1 Jaol n n-gaol, Yeiqsul gov gov yal*6.1 Ilsaqleiqlal nail tsaol-aq-i mail khaqmul lav sav nail gov teevq phaq pevq nail ngaol. bhai ail pav-u phao, aivq nail yaqlaol juq gov gov nail cev khi, aqlavq-i mail govtsail laiq dov laiq dov-ail jaq-a nail ngaol. 2 “Jaol n n-gaol maq nl khaoq nail phaq, khul khi mail nuljuq nl nail-aiq” dai, Phaqliqsail teevq pav ganav juq ge nail ngaol.

3 Aq-u phao Yeiqsul ge kovq bhiq-a nail: “Daqbhil khi aivq nail aqtsaoq juq aoq moevq lal-u phao, khalhai khi-a nail bhai, nuljuq maq ge daiq haq-al laiq. 4 Daqbhil Miqyail nail ilkhaol bhai aol lai khi, Philma Philyaq juq maq ngel nail neq, teevq gaq iqsanl maq jaq khaoq nail Miqyail bhai laol bhiq-ai thaq nail khaqmul oil jaq khi, aivq nail aqtsaoq juq bhai iqsanl, bhi jaq-a nail ngaol” dai, ge bhiq-a nail ngaol. 5 Al ovqtavq, Yeiqsul gaoq ge nail: “Tsaol-aq nail Yaqyov neq, jaol n n-gaol iqsanl uvthaiq nail Heeqphaq ngaol” dai, Phaqliqsail juq bhai ge bhiq-a nail ngaol.

6 Jaol n n-gaol gaoq kev lal-u phao, Yeiqsul uqhuq thaoq nail ilkhaol bhai aol lai khi, cavq bhiq cov bhiq-a nail ngaol. A bhai aqlavq lavqmal lavq sil thaq nail teevq gaq jaol nail ngaol. 7 Aqyu juq Yeiqsul nail kovtavq bhai oeqbal thaq kivq dai, Yeiqsul jaol n n-gaol tsaol-aq al gaq bhai lav meeq bhiq-ail laiq dai, aoldaoq kovqdaoq cavq nail cov nail juq khi mail Phaqliqsail juq heldaiq cov-ai thaq nail ngaol. 8 Aqyu juq alhai noeq nail bhai, Yeiqsul heeq nia khi, aqlavq teevq phao sil thaq nail gaq bhai: “Naol thul khi, gaoltsi bhai thulphaol lal yaoq” dai, ge bhiq-u phao, aivq tsaoqthul khi thulphaol ail-a nail ngaol.

9 A bhai nee ngal-aq, Yeiqsul aqyu juq bhai ge bhiq-a nail: “Ngal nuljuq bhai naldaiq naol dei-eiq, jaol n n-gaol aqmeeq phaq nl khaoq nail laiq. Maq ngel haq neq, maq meeq nail phaq nl khaoq nail laiq. Yu bhai lav doevq khaoq nail laiq. Maq ngel haq neq, lav heivq khaoq nail laiq” dai, naldaiq bhiq-a nail ngaol.

10 Yeiqsul aqyu juq bhai doidoi-ai heldaiq khi mail, tsaol-aq al gaq bhai: “Naoq nail aqlavq gaoltsaoq yaoq” dai, ge bhiq-a nail ngaol. Tsaol-aq al gaq gaoltsaoq-u phao, meeq lai-a nail ngaol. 11 Thailhai ngaol-aoq, aoldaoq kovqdaoq cavq nail cov nail juq khi mail Phaqliqsail juq, neema phail deedee lal bhiq khi, Yeiqsul bhai khalhai khi bhiq heeq meeq dai, aqyu juq nail gaiqlaq bhai, ge pheeljaq-a nail ngaol.

12 Aqn aqyanq al nail lavqkhoel, Yeiqsul geeqlaoq hal nail dai khi, gaoqjaoq bha dav lai-a nail ngaol. Aivq a bhai nqbhaq bhaq dai, Miqyail bhai geeqlaoq hal-a nail ngaol. 13 Nqbhaq bhaq lal-u phao, aivq nail yaqlaol juq bhai khul khi, aqyu juq nail lavqkhoel nee, tsaol-aq tsel-nvq gaq tsel dov-a nail ngaol. Al tsel-nvq gaq bhai, gaqkhoel dai, khul nail ngaol. 14 Aqyu juq neq, Yeiqsul-i mail Bheiqtuvluv dai, mil bhiq-a nail Silmoq khi mail aivq nail jaqbheq Aqdaiqlaiq, Yaqkov khi mail Yaolhaq, Pillilpuv khi mail Bhaqthaollaqmail, 15 Maqthaiq khi mail Tholmav, Aqlaqphail nail yaqyov Yaqkov khi mail Seiqlul dai khul nail Silmoq, 16 Yaqkov nail yaqyov Yuldav khi mail, Yeiqsul bhai yu nail aqlavq lavqkhoel bhai av bhiq-a nail Yuldav Ilsaqgaqliqoq ngaol.

