1 Niil thal khe pov, nuljuq jaol nail bha lal nail niil neq, hail pov teevq pov ngaol. Khul khi mail dai ngal-aq neq, Jalliq lavqkhoel bhai niailhai gevq-ai thaq nail ngaol: “Khal ge nail yaoq phaq yaoq-ao nee aqduq aqtsil bhao dai, salkhil khanq nail nvq gaq hail gaq ya jaol nail ngaol” dai, gevq-ai thaq nail ngaol. 2 Ngal nuljuq jaol nail bha nvq pov teevq pov nalga lal-u phao, ge-ail ceevq-a nail khe-ai, niil aq-il nuljuq nee mail maq jaol khi ngaol-aoq, gaoq ge-ai leevq-a nail ngaol. Ngal nuljuq jaol nail bha kovq lal haq neq, jel lal-u phao, oeqbal nl nail tsaol-aq bhai maqkhaiq, yaoq juq yaoq bhai maqkhaiq, maq bhi jel-ail. 3 Khali ngaq bhai juq khi daoq ge nail ngel-ail laiq dai, nuljuq heeq kivq movq nail ngel-i mail, ngal aqyu juq bhai maq bhi jel-ail. Nuljuq nail lavqkhoel bhai Khali ganl nl nail neq, gaq bhaq nail maq ngel-ail. Bhaqaoq eeq deedee nail ngaol. 4 Khali neq, gaq bhaq nail lavqkhoel nee lavqyavq kovtavq bhai sil khi ngaol-aoq, Miqyail nail bhaqaoq bhaqda nee aivq niil aq-il aqdoevq doevq nail ngaol. Alhai dul dai, nvjuq Khali nail lavqkhoel bhai gaq bhaq khi ngaol-aoq, Miqyail nail bhaqaoq bhaqda nee, nvjuq Khali nee mail aqdoevq ya doevq nail ngaol dai, nuljuq ya moel nail ngaol.

5 “Ngal neema thaqtsaol nail phaq ivq ail laiq, maq ivq ail laiq” dai, yovqgavq bhai yovqgavq laonqdaiq yaoq. Aqmeeq-ai saol-nvq daiq yaoq. Nuljuq nail lavqkhoel Yeiqsul Khali jaol nail bhai, nuljuq maq heeq kivq-ail laiq. Maq ngel haq neq, nuljuq laonqdaiq nail phaq bhai maq khanqtsaol-ail. 6 Nvjuq neq, laonqdaiq nail phaq bhai khanq tsaol nail tsaol-aq ngaol dai, ngal nuljuq bhai bhi heeq kivq movq-ail nial. 7 Nuljuq laiq nail tsa nail phaq maq ya nl dai, nvjuq Miqyail bhai geeqlaoq hal nail ngaol. Nvjuq laonqdaiq nail phaq bhai khanqtsaol nail ngaol dai, bhi dov lal movq nail ngel-i mail, geeqlaoq hal nail maq ngel-ail. Nvjuq maq khanqtsaol nail tsaol-aq khe-ai dul khi ngaol-aoq, nuljuq aqmeeq phaq nl nia dai, nvjuq geeqlaoq hal nail ngaol. 8 Khul khi mail dai ngal-aq neq, maldil tsaq nail phaq bhai lav tsoiq dai, nvjuq khul teevq phaq-ail maq nl kivq-ail. Maldil tsaq nail phaq nail haqbhoil taivq-ail nvjuq nl kivq nail ngaol. 9 Nvjuq gaq bhaq khi ngaol-aoq, nuljuq gaq kav nail ngel-i mail, lavqkhiq tsail-ail nial. Nuljuq meeq lal bhee lal dai, nvjuq geeqlaoq hal nail ngaol. 10 Ngal nuljuq jaol nail bha kovq lal-u phao, Heeqphaq Yeiqsul ngaq bhai aqyanq bivq lavq-a nail khe-ai, mao-ail maq ya khaq dai, ngal nuljuq nee mail maq jaol-u phao, ganl niil juq ngal haoqgavq niil keiv bhai gevq bhoel-ai leevq-a nail ngaol. Aivq-i mail bivq lavq-a nail aqyanq al neq, nuljuq bhai lav cov nail haqbhoil maq ngel-ail. Nuljuq bhai bhi eeq bhiq heel lal nail haqbhoil ngaol.

11 Aqivq jaqbheq juq-ol, haoqnao naosaq khe daoq neq, niailhai ngaol. Nuljuq lavqkhiq tsail yaoq. Doevq phal yaoq. Ngaq nail hal daoq bhai iqsanl, naldaiq lavq yaoq. Neema teevq heeq bhai taivq-ail tavq yaoq. Teevq gaq nee teevq gaq tsaq lai jil lai yaoq. Alhai nl haq neq, goil nail gaiq-a nail phaq khi neesal-ovq nail phaq bivq nail Miqyail nuljuq nee mail jaol nail ngaol. 12 Nuljuq teevq gaq nee teevq gaq meeq nail haol nail lavqkhoel nee aqlavq he yaoq. Miqyail nail tsaol-aq-i mail nuljuq bhai noeq moel naol geiq dai, daoq cavq cavq bhoel-ai leevq-a nail ngaol. 13 Heeqphaq Yeiqsul Khali nail geeqlaoq eeljaol, Miqyail nail goil nail gaiq-a nail phaq khi, Meeqnail Haolnail Aqhaqlal nail lavqkhoel nee aqtsaoq tsaoq nail phaq, nuljuq iqsanl nail kovtavq bhai jiav dei-eiq.