1 Ngal neema eeq eeq-ail gaoq ya ge nail ngaol. Niailhai ge nail neq, ganl maq tsoiq khi ngaol-aoq, Yeiqsul-i mail phaodaiq lavq-a nail juq khi aqhaqlal nail lavqkhoel bhai ya moel-a nail ganl juq nuljuq bhai ge lavq bhel dei-eiq. 2 Jel lal-a nail tsel liq kovq bhai, nqtavq hail teiv-nvq bhai kev dai, tsiq dal laivq nail bhai yaq daq-a nail Khali yaq teevq gaq bhai, ngal heeq kivq nail ngaol. Aqmaol dav lai thaq-al meeq. Aqhaqlal dav lai thaq-al meeq. Miqyail taivq-ail heeq nia nail ngaol. 3-4 Tsaol-aq al gaq Bhaqlaqdilsuv dai khul nail gaoqkhail bhai tsiq dal laivq nail bhai ya daq-a nail ngaol dai, ngal heeq kivq nail ngaol. A bhai, tsaol-aq yaq-i mail maq ge daiq bhiq kivq nail phaq khi maq ge dov tseq nail phaq bhai tsaol-aq al gaq ya gaiq-a nail ngaol. Aivq neq, aqmaol dav lai thaq-al meeq. Aqhaqlal dav lai thaq-al meeq. Miqyail taivq-ail heeq nia nail ngaol. 5 Ngal tsaol-aq al gaq nail ganl neema eeq eeq-ail ge la dei-eiq. Thailhai ngaol-aoq, ngal gaq bhaq nail juq nail ganl maq ngel nail neq, ngaq nail ganl neema eeq eeq-ail khul teevq phaq-ail maq ge-ail. 6 Ngal neema eeq eeq-ail ge movq khi ngaol-aoq, ngal yaqjaoq khaqlal miqthoi maq ngel-ail. Khul khi mail dai ngal-aq neq, ngal maldil tsaq nail phaq bhai ge nail ngaol. Thailhai ngaol-aoq, ngaq-i mail nl nail hal nail juq bhai yu moel khi, ngaq-i mail ge nail thail nail juq bhai ya gaiq-a nail, niil nvq phaq maq ngel nail neq, tsaol-aq teevq gaq-ail ngaq nail ganl maq ya saol-nvq dai, ngaq nail ganl ngal neema eeq eeq-ail khul teevq phaq-ail maq ge-ail.

7 Mao-ail eeq mao-ail heel nail juq phaodaiq lavq-a nail bhaqda nee, ngaq nail neema bhai ngal maq ya thaqeeq dai, aqsivq haqjoil phao ngaq bhai khaoltsoe coev lavq nail khe-ai dul nail ngaol. Khaoltsoe al neq, neivq Saqdaq nail gaqkhoel pevq khi, ngaq nail neema bhai ngal maq ya thaqeeq dai, ngaq bhai khoeq lavq jiovq lavq-a nail ngaol. 8 “Khaoltsoe niil he dov lavq yaoq” dai, hail pov bhee dai, ngal Yeiqsul bhai hal-a nail ngaol. 9 Thailhai ngaol-aoq aivq ge nail: “Ngaq nail geeqlaoq eeljaol naoq nail haqbhoil lovq nail ngaol. Gaq bhaq nail dao bhai ngaq nail bhaqaoq bhee lal nail ngaol” dai, ge lavq-a nail ngaol. Alheel ngel-i mail, Khali nail bhaqaoq ngaq bhai khaq mao iqsanl uvthaiq lavq dai, ngal gaq bhaq nail ganl juq bhai neema eeq eeq-ail lavqkhiq teevq tsail, ge movq-ail nial. 10 Alheel ngel-i mail, Khali nail haqbhoil ya daq nail juq bhai ngal lavqkhiq teevq tsail daq nail ngaol. Ngaq-i mail ya daq thailthaiq nail juq neq, gaq bhaq nail, khal ge movq-ail ge lal nail, haq nail aoq nail, khoeq lavq jiovq lavq nail khi, mao-ail suqsaq nail, niil juq ngaol. Khul khi mail dai ngal-aq neq, ngal gaq bhaq thailthaiq-u phao, ngal gaq kav thailthaiq nail ngaol.

11 Ngal yaqjaoq khaqlal miqthoi pevq lal-a nail ngaol. Nuljuq ngaq bhai niailhai bhi pevq lal-a nail ngaol. Nuljuq ngaq bhai tsiqeeq nail tsaq nail ngaol. Ngal neq, khul teevq phaq-ail maq nl dov nail tsaol-aq pevq khi ngaol-aoq, eeq nail heel nail gaqkhoel al juq nail pul-nvq bhai teevq peivq-ail maq jaol-ail. 12 Nuljuq ngaq bhai maldil gaqkhoel nial dai, ya heeq nia dai, ngal nl daiq bhiq-a nail ngaol. Bhi heeq bhi moel nail phaq maqkhaiq, noeq-u maq dov nail phaq maqkhaiq, bhaqaoq eeq nail juq maqkhaiq, ngal ol ol-ail, nuljuq bhai nl daiq bhiq-a nail ngaol. 13 Phul heel tsaojao-ai lavq yaoq dai, nuljuq bhai ngal maq hal-a nail al teevq phaq maq ngel nail neq, Khali yaq yaoq juq yaoq bhai ngal thaqeeq khi nuljuq bhai maq thaqeeq nail, khul phaq jiav nail-aiq. Thailhai ngaol-aoq, ngaq nail laiq nail al phaq bhai khalhai khi ngaol-aoq, oeqbal teevq pov phaiq lavq yaoq dai, hal nail ngaol.

