1 Aqyu juq ganl niil juq bhai maq ya nioil peivq-ail dai, aqmeeq-ai cavq bhiq cov bhiq yaoq. Heeqphaq juq khi mail uvthaiq nail juq nail kov-uvq bhai aqmeeq-ai jaol yaoq. Aqyu juq nail daoq naldaiq yaoq. Aqmeeq yaoq phaq yaoq-ao nee ya nl dai, lainq thaq gai yaoq. 2 “Teevq gaq bhai iqsanl khal ge movq-ail thaq ge. Thaq jil pheel thaq jil lul jaq. Neema neenuq neebeiv aol khi, yaoq phaq yaoq-ao nee nail lavqkhoel tsaol-aq iqsanl bhai ev yaoq” dai, aqyu juq bhai aqmeeq-ai cavq bhiq cov bhiq yaoq.

3 Khul khi mail dai ge haq neq, jel lal-u phao, ngadao juq iqsanl, neenoeq neekha maq aol nail tsaol-aq, daoq maq naldaiq nail khi mail, gail bheeq bheeq ail-a nail tsaol-aq ngaol. Al ovqtavq, aqsivq haqjoil phao maivjeel jeel nail phaq khi mail, maq meeq nail phaq bhai lavqkhiq tsail nail mee nia phaq nail kov-uvq bhai yaqkav jiovq daiq-a nail tsaol-aq ngaol. Aq-u phao, ngadao yu bhai maivjeel jeel khi khoeq lai dai nl-a nail tsaol-aq ngaol. Aq-u yu ngadao bhai neejiav jiav nail nee ovqtavq, ngadao teevq gaq nee teevq gaq iqsanl, neejiav jiav-a nail ngaol. 4 Thailhai ngaol-aoq, ngadao nail Hevqkovq nail gaq pevq nail Miqyail nail gaoqhaq gaiq-a nail phaq khi mail, goil nail gaiq-a nail phaq ngadao bhai phaodaiq lavq-u phao, 5 aivq ngadao bhai hevqkovq lavq-a nail ngaol. Ngadao tsaq nail daol nail phaq nl-a nail bhaqda nee, hevqkovq lavq-a nail maq ngel-ail. Aivq ngadao bhai gaoqhaq nail ngel-i mail, hevqkovq lavq-a nail ngaol. Meeqnail Haolnail Aqhaqlal lavqkhoel, neema aqsivq phal lal khi doevqyeel aqsivq doevq phal lal-a nail neq, tsiq haol lavq-a nail phaq bhai juq khi aivq ngadao bhai hevqkovq lal-a nail ngaol. 6 Ngadao nail Hevqkovq nail gaq pevq nail Yeiqsul Khali bhai juq khi, Miqyail ngadao nail kovtavq bhai Aqhaqlal Miqyail teevq bhee hoeldav lavq-a nail ngaol. 7 Miqyail nail geeqlaoq eeljaol bhaqda nee, ngadao tsaq nail daol nail tsaol-aq pevq lal nail ngel-i mail, nqmaq maqluv halyeel doevq nail phaq bhai noeqthunq noeqthunq-ail, Miqyail nail jaiqbhoil ovq nail tsaol-aq ngaol. 8 Daoq al juq neq, saljial ivq nail daoq pevq nail ngaol. Miqyail bhai neema thaqtsaol nail tsaol-aq neq, khaq mao iqsanl, aqmeeq phaq ya nl nail ngaol dai, maq ya nioil peivq-ail dai, ngal naoq bhai aqmeeq-ai bhi cavq bhi cov movq-ail nial. Ganl al juq neq, meeq nail nee ovqtavq, tsaol-aq iqsanl nail haqbhoil ganl tsoiq nail ngaol.

9 Thailhai ngaol-aoq, khul nail ganl maq tsoiq nail phaq bhai jil pheeljaq nail juq bhai maqkhaiq, aqceevq ge ge-ail jil pheeljaq nail juq bhai maqkhaiq, iqdaiq iqtsai dov nail juq bhai maqkhaiq, aoldaoq kovqdaoq nail ganl jil pheeljaq nail juq bhai maqkhaiq, gail jao jao yaoq. Khul khi mail dai ngal-aq, ganl al juq neq, khul nail ganl maq tsoiq-ail. Aqnieivq teevq-eel ngaol. 10 Munl bhoil pav khi, gaoq ail gail ail dai nl nail tsaol-aq juq bhai, teevq pov nvq pov bhee dai, aqmeeq-ai cavq bhiq cov bhiq khi maq naldaiq lavq haq neq, gaoq ail ceiv ceiv yaoq. 11 Alhai nl nail tsaol-aq neq, neema teevq peivq-ail maq daol-ail. Oeqbal nl thailthaiq nail ngaol dai, naol heeq kivq yaoq. Aivq nail oeqbal neq, aivq oeqbal aol naol dai, salkhil pevq nail ngaol.

12 Aqdeiqmal bhai maq ngel haq neq, Duljil bhai ngal naol jaol nail bhai khoel-ai leevq-u phao, Nilgaolbhaqlil meenq bhai ngaq bhai ya thaoq phuq dai, laijai khi lal yaoq. Khul khi mail dai ngal-aq, coevqjieiv jieiv nail yanq bhai ngal a bhai jaol naol dai, noeq ceiv-ai thaq nail ngaol. 13 Aoldaoq kovqdaoq mao-ail heeq nia nail Seiqnal khi mail Aqpaolluv aqyu nvq gaq bhai gailkhaol dov-ail nia dai, laijai khi tsaojao-ai bhiq yaoq. Aqyu nvq gaq khal loq nail, yaoq phaq yaoq-ao nee bhee dai, tsaojao-ai bhiq yaoq. 14 Yu loq nail phaq bhai tsaojao-ai nia dai, ngadao nail tsaol-aq juq, aqmeeq phaq bhai nl nia lal dai, cav bhiq cov bhiq yaoq. Ganl maq tsoiq nail tsaol-aq maq ya pevq-ail.

15 Ngaq-ai nee mail jaol nail tsaol-aq juq iqsanl mail, naoq bhai noeq moel nail ngaol dai, daoq cavq cavq bhoel-ai leevq-a nail ngaol. Yeiqsul bhai neema thaqtsaol nail lavqkhoel nvjuq bhai gaiq-a nail tsaol-aq juq bhai iqsanl, nvjuq noeq moel nail lavqkhoel nee daoq cavq cavq bhoel-ai leevq-a nail ngaol dai, ge gaiq bhiq yaoq. Nuljuq iqsanl nail kovtavq bhai Miqyail nail geeqlaoq eeljaol jiav dei-eiq.