Philleilmoq
Gevq-a nail gaq
Haoqgavq niil keiv iqmoeq ilmoeq bhai Gaqkhoel Paolluv aivq-i mail gevq-a nail ngaol dai, gevq-ai thaq nail ngaol. Al ovqtavq, milnee uqnee khe Khali yaq juq jemao iqsanl, Paolluv-i mail gevq-a nail ngaol dai, noeq nail ngaol.
Gevq-a nail aqyanq khi mail aqduq
Gevq-a nail aqyanq neq, A.D. 60 kovq niidai bhai gevq-a nail ngaol. Gevq-a nail aqduq neq, Lolmav meenq bhai ngaol. Paolluv Lolmav meenq nail thaonq bhai iqmoeq ilmoeq bhi nieivq bhoel-u phao, gevq-a nail ngaol. Philleilmoq haoqgavq iqsanl, thaonq bhai aol khi gevq-a nail haoqgavq al juq nail lavqkhoel bhai aol nail ngaol. Gaollaolsail nail haoqgavq bhi oil ha lai-u phao, Philleilmoq nail haoqgavq iqsanl bhi oil laivq-a nail ngaol.
Khaq sil gaq bhai gevq bhiq-a nail
Haoqgavq niil keiv neq, Philleilmoq bhai gevq bhiq-a nail ngaol. Philleilmoq neq, Gaollaolsail meenq bhai jaol khi yaqkav tsu-ai thaq nail hulmeeq hulbhao teevq gaq ngaol. Gaollaolsail meenq bhai jaol nail Khali yaq juq aivq nail ilkhaol bhai geeqlaoq hal lai nail ngaol. Philleilmoq neq, aivq nail yaqkav jiovq Aolneiqsiqmul dai mil nail teevq gaq jaol nail ngaol. Aolneiqsiqmul dai ge nail daoqceevq neq, Ganl tsoiq nail dai, ge movq nail ngaol. Teevq n aivq nl laiq khi Lolmav meenq bhai tsaol-aivq-a nail ngaol. Aolneiqsiqmul Lolmav meenq bhai jaol thailthaiq-u phao, Paolluv bhai moel khi Khali yaq pevq lal-a nail ngaol.
Khul bhai noeqthunq khi gevq-a nail
Paolluv Philleilmoq bhai tsaoq peil-aivq-a nail Aolneiqsiqmul bhai oeqbal phaiq bhiq khi teevq pov gaoq hav bhoel bhiq yaoq dai, hal nail haoqgavq ngaol.
1
Iqmoeq ilmoeq khe daoq
1 Ngal neq, Yeiqsul Khali nail haqbhoil thaonq bhai aol thailthaiq nail Paolluv ngaol. Jaqbheq Tilmolseiq nv-nvq gaq nee mail ganl teevq gaq khe-ai nl nail nv-nvq gaq mailma-ail gaiq-a nail Philleilmoq bhai haoqgavq niil keiv gevq bhoel-ai lavq-a nail ngaol. 2 Al ovqtavq, nv-nvq gaq nail dulma Aqbhil khi mail, nv-nvq gaq nee mail teevq gaq khe-ai, Yeiqsul nail haqbhoil genl dev yaq pevq nail, Aqgilpuv bhai maqkhaiq, naoq nail ilkhaol bhai jil lal thailthaiq nail Khali yaq munl juq bhai maqkhaiq, haoqgavq niil gevq bhoel-ai lavq-a nail ngaol. 3 Ngadao nail Aqbhu Miqyail khi mail Heeqphaq Yeiqsul Khali nail geeqlaoq eeljaol khi mail neesal-ovq nail phaq nuljuq nail kovtavq bhai jiav dei-eiq.
Philleilmoq Khali bhai neema thaqtsaol khi yu bhai gaiq-a nail ganl
4-5 Ngaq nail jaqbheq Philleilmoq-ol. Naol neq, Heeqphaq Yeiqsul bhai neema thaqtsaol nail nee ovqtavq, Miqyail nail tsaol-aq iqsanl bhai gaiq-a nail ngaol dai, ngal ya gaiq-a nail ngaol. Alheel ngel-i mail, ngal khaq mao iqsanl geeqlaoq hal-u phao, naoq bhai noeq kev khi, Miqyail bhai tsiqeeq nail ngaol. 6 Naol khi mail nvjuq nail gaiqlaq bhai neema thaqtsaol nail lavqkhoel aqtsaoq tsaoq tavq nail niil neq, Khali nail lavqkhoel nee ya-a nail geeqlaoq yaoq phaq yaoq-ao nee bhai ngadao juq heeq nia jaiq lal nail haqbhoil, ngal geeqlaoq hal nail ngaol. 7 Jaqbheq Philleilmoq-ol. Naol goil nail gaiq-a nia nail bhaqda nee, ngal lavqkhiq tsail deedee khi, neema lavqkhoel bhai gaq gaoq aol jaiq lal-ail nial. Khul khi mail dai ngal neq, naol bhaqda nee, Miqyail nail tsaol-aq juq bhai neema aqsal bhi sal lal nail ngaol.
