2 Yaolhaq
Gevq-a nail gaq
Haoqgavq niil keiv neq, khaq sil gaq-i mail gevq-a nail dai, aqduq aqtsil tsil dai maq gevq-ai thaq-al. Thailhai ngaol-aoq, milnee uqnee khe Khali yaq juq Gaqkhoel Yaolhaq-i mail gevq-a nail ngaol dai, noeq nail ngaol. Khul khi mail dai ngal-aq, haoqgavq niil keiv neq, 1 Yaolhaq nail haoqgavq khi mail lavqkhiq tsail nail geeqlaoq daoq Yaolhaq nail haoqgavq khe-ai, maodai dul lai ngaol.
Gevq-a nail aqyanq khi mail aqduq
Gevq-a nail aqyanq neq, A.D. 85-95 kovq nail gaiqlaq bhai ngaol. Gevq-a nail aqduq neq, Eilpheilsu meenq bhai ngaol dai, noeq nail ngaol. Haoqgavq niil keiv neq, 1 Yaolhaq nail haoqgavq gevq gaq khi, maq maoq maq heel lal mail gevq thaq nail ngaol. Khul khi mail dai ngal-aq, gevq-a nail ganl bhai heldaiq-u phao, haoqgavq niil nvq keiv maodai dul lai nail ngaol.
Khaq sil gaq bhai gevq bhiq-a nail
Haoqgavq niil keiv neq, Yaolhaq aivq-i mail gevq-a nail dai, aqmil maq gevq bhoel-ai thaq nail nee ovqtavq, aivq khaq sil gaq bhai gevq bhiq nail dai, oil nail gaq nail aqmil iqsanl maq gevq bhoel-ai thaq-al. Thailhai ngaol-aoq, Miqyail-i mail tsel dov-ai thaq nail yaqmai-aq teevq gaq bhai khi mail, aivq nail yaq juq bhai gevq bhiq-a nail ngaol dai, gevq-ai thaq nail ngaol. Khul khi mail dai ngal-aq, yanq al yanq bhai khoeq nail jiovq nail phaq jiav nail ngel-i mail, niil gaq al gaq dai, aqmil maq bhi heeq nia dai, ya yaolphaol nail ngaol. Alheel ngel-i mail, yu maq bhi heeq nia dai, Khali yaq munl teevq munl bhai gevq bhiq thaq nail ngaol dai, noeq nail ngaol.
Khul bhai noeqthunq khi gevq-a nail
Haoqgavq niil keiv neq, Yaolhaq aivq-i mail gevq bhiq-a nail Khali yaq munl al munl bhai maldil tsaq nail lavqkhoel khi mail goil nail gaiq-a nail lavqkhoel bhai tsao nail bhai tsiqeeq bhiq-a nail nee ovqtavq, gaq bivq nail haqbhoil gevq-a nail ngaol. Al ovqtavq, cavq bheeq nail juq teevq dao nee teevq dao tsao tsao-ail, cavq thail cov thailthaiq nail bhai yaolphaol yaoq dai iqsanl, gevq bhiq-a nail ngaol.
1
Iqmoeq ilmoeq khe daoq
Ngal neq, Khali yaq munl bhai heldaiq phail nail aqivq teevq gaq ngaol. Miqyail-i mail tsel dov-ai thaq nail yaqmai-aq teevq gaq* 1.1 Khali yaq munl bhai ge movq nail ngaol. bhai khi mail, aivq nail yaq juq bhai haoqgavq niil keiv gevq bhoel-ai leevq-a nail ngaol. Maldil tsaq nail lavqkhoel ngal nuljuq bhai gaiq-a nail ngaol. Ngal taivq-ail maq ngel-ail. Maldil tsaq nail phaq bhai khal heeq nia nail tsaol-aq juq iqsanl mail nuljuq bhai gaiq-a nail ngaol. Ngadao nail lavqkhoel bhai aol nail maldil tsaq nail phaq bhaqda nee ngal nuljuq bhai gaiq-a nail ngaol. Maldil tsaq nail phaq al neq, nqmaq maqluv halyeel ngadao nee jaol nail ngaol.
Aqbhu Miqyail khi mail Aqbhu Miqyail nail Yaqyov Yeiqsul Khali nail geeqlaoq eeljaol maqkhaiq, gaoqhaq gaiq-a lavq nail phaq maqkhaiq, neesal-ovq nail phaq maqkhaiq, al hail phaq iqsanl, maldil tsaq nail phaq khi mail goil nail gaiq-a nail phaq nail lavqkhoel nee ngadao nail kovtavq bhai jiav dei-eiq.
