari i arangan, da dzi binigi dzi marangꞌ bungꞌ ari i arangan nampruꞌ da dzi nasantingꞌ runggangꞌ wasi da arangan.”

22 Garam bits binganggan Yudas (anungꞌ Yudas Iskariot u) igutin ini binaꞌ, “Nifutsarif, ibianungꞌ da u ni santingꞌa runggam wasi da agai angu da anungꞌ garam intap santan aga u?”

23 Yisu ini binaꞌ, “Bida manga maran arida i dzi, da arangan bungꞌ atangꞌ warangꞌ i dzi nan gangꞌ. Da dzi Ramanggangꞌ maran bungꞌ ari i arangan, da aga bungꞌ aba da narut arangan nampai nanting. 24 Garam maran mamida arida i dzi, da anungꞌ isangꞌ i atangꞌa warangꞌ i dzi nan gangꞌ u. Nan agam ringanta gin igi anungꞌ dzi runggangꞌ nan gangꞌ u; nigi Ramangꞌ aru tanginda dzi badan ugu nan gan.

25 “Gubuꞌ aru dzi rungꞌ ruta agam mpadan ani, da dzi ragi nan ani da agam. 26 Da bitsintaꞌ Ramangꞌ bungꞌ atangin Marapayam Mararam aru rima agam sib naba i dzi binganggangꞌ. Da Arangan bungꞌ asantingꞌ agam i nam santan da narim maran furan da agam i nan santan dzi nidan da agam sib ugu. 27 Dzi tangin nan gangꞌ nufan narut agam da nampa tayangꞌ agam wangunggam. Dzi nan gangꞌ nufan tangindan da agam anungꞌ ibi garam intap gan riman u. Ibinigi da agam wangum anungꞌ barabindan da ratan u. 28 Agam iringant i nan dzi nidan ugu sib wa, ‘Dzi bungꞌ afa sinungꞌ agam da dzi bungꞌ atip aba da agam.’ Bida agam maram arida i dzi, da agam nugum bungꞌ atsiaꞌ i dzi gangꞌ fadan da Ramangꞌ, i Ramangꞌ binganggan tsiraꞌ iyus dzi. 29 Nan ani dzi ni mungꞌ da agam da aruani, da bungꞌ amus waꞌan. I gubuꞌ nam igi waꞌan, da agam bungꞌ amuaruts. 30 Dzi wasangꞌ i rungꞌ fisa i nan ampi bingan da agam u. I garam gudzun intap ani gan iba. Arangan nampanggan imaꞌ i rasuda dzi, 31 da bitsintaꞌ garam intap nararab nabi dzi marangꞌ yari nidzun angu i Ramangꞌ da dzi mus inang nam isangꞌ Ramangꞌ nidan da dzi.

“Ariꞌ, agam wauriꞌ da agi nafan.”