1 Teevq n neq, Geiqneiqsaqlail ngaqkha daolbhaq bhai Yeiqsul thulphaol-nvq thaq-u phao, tsaol-aq munl munl ma Miqyail nail daoq naldaiq nail dai khi, Yeiqsul jaol nail bha thaoq bhoel laivq-a nail ngaol. 2 Ngaqkha daolbhaq bhai laovq nvq laovq jiav nail bhai, aivq ya moel-a nail ngaol. Delgil nieivq nail juq neq, laovq lavqniil phao, aqyu juq nail ovjeel he tsiq thailthaiq nail ngaol. 3 Laovq nvq laovq jiav nail bhai, Yeiqsul Silmoq nail laovq bhai aol ail khi, “Ngaqkha lavqkhoel bha micil jiiv bhoel-ail lavq yaoq” dai, Silmoq bhai hal-a nail ngaol. Aq-u phao, Yeiqsul laovq lavqkhoel bhai jaoldeel khi, tsaol-aq munl munl ma juq bhai cavq bhiq cov bhiq-a nail ngaol.

4 Yeiqsul cavq bhiq cov bhiq gaq khi, Silmoq bhai ge bhiq-a nail: “Ulcuvq navq nail dao bhai jiiv bhoel-ail khi, delgil miv lal dai nuljuq nail ovjeel joe yaoq” dai, ge bhiq-a nail ngaol.

5 Silmoq ge nail: “Heeqphaq-ol, nvjuq milkiv teevq kivq kivq lao joe khi ngaol-aoq, teevq maol iqsanl, maq joe miv-al. Thailhai ngaol-aoq, naol khoel nail bhaqda nee, joe naol” dai, ge bhiq-a nail ngaol.

6 Aqyu juq alhai joe-u phao, delgil maodai phee lai-a nail ngel-i mail, aqyu juq nail ovjeel pav-ail nail khe-ai, pevq lal-a nail ngaol. 7 Aq-u phao, aqyu juq laovq yaoq laovq yaoq bhai jeeq-nq thaq nail aqyu juq nail aqtsaoq juq bhai, tsaojao-ai lee lavq-o dai, aqlavq lavqeq eq bhiq-a nail ngaol. Aqyu juq nail aqtsaoq juq kev lee khi, laovq al nvq laovq nail lavqkhoel bhai delgil nieivq bhoel bhee-aoq nail ngel-i mail, laovq al nvq laovq nvq laovq-ail ulcuvq lavqkhoel bhai nevq-ail nail khe-ai pevq lal-a nail ngaol.

8 Silmoq Bheiqtuvluv al bhai ya moel-u phao, Yeiqsul nail aqkhil daoqthaoq bhai peevqceevq kovdoiq doiq khi, “Heeqphaq-ol, ngal jaol nail nee dov ail yaoq. Ngal neq, oeqbal eeq deedee nail tsaol-aq ngaol” dai, ge bhiq-a nail ngaol. 9 Khul khi mail dai ngal-aq neq, aqyu juq delgil maodai nieivq miv-a nail ngel-i mail, Silmoq khi mail, aivq nee mail teevq gaq khe-ai ganl nl nail, aivq nail aqtsaoq juq iqsanl mail, noeq-u maq dov dai, pevq ail-a nail ngaol. 10 Silmoq nail aqtsaoq, Seiqbheiqdail nail Yaqyov Yaqkov khi mail Yaolhaq iqsanl, noeq-u maq dov dai, pevq ail-a nail ngaol. Aq-u phao, Yeiqsul Silmoq bhai ge bhiq-a nail: “Thaq geesil. Khul khi mail dai ngal-aq neq, yanqgaol nee ngal-aq neq, naol delgil nieivq nail khe-ai, tsaol-aq bhai halpov kovq nail tsaol-aq pevq lal nail ngaol” dai, ge bhiq-a nail ngaol. 11 Aqyu juq neq, laovq ngaqkha lavqkhoel nee he dol lavq khi, iqsanl bhai khaonq ha-ail ceevq khi, Yeiqsul nail haoqnao tsaothel-aivq-a nail ngaol.

12 Yeiqsul meenq teevq meenq nail lavqkhoel bhai jaol-u phao, aqmaol maol lao-ail niaoqbhaoq daol nail teevq gaq, a bhai jaol nail ngaol. Aivq Yeiqsul bhai moel-u phao, maivphaoq miltsaq bhai gaolbeiv khi, “Heeqphaq-ol, naol nl movq haq neq, ngal meeq lal haol lal dai naol nl nia nail ngaol” dai, hal-a nail ngaol.

13 Yeiqsul aqlavq gaoltsaoq khi, aivq nail kovtavq bhai bavq dav khi mail: “Ngal nl movq naol. Meeq lal haol lal yaoq” dai, ge bhiq-a nail ngaol. Aivq teevq pov taivq-ail niaoqbhaoq daol nail al, peivq gil ail-a nail ngaol.

