رِسَالِةْ بُولِسْ لْفِلِيمُونْ
الرّسالة هاذي تكتبت عام 60 بعد الميلاد. فيلمون كان مسيحي معروف وعندو عبد إسمو أونسيموس. العبد هاذا هرب من سيدو، وتقابل مع بولس، الّي كان في الحبس. أونسيموس ولّى مسيحي على طريق بولس. بولس في الرّسالة هاذي يطلب من فيلمون باش يتصالح مع العبد متاعو الّي رجّعهولو، ويفرح بيه موش كيف عبد سامحو آما كيف خو مسيحي.
1
تَحِيَّة
مِنْ بُولُسْ، المَرْبُوطْ فِي الحَبْسْ عْلَى خَاطِرْ المَسِيحْ يَسُوعْ وْمِالأَخْ تِيمُوثَاوُسْ لْفِلِيمُونْ المَحْبُوبْ وِشْرِيكْنَا فِي الخِدْمَة وِلْأُخْتْنَا أَبْفِيَّة وْأَرْخِبُّوسْ الِّي يْجَاهِدْ مْعَانَا وْلِلكَنِيسَة الِّي فِي دَارِكْ. نِعْمَة وْسَلاَمْ لِيكُمْ مِنْ عِنْدْ اللهْ بُونَا وِالرَّبْ يَسُوعْ المَسِيحْ.
مْحَبِّةْ فِلِيمُونْ وْإِيمَانُو
آنَا دِيمَا نُشْكُرْ اللهْ فِي كُلْ مَرَّة نِتْذَكّْرِكْ فِي صْلاَتِي عَلِّي سْمَعْتُو عْلَى مْحَبّْتِكْ لِلقِدِّيسِينْ الكُلْ وْإِيمَانِكْ بِالرَّبْ يَسُوعْ. بَاشْ الإِيمَانْ الِّي تَحْكِي عْلِيهْ لِلأُخْرِينْ يْكُونْ قَادِرْ عْلَى إِنُّو يْظَهِّرْ الحَاجَاتْ البَاهْيَة الكُلْ الِّي عِنْدْنَا عْلَى خَاطِرْ المَسِيحْ. عْلَى خَاطْرِكْ فَرَّحْتْنِي وْشَجِّعْتْنِي بَرْشَة بِمْحَبّْتِكْ. يَا خُويَا رَاكْ عَزِّيتْ قْلُوبْ القِدِّيسِينْ.
بُولُسْ يِدَّخِّلْ لْأُونُسِيمُوسْ
رَغْمِلِّي عِنْدِي ثِيقَة فِي المَسِيحْ إِنِّي انَّجِّمْ نُأْمْرِكْ بَاشْ تَعْمِلْ الشَّيْء الِّي يِلْزِمْ آنَا نُطْلُبْ مِنِّكْ بْإِسْمْ المْحَبَّة وِبْصِيفْتِي آنَا بُولُسْ رَاجِلْ كْبِيرْ وْمَرْبُوطْ فِي الحَبْسْ عْلَى خَاطِرْ يَسُوعْ المَسِيحْ 10 نْأَكِّدْ عْلِيكْ فِيمَا يْخُصْ وِلْدِي أُونُسِيمُوسْ الِّي وَلَّى وِلْدِي وْآنَا مَرْبُوطْ بِالسْلاَسِلْ 11 الِّي قْبَلْ مَا كَانِتْشْ فِيهْ فَايْدَة لِيكْ. آمَا تَوَّا وَلاَّتْ فِيهْ فَايْدَة لِيكْ وْلِيَّ. 12 آنَا بْعَثْتْهُولِكْ وْهُوَ رَاهُو قَلْبِي. 13 وْآنَا حَبِّيتْ تْخَلِّيهْ بِحْذَايَا بَاشْ يِخْدِمْنِي فِي عُوضِكْ وْآنَا مَرْبُوطْ عْلَى خَاطِرْ الإِنْجِيلْ 14 آمَا مَا حَبِّيتِشْ نَعْمِلْ حَتَّى شَيْء مِنْ غِيرْ مَا نَاخُذْ رَايِكْ بَاشْ تَعْمِلْ البَاهِي بْإِرَادْتِكْ مُوشْ عْلَى خَاطْرُو وَاجِبْ عْلِيكْ 15 مُمْكِنْ هَاذَاكَا عْلاَشْ بْعِدْ عْلِيكْ مُدَّة قْصِيرَة بَاشْ يَرْجِعْلِكْ عْلَى طُولْ. 16 مُوشْ كِيمَا عَبْدْ آمَا خِيرْ مِنْ عَبْدْ. كِيفْ خُو مَحْبُوبْ. بِالأَخَصْ عِنْدِي آنَا فَمَا بَالِكْ عِنْدِكْ إِنْتِ. فِي الدِّنْيَا وْفِي الرَّبْ. 17 إِذَا كُنْتْ تِحْسِبْنِي شْرِيكِكْ إِقْبْلُو كِيمَا تِقْبِلْنِي آنَا. 18 وْإِذَا كَانْ عْمَلِّكْ حَاجَة خَايْبَة وِلاَّ مَدْيُونْ لِيكْ بْحَاجَة إِحْسِبْهَا دِينْ عْلِيَّ آنَا 19 وْآنَا بُولُسْ نِكْتِبْلِكْ بْخَطْ يِدِّي: آنَا نْخَلّْصِكْ. وْمُوشْ لاَزِمْ نْذَكّْرِكْ الِّي إِنْتِ مَدْيُونْ لِيَّا بِحْيَاتِكْ 20 هَاذَاكَا عْلاَشْ يَا خُويَا نُطْلُبْ مِنِّكْ بَاشْ تَعْمِلْ عْلِيَّ مْزِيَّهْ وِتْرَتِّحْ قَلْبِي فِي المَسِيحْ.
21 كْتِبْتْلِكْ الجْوَابْ هَاذَا وْآنَا وَاثِقْ الِّي إِنْتِ اطِّيعْنِي وْعَارِفْ الِّي إِنْتِ بَاشْ تَعْمِلْ أَكْثِرْ مِلِّي نُطْلْبُو مِنِّكْ. 22 وْمَا ذَابِيَّ تْحَضَّرْلِي بِيتْ وْنِتْمَنَّى إِنِّي نَرْجْعِلْكُمْ بِسْبَبْ صَلَوَاتْكُمْ.
تَحِيَّة إِخْرَانِيَّة
23 يْسَلِّمْ عْلِيكُمْ أَبَفْرَاسْ المَرْبُوطْ مْعَايَ فِي الحَبْسْ عْلَى خَاطِرْ المَسِيحْ يَسُوعْ. 24 وْمَرْقُسْ وْأَرِسْتَرْخُسْ وْدِيمَاسْ وْلُوقَا الِّي هُومَا مْعَايَ فِي الخِدْمَة 25 وْنِعْمِةْ رَبّْنَا يَسُوعْ المَسِيحْ مْعَاكُمْ.