17-18 A bhai nee ngal-aq, Yeiqsul aqyu juq nee mail teevq gaq khe-ai gaoqjaoq nee yavq kha lee khi, daikhaoq aqsal bhai thulphaol-a nail ngaol. Aivq nail yaqlaol mee nia gaq iqsanl, aivq jaol nail bha bhoi lal jil lal-a nail ngaol. Al ovqtavq, Yuldav milkhaoq yaoq dao yaoq-ao nee jaol nail tsaol-aq juq, Yeiqlulsaqlaiq meenq bha jaol nail tsaol-aq juq khi mail, iqyaq iqma nail aqjail bhai jiav nail Dullu meenq khi mail, Sildoq meenq bhai jaol nail tsaol-aq munl munl ma juq iqsanl, aivq nail daoq naldaiq lal-a nail nee ovqtavq, aqyu juq nail nal nail goel nail bhai bhi lav meeq nail dai khi, bhoi lal jil lal-a nail ngaol. Neivq aqcavq-i mail khoeq bhiq jiovq bhiq khi, haq nail tsaol-aq juq bhai iqsanl, aivq lav meeq bhiq-a nail ngaol. 19 Tsaol-aq munl munl ma aivq bhai ya thoiqtsi dai, laijai nail ngaol. Khul khi mail dai ngal-aq neq, aivq nail lavqkhoel nee bhaqaoq dov lal khi, aqyu juq iqsanl bhai, bhi meeq lai-a nail ngaol.

20 Aq-u phao, Yeiqsul aivq nail yaqlaol juq jaol nail phao tsiqphaol khi, niailhai cavq bhiq cov bhiq-a nail ngaol: “Nuljuq haq nail aoq nail tsaol-aq juq neq, geeqlaoq eeq nail ngaol. Khul khi mail dai ngal-aq neq, Miqyail Milkhaoq lavqkhoel bhai jaol nail ngaol.

21 Niil aq-il, nuljuq moevq nail sivq nail tsaol-aq juq neq, geeqlaoq eeq nail ngaol. Khul khi mail dai ngal-aq neq, nuljuq ya jaq bov ya daol bov nail ngaol.

22 Tsaol-aq nail Yaqyov bhaqda nee, yu nuljuq bhai neejiav jiav lal nail, khaonq lavq nail, khal ge movq-ail ge lal khi, nuljuq nail aqmil bhai lav cov lal-u phao, nuljuq geeqlaoq eeq nail ngaol.

23 Aqn al n kev lee-u phao, tsaoq tsaoq-ail lavqkhiq tsail yaoq. Khul khi mail dai ngal-aq neq, nqtavq kovtavq bhai jiav nail, nuljuq nail kovpavq eeq deedee nail ngaol. Aqyu juq nail aqphiq aqbhal juq iqsanl, Miqyail nail haqbhoil gedan nail juq bhai alhai nl bhiq-a nail ngaol” dai, ge bhiq-a nail ngaol.

24 Yeiqsul gaoq ge nail: “Nuljuq hulmeeq hulbhao juq geeqlaoq aqdoil ya nail ngaol. Khul khi mail dai ngal-aq neq, nuljuq neekhaol jiav nail phaq, nuljuq ya gil-aoq nail ngaol.

25 Niil aq-il nuljuq jaq bov daol bov nail juq iqsanl, geeqlaoq aqdoil ya nail ngaol. Khul khi mail dai ngal-aq neq, nuljuq ya moevq ya sivq nail ngaol. Niil aq-il helsil nail tsaol-aq juq, geeqlaoq aqdoil ya nail ngaol. Khul khi mail dai ngal-aq neq, nuljuq ya noeqhaq ya noeqaoq khi, ya nioil nail ngaol.

26 Tsaol-aq iqsanl mail nuljuq bhai tsiqeeq lal-u phao, nuljuq geeqlaoq aqdoil ya nail ngaol. Khul khi mail dai ngal-aq neq, aqyu juq nail aqphiq aqbhal juq iqsanl, ‘Miqyail nail haqbhoil gedan naol’ dai, ge khi ngaol-aoq, maldil maq ngel nail juq bhai, alhai tsiqeeq-a nail ngaol” dai, ge bhiq-a nail ngaol.