14 “Ganl niil juq teevq gaq bhai iqsanl, thaq ge bhiq dei-eiq” dai, Yeiqsul aivq bhai daoq bivq-a nail ngaol. Yeiqsul gaoq ge nail: “Philyaq juq jaol nail bha naoq nail aqmaol bhai bhi heldaiq ail yaoq. Naol meeq lal haol lal-aoq thaq nail dai, aqyu juq ya heeq nia dai, Molseiq-i mail daoq bivq-ai thaq nail khe-ai, laol bhiq nail phaq laol bhiq ail yaoq” dai, aivq bhai ge bhiq-a nail ngaol.

15 Thailhai ngaol-aoq, Yeiqsul nail ganl iqmoeq-u nee maqtsil gaiq doi ail-a nail ngaol. Alheel ngel-i mail, tsaol-aq munl munl ma juq aivq nail daoq naldaiq nail khi mail, aqyu juq nal nail goel nail juq bhai bhi lav meeq nail khi, jil lal-a nail ngaol. 16 Yeiqsul neq, aivq teevq gaq taivq-ail tsaol-aq maq jaol nail bha geeqlaoq hal ail-a nail ngaol.

17 Teevq n neq, Yeiqsul cavq bhiq cov bhiq thailthaiq-u phao, Phaqliqsail juq khi aoldaoq kovqdaoq cavq nail cov nail juq lee kev khi jaoldeel-a nail ngaol. Aqyu juq neq, Yeiqlulsaqlaiq meenq, Gaqliqlail milkhaoq, Yuldav milkhaoq lavqkhoel bhai jiav nail julgu juq bhai jaol nail juq ngaol. Nal nail goel nail tsaol-aq bhai lav meeq nia dai, Heeqphaq Miqyail nail bhaqaoq Yeiqsul aol nail ngaol. 18 Aq-u phao, tsaol-aq teevq juq neq, iqjial bhai iqthaiq nail khil sil lavq sil sil thaq nail teevq gaq bhai, bal lavq-a nail ngaol. Yeiqsul nail sivtavq bhai bavq thaq-ail bhiq nail khi mail, aqyu juq laijai nail ngaol. 19 Thailhai ngaol-aoq, tsaol-aq teevq bhee jaol nail ngel-i mail, aqyu juq aivq bhai maq bavq bhoel laivq nia-ail khi, aqyu juq khaolpoiv bha dav lai khi, khaolpoiv deeq bhaoq khi mail, iqjial nee mail teevq gaq khe-ai, tsaol-aq al gaq bhai teevq pov taivq-ail tsaol-aq a dai nail gaoltsi bhai, Yeiqsul nail sivtavq bhai phaiq kha gai-aivq-a nail ngaol.

20 Yeiqsul aqyu juq a dai dai-ail neema thaqtsaol nail bhai ya moel-u phao, nal nail gaq bhai ge bhiq-a nail: “Aqtsaoq-ol, naoq nail oeqbal phaiq gaq-ao nail” dai, ge bhiq-a nail ngaol.

21 Aq-u phao, aoldaoq kovqdaoq cavq nail cov nail juq khi Phaqliqsail juq saol-nvq nail: “Miqyail bhai khal ge movq-ail ge khi, Miqyail nee teevq gaq khe-ai eeq naol dai, noeq nail thoil gaq, khalheel nail tsaol-aq ngel-ail. Miqyail maq ngel nail neq, khaq sil gaq oeqbal phaiq nia nail” dai, aqyu juq saol-nvq nail ngaol.

22 Aqyu juq alhai saol-nvq nail bhai, Yeiqsul heeq nia khi, aqyu juq bhai ge bhiq-a nail: “Khul khi mail, nuljuq nail neema lavqkhoel bhai thailhai saol-nvq nail-aiq. 23 Daoq khul daoq ge bhiq nail ngaq-aiq jaiq nail-aiq. ‘Naoq nail oeqbal phaiq gaq-ao nail ngaol’ dai, ge bhiq nail, ngaq-aiq jaiq nail laiq. Maq ngel haq neq, ‘Thul khi tsaol-aivq yaoq’ dai, ge bhiq nail, ngaq-aiq jaiq nail laiq. 24 Tsaol-aq nail Yaqyov neq, miltsaq kovtavq bhai oeqbal phaiq nia nail bhaqaoq aol nail ganl, nuljuq bhai bhi heeq bhi moel naol” dai, ge khi, a bhai nee ngal-aq, khil sil lavq sil sil nail gaq bhai gaoq ge bhiq-a nail: “Ngal naoq bhai ge lavq bhel, thul yaoq. Naoq nail iqjial bavq khi, ilkhaol bha kovq ail yaoq” dai, ge bhiq-a nail ngaol. 25 Aivq teevq pov taivq-ail aqyu juq nail sivtavq nee tsaoqthul khi, aivq nail iqjial bavq khi mail, Miqyail bhai tsiqeeq tsiqeeq ail khi ilkhaol bha kovq ail-a nail ngaol. 26 Tsaol-aq al juq teevq peivq-ail noeq-u maq dov dai pevq-ail khi, Miqyail bhai tsiqeeq nail ngaol. Aqyu juq geesil deedee nail lavqkhoel, “Nvjuq-i mail maq saol-nvq daiq-a nail phaq bhai yanqgaol ya moel-a nail ngaol” dai, ge nail ngaol.

