3 Yaolhaq
Gevq-a nail gaq
Haoqgavq niil keiv neq, khaq sil gaq-i mail gevq-a nail dai, aqduq aqtsil tsil dai maq gevq-ai thaq-al. Thailhai ngaol-aoq, milnee uqnee khe Khali yaq juq Gaqkhoel Yaolhaq-i mail gevq-a nail ngaol dai, noeq nail ngaol. Khul khi mail dai ngal-aq, haoqgavq niil keiv neq, 2 Yaolhaq nail haoqgavq khe-ai, maodai dul lai ngaol.
Gevq-a nail aqyanq khi mail aqduq
Gevq-a nail aqyanq neq, A.D. 85-95 kovq nail gaiqlaq bhai ngaol. Gevq-a nail aqduq neq, Eilpheilsu meenq bhai ngaol.
Khaq sil gaq bhai gevq bhiq-a nail
Haoqgavq niil keiv neq, Yaolhaq aivq nail aqtsaoq Gaqyul dai khul nail gaq bhai gevq bhiq thaq nail niil dai, heeq lal nail ngaol. Gaqyul dai khul nail neq, Lolmav nail aqmil pevq nail ngaol. Daoqceevq neq, lavqkhiq tsail nail dai, ge movq nail ngaol.
Khul bhai noeqthunq khi gevq-a nail
Haoqgavq niil keiv neq, Yaolhaq Daqyaoldaqlal dai mil nail aqivq teevq gaq daoq maq naldaiq dai, aivq bhai ge doil khi, neema eeq nail nee ovqtavq, aqivq jiovq movq khi, geeqlaoq daoq cavq lal cov lal nail juq bhai maq hav bhoel mail, hav bhoel nail juq bhai iqsanl lav tsoiq nail bhai, Yaolhaq neema maq tsaq-il dai, bhi heeq kivq movq nail haqbhoil, gevq-a nail ngaol. Al ovqtavq, Yaolhaq neq, maldil lavqkhiq tsail nail geeqlaoq daoq cavq nail cov nail tsaol-aq juq bhai aqmeeq-ai hav bhiq khi tsaojao-ai bhiq nail neq, tsaq nail ngaol dai, gaq bivq-a nail ngaol.
1
Iqmoeq ilmoeq khe daoq
1 Ngal neq, Khali yaq munl bhai heldaiq phail nail aqivq teevq gaq ngaol. Ngal mailma-ail gaiq-a nail Gaqyul jaol nail bha haoqgavq niil gevq bhoel-ai leevq-a nail ngaol.
2 Ngal mailma-ail gaiq-a nail aqtsaoq-ol, aqhaqlal phao loq nail phaq naol teevq bhee aol nail khe-ai, yaoq phaq yaoq-ao nee teevq bhee aol lal khi, jaol hal dov dai, ngal geeqlaoq hal nail ngaol. 3 Aqivq jaqbheq Khali yaq teevq pav ganav juq ngal jaol nail bha lal khi, naol saljial ivq nail ganl maqkhaiq, maldil tsaq nail haoqnao tsaothe thailthaiq nail ganl maqkhaiq, ge dai lavq-a nail ngel-i mail, ngaq bhai lavqkhiq tsail deedee ail nial. 4 Ngaq nail yaq juq tsaq nail daol nail lavqkhoel bhai aqdoevq doevq thailthaiq nail ngaol dai, ya gaiq-a nail nee maqtsil, ngal lavqkhiq tsail nail yaoq phaq yaoq maq jiav yaoq-aol.