27 Yeiqsul gaoq ge nail: “Ngaq-i mail ge nail daoq, ya gaiq-a nail nuljuq bhai, ngal ge lavq bhel. Nuljuq bhai neejiav jiav nail tsaol-aq bhai gaiq-a yaoq. Nuljuq bhai maq heldaiq nul nail tsaol-aq bhai, aqmeeq phaq nl bhiq yaoq. 28 Nuljuq bhai iqkhail yavq lal nail tsaol-aq bhai, geeqlaoq bivq yaoq. Nuljuq bhai khal ge movq-ail ge lal nail tsaol-aq nail haqbhoil, geeqlaoq hal bhiq yaoq. 29 Yu nuljuq nail bhaqbha teevq phao bal-nvq bhai teiv lal haq neq, yaoq phao yaoq iqsanl, tsiqdaq bhiq yaoq. Naoq nail phailkhaoq lavqkhoel khe keiv oil movq nail tsaol-aq bhai, lavqniil phao khe phailkhaoq heelma al keiv iqsanl bivq yaoq. 30 Naoq bhai khal hal lal nail tsaol-aq bhai bivq yaoq. Naoq nail nlmaoq oil-a nail tsaol-aq bhai, maq gavq maq nav thaq hal kovq-ail. 31 Yu-i mail nuljuq bhai, khal bhi nl bhiq movq nail khe-ai, nuljuq iqsanl, yu bhai nl bhiq yaoq.

32 Nuljuq bhai gaiq-a nail tsaol-aq bhai taivq-ail, nuljuq gaiq-a haq neq, nuljuq nail haqbhoil, khul nail geeqlaoq ya nail-aiq. Oeqbal yaq juq iqsanl, aqyu juq bhai gaiq-a nail tsaol-aq juq bhai gaiq-a nail ngaol. 33 Nuljuq bhai aqmeeq phaq nl lavq nail tsaol-aq bhai taivq-ail, nl kovq bhiq haq neq, nuljuq nail haqbhoil khul nail geeqlaoq ya nail-aiq. Oeqbal yaq juq iqsanl, alhai nl kovq bhiq nail heeq nia nail ngaol. 34 Bivq kovq lavq nia nail tsaol-aq juq bhai taivq-ail, phal bhiq haq neq, nuljuq khul nail geeqlaoq ya nail-aiq. Oeqbal yaq juq iqsanl, alhai ya kovq dai, aqyu juq nail gaiqlaq bhai phal bhiq nail ngaol. 35 Nuljuq bhai neejiav jiav nail tsaol-aq bhai gaiq-a khi, aqmeeq phaq nl bhiq yaoq. Ya kovq nail bhai maq saol-nvq mail, phal bhiq yaoq. Alhai nl haq neq, nuljuq nail kovpavq eeq deedee khi, nuljuq eeq dee heel deedee nail Miqyail nail yaq, pevq lal nail ngaol. Khul khi mail dai ngal-aq neq, yu nail geeqlaoq bhai maq noeq moel nia nail tsaol-aq bhai maqkhaiq, haqeiv nail tsaol-aq bhai maqkhaiq, aivq geeqlaoq nl bhiq nail ngaol. 36 Nuljuq nail Aqbhu Miqyail gaoqhaq gaiq-a nia nail khe-ai, nuljuq iqsanl, gaoqhaq gaiq-a nia nail neema aol yaoq” dai, ge bhiq-a nail ngaol.

37 Yeiqsul gaoq ge nail: “Nuljuq yu nail kovtavq bhai oeqbal thaq thaq. Maq thaq haq neq, nuljuq iqsanl oeqbal thaq nail bhai maq ya daq-ail. Yu bhai yalkhaq thaq dal. Maq dal haq neq, nuljuq iqsanl, yalkhaq dal nail phaq bhai maq ya daq-ail. Yu-i mail nl laiq-a nail oeqbal bhai, phaiq bhiq yaoq. Phaiq bhiq haq neq, nuljuq-i mail nl laiq-a nail oeqbal bhai iqsanl, yu phaiq lavq nail ngaol. 38 Yu bhai bivq yaoq. Bivq haq neq, nuljuq bhai gaoq bivq kovq lavq nail ngaol. Bivq kovq lavq-u phao, eeq jaiq nail pheeqdeel-i mail khuq bhoel lavq nail nee ovqtavq, bhee khal ail-u kev dai, ngaoq thel ngaoq thel-ail, nuljuq nail pheeqdeel bhai, hoel bhoel lavq nail ngaol. Khul khi mail dai ngal-aq neq, nuljuq yu bhai phaiq bhiq hav bhiq-a nail khe-ai, nuljuq bhai iqsanl, phaiq kovq hav kovq lavq nail ngaol” dai, ge bhiq-a nail ngaol.

