1 “Dzi bruꞌ wain nidzun bingan, da dzi Ramanggangꞌ isu garam mpada tayangꞌ gum. 2 Da bangin narun narun mingꞌa wasaꞌ i dzi mamida kapa nidzun, da Arangan irab rai. Da bangin kapa nidzun, da Arangan inang da itrap da idzuwar in i nanga bangin igi kapa yusan. 3 Da nan dzi nidan da agam ugu inang agam isap sib ibi bruꞌ bangin garam dzuwara gin. 4 Agam wantungꞌ ba i dzi da dzi nantungꞌ biaꞌ i agamYwn 6:56; 10:38; 14:10,11,17,20; 15:5-7; 17:21,23,26. Bida bruꞌ bangin mamida antungꞌa ba i bruꞌ wain, da anungꞌ isangꞌ kapa nidzun. Ibinigi angu i agam mamida antungꞌa ba i dzi da rumpada wasaꞌ i dzi, da agam wasangꞌ i kapa nidzun mangan u.

5 “Dzi bruꞌ wain, da agam isu bruꞌ wain bangin. Manga antungꞌa ba i dzi da dzi antungꞌa biaꞌ i arangan, da bungꞌ akap nidzun ampi bingan. Da bida agam tirida dzi rai, da agam wasangꞌ nanga nam mangan u. 6 Bida garam mangan mamida antungꞌa ba i dzi, da iwaꞌ ibi bruꞌ bangin maringꞌan garam sirida mpruꞌan da tapuda fada dzaf. 7 Bida agam antungꞌa ba i dzi da dzi nan gangꞌ mingꞌa wasaꞌ i agam, da bida agam maram arida i nam idzuwai da wagutin, da Ramangꞌ bungꞌ anang nawaꞌ da agam. 8 Bida agam kapa nidzun ampi bingan, da bungꞌ asantingꞌ abi agam rib atsungꞌa i dzi. Da sanab bida nigi bungꞌ arim bingan tsiraꞌ da dzi Ramanggangꞌ.

9 “Ibi Ramangꞌ maran arida i dzi, da dzi marangꞌ yari i agam ibinigi. Gubuꞌ sib angu da agam wampa dzi marangꞌ aridagin wasaꞌ. 10 Bida agam atangꞌa warangꞌ i dzi nan gangꞌ, da agam bungꞌ ampa dzi nanggangꞌ marangꞌ aridagin wasaꞌ, nabi dzi yatangꞌ warangꞌ i Ramangꞌ nan gan da dzi mpa arangan nanggan maran aridagin wasaꞌ. 11 Dzi ni nan igi da agam i dzi nanggangꞌ nugungꞌ tsiaꞌan uriꞌa mingꞌa agam wangum da sisungꞌa agam wangunggam yusan angu. 12 Dzi nan gangꞌ faidagin ibiani: Maram wari i ruam nabi dzi marangꞌ yari i agam. 13 Bida garam rima runggan rai i rima rinun rusan sib, da nam maran aridan bida nigi iyus nam maran aridan santan. 14 Agam isu dzi rinungꞌ rusangꞌ bida agam atsungꞌa dzi nan gangꞌ faidagin. 15 Dzi anungꞌ rungꞌ ifaringꞌ agam ibi mamaꞌ gum utaꞌ angu u, i mamaꞌ gum utaꞌ anungꞌ isruꞌ i gan garaman tsiraꞌ guman nangan u. Dzi faringꞌ agam ibi dzi rinungꞌ rusangꞌ, i nan santan dzi ringantagin mingꞌa Ramangꞌ gin ugu, dzi ni wasi da agam sib wa. 16 Agam waraga dzi u, imaꞌ! Dzi raga agam, da dzi rim gum da agam i fadan da kapa nidzun da nidzun igi mingꞌa ratar. Agam nanga bida nigi da nam idzuwai agam guta gin i dzi binganggangꞌ, da Ramangꞌ bungꞌ arim da agam.Ywn 16:23 17 Da dzi nan gangꞌ faidagin ibiani: Maram wari i ruam.

18 “Bida garam intap rima ipiap i agam da maram wafur i ribigi irim ipiap i dzi isu miamun mungꞌ. 19 Bida agam suda garam intap ani gan, da maran bungꞌ ari i agam da nau agam nayab nasu i gan. Da bitsintaꞌ agam anungꞌ isu i gan u; dzi runggangꞌ iraga agam iwaꞌ ba sinungꞌ ribigi. Ibinigi da ribigi irim ipiap i agam. 20 Maram wafur nan dzi nidan da agam ugu: ‘Mamaꞌ gum anungꞌ yusa gan garaman tsiraꞌ u.’ Bida ribarangan nanga maisan i dzi da bungꞌ anang maisan i agam nabinigi. Da bida atangꞌa warangꞌ i dzi nan gangꞌ fisagin da bungꞌ atangꞌ warangꞌ i agamam nabinigi.Mt 10:24-25; Lk 6:40; Ywn 13:16 21 Bungꞌ anang nam maisan igi i agam, i wain agam isu dzi gangꞌ. I ribigi anungꞌ isruꞌ i Ramangꞌ aru tanginda dzi badan ugu u. 22 Bida dzi damami badan da ragida Ramangꞌ sisingꞌ gan wasi, da ribigi wasangꞌ i mpada warangꞌ i nam raruda i nanggan maisan u. Da bitsintaꞌ dzi ba da dzi ragi Ramangꞌ sisingꞌ gan sib da ribigi wa, da ribarangan wasangꞌ i nida nan mangan da gubuꞌ Anutu raruda ribarangan u. 23 Garam rima ipiap i dzi da irim ipiap i dzi Ramanggangꞌ ibinigi. 24 Bida dzi damami nanga nam maran mangan garam mamida i nanga mungꞌ, da ribigi wasangꞌ i mpada warangꞌ i nam raruda i nanggan maisan u. Da bitsintaꞌ ribigi itsangan nam dzi nangan sib wa, da irim ipiap i dzi da Ramangꞌ ibinigi. 25 Da bitsintaꞌ nam igi iwaꞌ isu nidzun isangꞌ nan kakaran mingꞌa ribigi Nan Gan Faidagin: ‘Ribarangan irim ipiap i dzi utaꞌ angu ruta wainggan maꞌan.’ 26 Marapayam aru rima agam sib igi irut Ramangꞌ impai, da dzi bungꞌ atangin nabiaꞌ da agam. Arangan Marapayam santingꞌa nan nidzun wasi. Da gubuꞌ Arangan badan, da bungꞌ ani dzi wasi. 27 Da agam ibinigi, wani dzi wasi nabinigi i agam irut dzi impruꞌ ruangꞌ yungan da arugu iba isangꞌ waꞌan da aruani.