Gaqyul yu bhai hav nia nail ngel-i mail, tsiqeeq bhiq-a nail ganl
5 Ngal mailma-ail gaiq-a nail aqtsaoq-ol, naol neq, Khali yaq juq bhai aqmeeq-ai hav bhiq-a nail lavqkhoel saljial ivq deedee khi, maq moel daiq-a nail Khali yaq juq bhai kev dai, alhai hav bhiq-a nail ngaol. 6 Naol goil nia gaiq-a nia nail ganl, niilniai jaol nail Khali yaq juq bhai aqyu juq ge bhiq-a nail ngaol. Miqyail neema tsaq nail khe-ai, naol aqyu juq bhai hevq ha-ail bhiq haq neq, meeq deedee nail ngaol. 7 Khul khi mail dai ngal-aq aqyu juq neq, Yeiqsul nail haqbhoil daoq cavq daoq cov cov ail nail dai khi, ail nail ngaol. Al ovqtavq aqyu juq neq, laolkivq yaq juq-i mail tsaojao-ai bhiq nail bhai maq hav bhoel-ail. 8 Alheel ngel-i mail, maldil tsaq nail phaq nail haqbhoil, niilheel nail tsaol-aq juq nee mail ngadao ganl teevq gaq khe-ai, nl kivq hal kivq dai, ngadao juq aqyu juq bhai aqmeeq-ai hav bhiq nail, tsaq nail ngaol.
Daqyaoldaqlal yu bhai lav tsoiq nail ganl
9 Ngal nuljuq nail Khali yaq munl bhai haoqgavq davqnil nil dai, gevq bhoel-ai leevq-a nail ngaol. Thailhai ngaol-aoq, Khali yaq munl nail kovtavq bhai aqivq jiovq movq nail Daqyaoldaqlal neq, nvjuq nail daoq bhai maq hav bhoel-ail. 10 Alheel ngel-i mail, ngal lee haq neq, aivq-i mail khal nl khal hal-a nail phaq ge dov naol. Aivq nvjuq bhai khal ge movq-ail ge doil deedee nail ngaol. A dai taivq-ail maq ngel-ail haq-al, aqivq jaqbheq Khali yaq juq lee-u phao, aivq maq hav bhoel nail nee ovqtavq, khal hav bhoel movq nail tsaol-aq bhai iqsanl lav tsoiq khi, Khali yaq nail munl lavqkhoel nee the dov nail ngaol.
Deiqmeiqdeiqlil meeq nail ngaol dai, salkhil khanq nail ganl
11 Ngal mailma-ail gaiq-a nail aqtsaoq-ol, haqeiv nail phaq nail haoqnao thaq tsaothe. Aqmeeq phaq nail haoqnao tsaothe yaoq. Aqmeeq phaq nl nail tsaol-aq neq, Miqyail nail tsaol-aq ngaol. Haqeiv nail phaq nl nail tsaol-aq neq, Miqyail bhai maq phuq maq moel daiq-a nail tsaol-aq ngaol. 12 Tsaol-aq iqsanl mail, Deiqmeiqdeiqlil aqmeeq ngaol dai, salkhil khanq nail ngaol. Maldil tsaq nail phaq iqsanl aivq nail haqbhoil salkhil khanq nail ngaol. Aivq aqmeeq ngaol dai, nvjuq iqsanl salkhil khanq nail ngaol. Nvjuq-i mail salkhil khanq nail niil maldil tsaq nail ngaol dai, naol iqsanl heeq nia nail ngaol.
Haoqnao naosaq khe daoq
13 Ngal naoq bhai gevq bhoel-ai leevq heeq phaq-ail maodai jiav khi ngaol-aoq, haoqgavq aqpavq khi mail haoqgavq dailkheq-i mail, maq gevq movq-il. 14 Maq maoq lal mail, naoq-ai nee ya moel khi, naoq bhai daoq ya ge tsaoq naol dai, ngal noeqthunq nail ngaol. 15 Naol neesal-ovq dei-eiq. Naoq bhai noeq moel naol dai, naoq nail aqtsaoq juq naoq bhai daoq cavq cavq bhoel-ai leevq-a nail ngaol. Ngaq nail aqtsaoq juq yaoq gaq yaoq-ao nee bhai iqsanl ngal noeq moel naol geiq dai, naol daoq cavq cavq bhiq ail dei-eiq.