39 Al ovqtavq, Yeiqsul aqyu juq bhai daoqma uqhuq daoq nee mail, gaoq cavq gaoq cov bhiq-a nail: “Maivpeivq aqtsaoq maivpeivq gailkhaol hevq daiq nia naol laiq. Aqyu nvq gaq nvq gaq-ail, khaqduq bhai ga bhoel-ail nail, maq ngel-ail laiq. 40 Yaqlaol neq, yovqgavq nail saqlaq nee maqtsil maq eeq-ail. Thailhai ngaol-aoq, saqlaq-i mail aqmeeq-ai cavq bhiq cov bhiq-a nail khe-ai, saol gil-a nail yaoq gaq yaoq-ao nee mail, yovqgavq nail saqlaq khe-ai pevq lal nail ngaol.

41 Nuljuq nail maivneev lavqkhoel khe aol nail thaiq bhai, maq saol-nvq mail, khul khi mail, nuljuq nail aqivq jaqbheq nail maivneev lavqkhoel khe aol nail maivpeivq bhai, heldaiq nail-aiq. 42 Yovqgavq nail maivneev lavqkhoel khe aol nail thaiq bhai, maq moel nia mail, ‘Aqivq jaqbheq-ol, naoq nail maivneev lavqkhoel khe aol nail maivpeivq koev dov lavq bhel’ dai, khul khi mail, naoq nail aqivq jaqbheq bhai ge bhiq nail-aiq. Goiqbhaoq bhaoq nail tsaol-aq juq-ol, naoq nail maivneev lavqkhoel khe aol nail thaiq bhai iqmoeq bavq dov yaoq. Alhai ngal neq, naoq nail aqivq jaqbheq nail maivneev lavqkhoel khe aol nail maivpeivq bhai khalhai ya koev dov nail-aiq dai, naoq bhai aqmeeq-ai moel lal nail ngaol” dai, ge bhiq-a nail ngaol.

43 Yeiqsul gaoq ge nail: “Aqbhaol aqmeeq neq, maq meeq nail aqheeq heeq lee nail teevq bhaol-ail, maq jiav-ail. Alhai dul dai, maq meeq nail aqbhaol iqsanl, aqheeq aqmeeq heeq lee nail teevq bhaol-ail, maq jiav-ail. 44 Khul khi mail dai ngal-aq neq, aqheeq bhai heldaiq haq neq, aqbhaol yaoq bhaol yaoq-ao nee heeq kivq nail ngaol. Aqgoe aqbhaol bhai, heeqguq aqheeq maq koevq daiq-al. Aqgoe jiavbuv bhai, aqheeq tsilju nail aqheeq maq koevq daiq-al. 45 Tsaol-aq aqmeeq neq, yovqgavq nail neema lavqkhoel nee, aqmeeq phaq oil bhoel nail aqduq nee mail, aqmeeq phaq oil dol lavq nail ngaol. Haqeiv nail tsaol-aq neq, yovqgavq nail neema lavqkhoel nee, haqeiv nail phaq oil bhoel nail aqduq nee mail, haqeiv nail phaq oil dol lavq nail ngaol. Khul khi mail dai ngal-aq neq, neema lavqkhoel bhai teevq bhee aol nail khe-ai, moeqthaoq ge dol lavq nail ngaol” dai, ge bhiq-a nail ngaol.

46 Yeiqsul gaoq ge nail: “Ngaq-i mail ge-ai thaq nail khe-ai nuljuq maq nl nail bhai, khul khi mail ngaq bhai, ‘Heeqphaq-ol, Heeqphaq-ol’ dai, khul nail-aiq. 47 Ngal jaol nail bha lal khi, ngal cavq nail cov nail daoq gaiq khi, naldaiq khi tsaothe nail tsaol-aq yaoq gaq yaoq-ao nee, khalheel nail tsaol-aq khe-ai dul nail-aiq dai, ngal nuljuq bhai cavq lavq bhel. 48 Ilkhaol cov-u phao, ilkhel aqnavq navq dai duq khi lovmav kovtavq bhai cov thaq nail tsaol-aq khe-ai, dul nail ngaol. Ulcuvq eeq lee khi, ulcuvq eelkhaol ilkhaol al il bhai tsiq thaoq tsiq tuv lal khi ngaol-aoq, ivqdao dai cov-ai thaq nail ngel-i mail, maq luv maq lav lal-ail. 49 Thailhai ngaol-aoq, ngal cavq nail cov nail daoq gaiq khi, maq naldaiq maq tsaothe nail tsaol-aq neq, ilkhel aqnavq navq dai-iq maq duq, lovmav kovtavq bhai-iq maq cov mail, miltsaq kovtavq bhai taivq-ail ilkhaol cov thaq nail tsaol-aq khe-ai dul nail ngaol. Ulcuvq eeq lee khi, ilkhaol al il bhai tsiq thaoq tsiq tuv lal-u phao, teevq pov nee tsuq ail nail ngaol. Tsuq ail-a nail al neq, tsuq peiv tsuq leiv gil-ail nail ngaol” dai, cavq bhiq cov bhiq-a nail ngaol.