Heiqbhail
Gevq-a nail gaq
Haoqgavq niil keiv neq, khaq sil gaq-i mail gevq-a nail dai aqduq aqtsil tsil dai maq gevq-ai thaq-al. A.D. 200 kovq bhai neq, Leiqbhil nail jeq-e jaq-a pevq khi, aoldaoq kovqdaoq bhai heeq nia nail Bhaqnaqbhal-i mail gevq thaq nail dai, noeq nail ngaol. Thailhai ngaol-aoq, 400-1600 kovq nail gaiqlaq bhai Heiqbhail nail haoqgavq neq, Paolluv-i mail Heiqbhail nail tsaol-aq bhai gevq bhiq-a nail haoqgavq dai, khul nail ngaol. A.D. 1600 nail pultavq nee mail, yanq gaol kev dai neq, Bhaqnaqbhal maq ngel haq neq, Aqpaolluv-i mail gevq thaq nail dai, noeq nail ngaol. Aqpaolluv neq, Jalliq aqlil bhai aqmeeq-ai heeq nia khi, Paolluv nee mail ganl nl daiq-a nail ngaol.
Gevq-a nail aqyanq
Gevq-a nail aqyanq neq, A.D. 70 kovq nail iqmoeq gevq-a nail ngaol. Khul khi mail dai ngal-aq neq, A.D. 70 kovq bhai uqhuq thaoq nail ilkhaol il ma genl dev peiv-a nail ganl maq gevq-ai thaq-al.
Khaq sil gaq bhai gevq bhiq-a nail
Haoqgavq niil keiv neq, Yuldav tsaol-aq Khali yaq juq bhai gevq bhiq-a nail ngaol. Aqyu juq iqmoeq-u phao, Yeiqsul neema thaqtsaol khi ngaol-aoq, haoqnao neq, aqlil khe-ai, Yuldav nail aol thaoq kovq ail khi mail, Yuldav nail aol khal jiav nail khe-ai, nl nail hal nail laol nail sail nail haqbhoil neema aol lal bhiq-a nail ngaol.
Khul bhai noeqthunq khi gevq-a nail
Haoqgavq niil keiv neq, Yuldav tsaol-aq nail Philma juq, uqhuq thaoq nail ilkhaol il ma khi mail aoldaoq kovqdaoq nee maqtsil, eeq jaiq heel jaiq nail gaq neq, Yeiqsul ngaol dai, cavq naq bhiq-ai thaq nail haoqgavq ngaol. Al ovqtavq, laol nail sail nail nee tavq lai khi, Heeqphaq Yeiqsul aivq nail aqmaol laol bhiq-a nail ngaol dai, cavq naq-ai thaq nail ngaol.
Heeqphaq Yeiqsul bhai ya heeq kivq-a nail neq, meeq jaiq nail gailkhaol ngel-i mail, gailkhaol aqlil khaol bhai thaq gaoq kovq ail dai iqsanl, cavq nail cov nail haoqgavq ngaol.
Haoqgavq niil keiv nail lavqkhoel bhai, mee nia daoq neema thaqtsaol nail phaq ivq yaoq dai, gevq-ai thaq nail ngaol.
1
Yaqyov bhai juq khi Miqyail daoq ge nail ganl
Milnee uqnee, Miqyail aivq nail haqbhoil gedan nail juq bhai juq khi, aqphiq aqbhal bhai mee nia phaq nail lavqkhoel, meeq nia pov daoq ge bhiq-a nail ngaol. Thailhai ngaol-aoq, haoqnao naosaq khe aqn aqyanq niil nail lavqkhoel, aivq nail Yaqyov bhai juq khi, aivq ngadao bhai daoq ge lavq-a nail ngaol. Khal jaol khal jiav nail iqsanl, aivq bhai ovq nail jaiqbhoil bhi pevq nail dai, Miqyail aivq nail Yaqyov bhai tsel dov-a nail ngaol. Miqyail aivq bhai juq khi, bhoiq bhoiq luv luv bhai teivq-ai thaq nail ngaol. Yaqyov nail lavqkhoel-ai Miqyail nail seiqleiq khaoqsail bhaq dov lee-a nail ngaol. Miqyail khe-ai, Yaqyov iqsanl pevq naol. Bhaqaoq teevq bhee aol nail aivq nail daoq bhai juq khi, khal jaol khal jiav nail iqsanl bhai, Yaqyov heldaiq phail nail ngaol. Aivq neq, tsaol-aq yaq nail oeqbal bhai tsiqhaol gaq khi mail, iqsanl bhai uvthaiq nail Miqyail nail lavqmal phao jaoldeel lai-a nail ngaol.
