1 Dzi Paulus, Anutu mamaꞌ guman da Yisus Kristus aposelan.*aposelan— Nan ‘aposel’ wainggan ibiani: ‘garam tanginda fadan’. Itangin dzi ifa i rima Anutu ampanggan runggan piriangꞌan igi sib i nanga i nanggan muarutsan babampafan da utusa ribarangan i sruꞌa i nan nidzun da atsungꞌa Anutu sanaban rururungan. 2 Da ribarangan narim maran i nam mpada ratar ntingan Anutu ragadan da miamun bingan ugu, gubuꞌ Arangan mamida i tanginda nam santan, i Anutu anungꞌ inang da isu umpur u. 3 Da gubuꞌ gan ragadan rururungan, da Anutu, aru rima agi sib, ikupis nan gan igi wasi imingꞌ gum fisa i nan Arangan riman da faida nan i dzi nangan.

4 Dzi yakar nan ani ibiaꞌ da agu Taitus, dzi narunggangꞌ nidzun yaba i agi nanggangꞌ muarutsan.

Ramangꞌ Anutu da Yisus Kristus, Garam rima agi sib, maraampi gan da nan gan nufan narut agu.

5 Dzi tangin agu rai i intap Krit i wain ibiani, u tipa gum agi mamida i ntsupan ugu da ragada garam gudzun ruas mingꞌa gamp igi santan bida dzi nidan da agu ugu. 6 Da u nida ragada garam gudzun bits bits igi, da ampan anungꞌ tsanganda asub mingꞌan da arangan u: maran nari i fininggan arigi angu, da gan narun rusan namuaruts da natangꞌ warangꞌ i nan da bingan namaꞌ i nam maisan. 7 I wain, garam gudzun igi isu wain i mpada tayangꞌ Anutu guman da garam muarutsan gan, ibinigi da ampan anungꞌ tsanganda asub mangan mingꞌa da arangan u: anungꞌ garam tsarifa runggan i rib atsungꞌa gin, ma wangun yaba sung sung, ma numa mpui ngkiangan yusan, ma suda gudzu uris, ma iyuꞌa nam i uda nam bunump ampi bingan u. 8 Da bitsintaꞌ arangan nasu garam isa yaring i garam, da maran arida i sanab bini, da uwayantan nawaꞌ bini i mpada tayangꞌ runggan i nanggan santan nangan, da atsungꞌa sanab mararam da rururungan, da mpada tayangꞌ wangunggan da tipa banginggan da faganggan bini. 9 Da arangan namuaruts sisingꞌ bini aru ringanta gin sib ugu babampafan, i nan igi nan nidzun bingan. Da bida nanga bida nigi, da arangan bungꞌ asangꞌ i santingꞌan da utusa ampan i nan nidzun, da raruda garam rima ub i sisingꞌ bini igi.

10 I garam ampi bingan mamida i atangꞌa warangꞌ i nan rumpai. Garam igi garam nida nan umpur nidzun maꞌan da iyuꞌa nam. Da utup aru nida nan babampafan i garam santan safa rinin igi imais iyus rib santan arigi. 11 Wani da ribarangan nantsup i nan bida nigi, i ribarangan ifis i nan umpur da irintsum utup fain nanggan muarutsan i uda nam bunump in. 12 Mungꞌ ugu da rib Krit garaman mararuru mangan runggan ini biani, “Garam Krit garam iyuꞌa nam, da garam bida apu buman maisan, da garam gada nam funub angu da guman nangan maꞌan.” 13 Nan igi nan nidzun. Ibinigi da wani nan rini urun da rib igi da wasantingꞌ i nanggan maisan rutin, da ribarangan namuaruts Anutu nan nidzun gan 14 da anungꞌ ringanta i rib Yuda rabu rabun gan mungꞌ ugu nan umpur umpuran fisa gin, ma nan faidagin waꞌa mingꞌa garam gar aru rima barun da nan nidzun u. 15 Rib wangun sapan mingꞌa Anutu maranggan, da nam mangan — bida nam gadan mara maran fain — wasangꞌ i nanga ribarangan bubumpuadan u. Da bitsintaꞌ rib wangun bubumpuadan da mamida i muarutsa Yisu, da nam mangan wasangꞌ i nanga ribarangan sapan u. Imaꞌ, uwayantan ibubumpua da wasruꞌ i sanab bini da maisan u. 16 Ribarangan ini isruꞌ i Anutu, da bitsintaꞌ gan sanaban isantingꞌ ibi irim barun da Arangan. Gan sanaban imais wasi imingꞌ Anutu maranggan, da watangꞌ warangꞌ i nan gan, da wasangꞌ i nanga nam bini mangan u.