14 Hail pov teevq pov nuljuq jaol nail bha lee naol dai, niil aq-il iqsanl, ngal lainq-ai thaq nail ngaol. Niil thal khe pov iqsanl, nuljuq ngaq bhai maq ya tsaojao-ai lavq-ail. Khul khi mail dai ngal-aq neq, nuljuq nail phul heel bhai ngal oil movq nail maq ngel-ail. Nuljuq bhai taivq-ail ngal oil movq-ail nial. Yaq juq neq, aqbhu aqma nail haqbhoil phul heel ya halpov jil-ai nail maq ngel-ail. Aqbhu aqma juq yaq juq nail haqbhoil ya halpov jil thaq-ai nail ngaol. 15 Ngal khal jiav nail phaq iqsanl khi mail ngaq nail aqmaol iqsanl mail nuljuq bhai tsaojao-ai nail haqbhoil lavqkhiq teevq tsail danq-a nail ngaol. Ngal nuljuq bhai gaiq-a deedee nail ngel-i mail, nuljuq ngaq bhai micil taivq-ail gaiq-a lavq nail laiq. 16 Ngal nuljuq bhai yalgaq aqphoiq maq hal khi ngaol-aoq, “Paolluv nvjuq bhai jalmul mul ya-a nail ngaol” dai, nuljuq ge nail ngaol. 17 Ngal tsaol-aq teevq gaq ganav bhai nuljuq jaol nail bha khoel-ai leevq khoel-ai leevq-ail, nuljuq nail phul heel bhai goiqbhaoq bhaoq jaq-a nail laiq. 18 “Aqyu juq jaol nail bha ail yaoq” dai, ngal Tiltuv bhai hal khi, aqivq jaqbheq al gaq bhai iqsanl aivq nee mail nuljuq jaol nail bha khoel-ai leevq-a nail ngaol. Tiltuv nuljuq nail phul heel bhai goiqbhaoq bhaoq jaq-a nail laiq. Nv-nvq gaq neema teevq heeq taivq-ail tavq khi ganl nl thailthaiq nail, maq ngel-ail laiq. Nv-nvq gaq gailkhaol teevq khaol bhai taivq-ail tsao nail, maq ngel-ail laiq.

19 Nvjuq nuljuq nail sivtavq bhai nvjuq nail ganl ge kovq nail dai taivq-ail, nuljuq noeq thailthaiq-ai haq nail laiq. Maq ngel-ail dei-eiq. Nvjuq Khali yaq pevq nail khe-ai, Miqyail nail sivtavq-ai nuljuq bhai ge bhiq thailthaiq nail ngaol. Ngal mao-ail gaiq-a nail aqtsaoq juq-ol, niil juq iqsanl mail nvjuq nl-a nail neq, nuljuq bhai bhi eeq bhi heel lal nail dai khi, nl-a nail ngaol. 20 Ngal nuljuq jaol nail bha kovq lal-u phao, ngaq-i mail noeqthunq-ai thaq nail khe-ai, nuljuq maq pevq lal-a nail nee ovqtavq, nuljuq-i mail noeqthunq-ai thaq nail khe-ai, ngal iqsanl maq pevq lal nail jaol-aq dai, khaoqlaol-ail nial. Iqdaiq iqtsai dov nail, maivjeel jeel nail, neejiav jiav nail, yovqgavq meeq lal dai taivq-ail nl nail, ge doil nail, haoqnaol phao nee khal ge movq-ail ge nail, neema eeq nail, suqsaq lal heeq phaq-ail nl nail, nuljuq niil juq nl thailthaiq nail khul-il dai, ngaq bhai khaoqlaol-ail nial. 21 Niil thal khe pov ngal nuljuq jaol nail bha kovq lal-u phao, ngaq nail Miqyail nuljuq nail sivtavq-ai ngaq bhai thaqtheq lavq nail bhai iqsanl ngaq bhai khaoqlaol-ail nial. Jel lal-u phao, maq meeq maq haol nail phaq, maq tsaq maq daol nail phaq khi mail khaqmiq sev nail phaq nl nail tsaol-aq juq niil aq-il kev dai, oeqbal maq noeq pov nail ngel-i mail, ngal ya noeqhaq deedee nail ngel-ail jaol-aq dai, khaoqlaol-ail nial.