Nqtavq gaqkhoel nee maqtsil Yaqyov eeq nail ganl
Nqtavq gaqkhoel nail aqmil nee maqtsil aivq-i mail ya-a nail aqmil neq, eeq jaiq meeq jaiq nail ngaol. Alhai dul dai, aqyu juq nee maqtsil aivq eeq jaiq meeq jaiq nail ngaol.
“Naol neq,
ngaq nail Yaqyov ngaol.
Yanqgaol naoq nail Aqbhu
pevq lal-a nail ngaol” dai,
Miqyail nqtavq gaqkhoel khul gaq bhai ge bhiq daiq-a nail-aiq.
“Ngal neq,
aivq nail Aqbhu pevq khi,
aivq neq,
ngaq nail Yaqyov
pevq nail ngaol” dai,
Miqyail nqtavq gaqkhoel khul gaq bhai ge bhiq daiq-a nail-aiq. Teevq gaq bhai gail maq ge daiq bhiq-al.
Al ovqtavq, iqmoeq ilmoeq doevq lee-a nail Yaqyov bhai miltsaq kovtavq-ai bhi lee-u phao,
“Ngaq nail
nqtavq gaqkhoel iqsanl mail
aivq bhai
uqhuq thaoq yaoq” dai,
Miqyail ge bhiq-a nail ngaol.
Nqtavq gaqkhoel nail ganl bhai Miqyail ge nail:
“Aivq nail
nqtavq gaqkhoel bhai
lilmoel khe-ai bhi pevq khi,
aivq nail haqbhoil
ganl nl nail juq bhai
miqjaq miqlail khe-ai
bhi pevq nail ngaol” dai,
ge-ai thaq nail ngaol.
Thailhai ngaol-aoq, Yaqyov nail ganl bhai Miqyail niailhai ge-ai thaq nail ngaol:
“Miqyail-ol,
naoq nail
doiqbev bev ma neq,
nqmaq maqluv halyeel
ivq nail ngaol.
Naol naoq nail
milkhaoq bhai
tsaq nail phaq-i mail
uvthaiq nail ngaol.
Naol neq,
tsaq nail daol nail
phaq bhai gaiq-a khi,
maq tsaq maq daol nail
phaq bhai neq,
bhe nail ngaol.
Alheel ngel-i mail,
naoq nail Miqyail
naoq nail aqtsaoq juq
nee maqtsil
naoq bhai thaqeeq khi
lavqkhiq bhiq tsail nail
aqtseel hoeldav-ai
thaq nail ngaol” dai,
ge-ai thaq nail ngaol.
10 Al ovqtavq,
“Heeqphaq-ol,
iqmoeq ilmoeq-u nee
naol miltsaq bhai teivq khi,
nqtavq bha iqsanl
naoq nail aqlavq-i mail
teivq-ai thaq nail ngaol.
11 Al juq peivq-ail
boev-ail nail ngaol.
Thailhai ngaol-aoq,
naol neq,
khaq mao iqsanl,
ivq nail ngaol.
Al juq iqsanl mail
aqgaq aqdoi khe-ai,
khail-ail nail ngaol.
12 Phailkhaoq kaolteiv
teiv-ai thaq nail khe-ai,
naol al juq bhai
kaolteiv teiv khi
lavqphal nail ngaol.
Thailhai ngaol-aoq,
naol neq,
teevq thal-iq maq pov
maq phal lal-ail.
Naoq nail aqkovq aqlav
teevq thal-iq maq gil-ail” dai,
ge-ai thaq nail ngaol.
13 “Naoq bhai
neejiav jiav nail tsaol-aq bhai
naoq nail aqkhil kov-uvq bhai
ngal bhi jaol-u phao kev dai,
ngaq nail lavqmal phao
jaoldeel yaoq” dai,
Miqyail nqtavq gaqkhoel khul gaq bhai ge bhiq daiq-a nail-aiq. Maq ge bhiq daiq-al.
14 Nqtavq gaqkhoel iqsanl neq, hevqkovq nail jaiqbhoil ovq nail tsaol-aq nail haqbhoil ganl bhi nl nail dai khi, Miqyail-i mail khoel-ai thaq nail gaqkhoel pevq nail maq ngel-ail laiq.