Khali-i mail cavq lavq cov lavq-a nail khe-ai, aqdoevq doevq yaoq
Aqbhu Miqyail-i mail ngadao bhai daoq khal bivq-ai thaq nail khe-ai, nuljuq nail yaq teevq pav ganav juq maldil tsaq nail phaq nail haoqnao tsaothe thailthaiq nail bhai, ngal ya moel-a nail ngel-i mail, lavqkhiq tsail deedee-ail nial. Yaqmai-aq ol, ngadao juq teevq gaq nee teevq gaq gaiq-a bhel dai, niil aq-il ngal naoq bhai hal nail ngaol. Gaiq-a nail niil neq, bivq thaq-ail ceevq-a nail daoq aqsivq daoq, ngal naoq bhai gevq bhoel-ai leevq-a nail maq ngel. Iqmoeq-u nee ngadao-i mail ya-ai thaq nail daoq al daoq ngal naoq bhai gevq bhoel-ai leevq-a nail ngaol. Goil nail gaiq-a nail phaq dai, ge nail neq, Miqyail-i mail daoq bivq-ai thaq nail khe-ai, naldaiq khi nl tsao hal tsao nail bhai ge nail ngaol. Goil nail gaiq-a nail haoqnao tsaothel-aivq yaoq dai, bivq-ai thaq nail daoq niil daoq bhai, iqmoeq-u nee mail, nuljuq ya gaiq-a nail ngaol.
Yeiqsul Khali neq, tsaol-aq yaq nail aqsivq haqjoil phi khi yavq kha lee-a nail maq ngel-ail dai, goiqbhaoq bhaoq nail tsaol-aq juq maodai miltsaq kovtavq bhai cavq doi ail-a nail ngaol. Alhai ge nail tsaol-aq juq neq, goiqbhaoq bhaoq nail tsaol-aq pevq khi, Khali bhai genl dev nail tsaol-aq ngaol. Alheel ngel-i mail, nuljuq-i mail nl-a hal-a nail phaq aqnieivq-ail maq bhi peivq-ail dai, Miqyail-i mail nuljuq bhai bivq nail dai lainq-ai thaq nail aqphoiq bhai, teevq bhee teevq lovq ya kivq dai, yaolphaol yaoq. Khali-i mail cavq lavq cov lavq-a nail khe-ai maq doevq dai, maq ngel nail phao al jaiq ail jel nail tsaol-aq khul gaq maqkhaiq, Miqyail bhai maq tavq-ail. Khali-i mail cavq lavq cov lavq-a nail khe-ai doevq nail tsaol-aq neq, Aqbhu Miqyail bhai iqsanl, Yaqyov bhai iqsanl ya-a nail ngaol. 10 Alheel ngel-i mail, tsaol-aq teevq gaq ganav Khali-i mail cavq lavq cov lavq-a nail daoq maq cavq maq cov dai, nuljuq jaol nail bha lal haq neq, ilkhaol lavqkhoel bhai iqsanl thaq hav bhoel. Aivq bhai thaoqphuq-u phao daoq iqsanl thaq ge tsaoq. 11 Khul khi mail dai ngal-aq, alheel nail tsaol-aq bhai thaoqphuq-u phao, daoq ge tsaoq nail gaq neq, aivq haqeiv nail phaq nl nail bhai, nl tsao bhiq nail khe-ai, dul lai nail ngaol.
Haoqnao naosaq khe daoq
12 Ngal nuljuq bhai gevq bhoel-ai leevq heeq phaq-ail maodai jiav khi ngaol-aoq, haoqgavq aqpavq khi mail haoqgavq dailkheq-i maq gevq movq-il. Ngadao juq lavqkhiq tsail nail phaq bhee lal dai, ngal nuljuq jaol nail bha lee khi, nuljuq nee daoq ge tsaoq movq-ail nial. 13 Naoq bhai noeq moel naol dai, Miqyail-i mail tsel dov-ai thaq nail naoq nail nailma nail yaq juq naoq bhai daoq cavq cavq bhoel-ai leevq-a nail ngaol.

*1:1 1.1 Khali yaq munl bhai ge movq nail ngaol.