27 A bhai nee ngal-aq, Yeiqsul dov ail khi, Leiqbhil dai mil-ai thaq nail khaon tavq nail teevq gaq, khaon tavq nail ilkhaol bhai jaoldeel-nvq thaq nail bhai ya moel-u phao, “Ngaq nail haoqnao tsaothel lavq yaoq” dai, ge bhiq-a nail ngaol. 28 Aivq iqsanl mail khaonq-ail ceevq khi, tsaoq thul khi mail, Yeiqsul nail haoqnao tsaothel-aivq-a nail ngaol.

29 A bhai nee ngal-aq, Leiqbhil neq, aivq nail ilkhaol bhai Yeiqsul nail haqbhoil jaq tavq daol tavq nail aoqbhaol teevq bhaol laol-a nail ngaol. Khaon tavq nail tsaol-aq khi yu iqsanl maodai, aqyu juq nee mail jaol khi jaq nail ngaol. 30 Phaqliqsail juq khi aqyu juq nail aoldaoq kovqdaoq cavq nail cov nail juq neq, Yeiqsul nail yaqlaol juq bhai ge doil ge doil-ail khi ge nail: “Khul khi mail, nuljuq khaon tavq nail tsaol-aq juq khi oeqbal yaq nee mail jaq tavq daol tavq nail-aiq” dai, naldaiq-a nail ngaol.

31 Yeiqsul aqyu juq bhai ge bhiq-a nail: “Jaol hal dov nail tsaol-aq, jagaq coev nail saqlaq maq loq-ail. Nal nail tsaol-aq taivq-ail loq nail ngaol. 32 Tsaq nail daol nail tsaol-aq bhai khul nail khi, ngal lee-a nail maq ngel. Oeqbal yaq, yovqgavq nail oeqbal noeq pov lal dai, khul nail dai khi, ngal lee-a nail ngaol” dai, ge kovq bhiq-a nail ngaol.

33 Aq-u phao, tsaol-aq teevq pav ganav juq, Yeiqsul bhai ge bhiq-a nail: “Yaolhaq nail yaqlaol juq khi, Phaqliqsail nail yaqlaol juq teevq yanq ngal-aq, teevq pov maq jaq nail aol nl nl-ail khi, geeqlaoq hal nail ngaol. Thailhai ngaol-aoq, naoq nail yaqlaol juq neq, jaq-il daol-il thoq” dai, ge bhiq-a nail ngaol. 34 Yeiqsul aqyu juq bhai ge kovq bhiq-a nail: “Khaqma hevq nail gaq, aivq nail aqtsaoq juq nee jaol-u phao kev dai, nuljuq aqyu juq bhai maq jaq nail aol bhi nl kivq naol laiq. Maq bhi nl kivq-ail. 35 Khaqma hevq nail gaq, aqyu juq nail aqtsaoq nee mail jaol-u phao, yu lal khi, aivq bhai hevq pal-aivq nail aqn kev lee nail ngaol. Aq-u phao, aqyu juq maq jaq nail aol nl nail ngaol” dai, aqyu juq bhai ge bhiq-a nail ngaol.

36 Aq-u phao, aivq aqyu juq bhai daoqma uqhuq daoq nee ge bhiq-a nail: “Aqgaq aqdoi aqsivq bhai he pav khi, aqgaq aqdoi aqkhail bhai teevq gaq iqsanl phaltsaol maq dovq-ail. Dovq haq neq, aqgaq aqdoi aqsivq al keiv, pav-ail nail nee ovqtavq, aqgaq aqdoi aqsivq keiv nail phaltsaol al, aqgaq aqdoi aqkhail bhai maq geel-nvq lai-ail. 37 Alhai dul dai, tsaol-aq teevq gaq iqsanl bavkov eelpheeq aqlil bhai aqheeq tsilju nail ullul*5.37 Maodai daol haq neq, bov lal nail ullul teevq phaq pevq nail ngaol. aqsivq maq hoel bhoel-ail. Hoel bhoel haq neq, aqheeq tsilju nail ullul aqsivq al, haqkov eelpheeq bhai bhi pav-ail nail ngel-i mail, aqheeq tsilju nail ullul khal-ail khi, haqkov eelpheeq iqsanl, luq-ail seil-ail nail ngaol. 38 Aqheeq tsilju nail ullul aqsivq neq, haqkov eelpheeq aqsivq bhai ya hoel bhoel nail ngaol. 39 Aqheeq tsilju nail ullul aqlil daol daiq-a nail khul gaq maqkhaiq, aqheeq tsilju nail ullul aqsivq bhai maq daol daiq movq-ail. Khul khi mail dai ngal-aq neq, aqheeq tsilju nail ullul aqlil neq, aqsivq nee maqtsil kheel nail ngaol” dai, aivq ge nail ngaol.