Paolluv Aolneiqsiqmul nail haqbhoil hal-a nail ganl
8 Alheel ngel-i mail, naol nl heeq phaq-ail tsaq nail juq nl yaoq dai, ngal naoq bhai Khali nail lavqkhoel nee geesil nail neema maq aol dai, daoq bivq kivq nail ngaol. 9 Thailhai ngaol-aoq, ngal naoq bhai gaiq-a nail ngel-i mail, daoq maq bivq dai goil nail gaiq-a nail lavqkhoel nee, hal nail ngaol. Ngal neq, joiqmaoq maoq lee-aoq nail Paolluv pevq nail nee ovqtavq, Yeiqsul Khali nail haqbhoil niil aq-il thaonq bhai aol thailthaiq nail teevq gaq pevq nail ngaol. 10 Ngal thaonq bhai aol-u phao, Yeiqsul nail lavqkhoel ngaq nail yaqyov pevq lal-a nail Aolneiqsiqmul* 1.10 Aolneiqsiqmul dai ge nail neq, ganl tsoiq nail dai, ge movq nail ngaol. nail haqbhoil naoq bhai hal nail ngaol. 11 Aivq neq, jel lal-u phao, naoq nail haqbhoil ganl maq tsoiq-ail. Thailhai ngaol-aoq, niil aq-il neq, naoq nail haqbhoil maqkhaiq, ngaq nail haqbhoil maqkhaiq, ganl tsoiq nail tsaol-aq pevq lal-a nail ngaol.
12 Niil aq-il, ngal aivq bhai naol jaol nail bha bhi kovq lee naol. Ngal alhai bhi kovq lee-u phao, ngaq nail neema iqsanl aivq nee mail tsaothe jaol-nvq thaq nail khe-ai, dul nail ngaol. 13 Lavqkhiq tsail nail geeqlaoq daoq bhaqda nee, ngal thaonq bhai aol thailthaiq nail gaiqlaq, aivq naoq nail jiqdan jiovq khi, ngaq nail haqbhoil ganl nl nia dai, ngaq-ai nee mail bhi jaol movq-ail nial. 14 Thailhai ngaol-aoq, naol aqkhaoqanq maq bivq lavq-u kev dai, ngal aivq bhai maq bhi jaol lee movq-ail. Khul khi mail dai ngal-aq, naol aqmeeq phaq nl lavq-u phao, naol nl movq nail ngel-i mail nl nail phaq pevq nail bhai ngal oil movq-ail nial. Maq nl mail khul maq khi kivq nail bhaqda nee nl nail phaq maq bhi pevq movq-ail. 15 Aolneiqsiqmul naoq-ai nee mail khaq mao iqsanl ya jaol nail haqbhoil, aivq naoq-ai nee mail teevq yanq ya pav-ai thaq nail jaol-aq. 16 Alheel ngel-i mail, niil aq-il aivq kovq lee haq neq, yaqkav maq ngel yaoq-aol. Gaiq-a nail jaqbheq pevq lal-aoq nail ngaol. Ngal aivq bhai gaiq-a deedee naol. Aivq neq, tsaol-aq yaq pevq nail nee ovqtavq, Yeiqsul nail lavqkhoel bhai aqivq jaqbheq iqsanl pevq lal-a nail ngel-i mail, naol iqsanl ngaq-ai nee maqtsil aivq bhai gaiq-a nail tsaq nail ngaol.
17 Alheel ngel-i mail, naol ngaq bhai naoq nail ganl nl tsaoq ngaol dai, saol-nvq-ai thaq nail ngel haq neq, ngaq bhai hav lavq-a nail khe-ai aivq bhai iqsanl hav bhiq yaoq. 18 Aivq naoq bhai teevq phaq ganav nl laiq-ai thaq nail maqkhaiq, gailjiov bavq nail phaq maqkhaiq, iqsanl mail ngaq nail kovtavq bhai bhi jiav dei-eiq. 19 Ngal neq, Paolluv ngaol. Gailjiov al ngal khaoq bhiq naol dai, ngaq nail aqlavq nee gevq bhoel-ai leevq-a nail ngaol. Naoq nail aqmaol naol ngaq bhai khaoq kovq lavq heeq phaq-ail tsaq nail gailjiov al bhai, ngal khul teevq phaq iqsanl maq ge. 20 Alheel ngel-i mail, jaqbheq-ol. Yeiqsul nail maivphaoq bhai heldaiq khi, ngaq nail haqbhoil aqmeeq phaq nl lavq yaoq. Khali nail lavqkhoel ngaq bhai neema sal lal dai, teevq pov nl lavq yaoq. 21 Naol ngaq nail daoq naldaiq nail ngaol dai, ngal neema thaqtsaol nail ngel-i mail, ngal naoq bhai haoqgavq niil keiv gevq bhoel-ai leevq-a nail ngaol. Ngal hal nail nee maqtsil, naol nl lavq nail ngaol dai, ngal heeq kivq nail ngaol.
22 Alhai ngaol-aoq, teevq phaq hal movq-ail nail. Ngaq nail haqbhoil jaol duq micil lav sav thaq-ai lavq yaoq. Khul khi mail dai ngal-aq, nuljuq geeqlaoq hal-a nail bhaqda nee, ngal nuljuq jaol nail bha teevq pov gaoq ya kovq lee naol dai, noeqthunq nail ngaol.
Haoqnao naosaq khe daoq
23 Yeiqsul Khali nail haqbhoil, ngaq-ai nee mail thaonq bhai aol thailthaiq nail Ilbhaqphaqlal, naoq bhai noeq moel-ail nial dai, daoq cavq cavq bhoel-ai leevq-a nail ngaol. 24 Ngaq-ai nee mail teevq gaq khe-ai, ganl nl thailthaiq nail Maqkul, Aqliqdaqgul, Deiqmav khi mail Lulkavq aqyu juq iqsanl, naoq bhai noeq moel naol dai, daoq cavq cavq bhoel-ai leevq-a nail ngaol.
25 Heeqphaq Yeiqsul Khali nail geeqlaoq eeljaol nuljuq iqsanl nail neema lavqkhoel bhai jiav dei-eiq.