3
Tiyarafenu Akhafana An Dakhen Ma Van Baya Ino
* Yon 1:12-13; 16:3Tiyarafenu ano vei anunu moéken tetimpin banaráken te sikhafana oe sen tariyá mai fura sé ben akhafanan bá tiféuno! Máan tukhé tifé umpo varará nanin banta ano Tiyarafenu ída afová ukhen pasen mi ven akhafana ma vá tiferuna mai ída afová ukhen mino. * 2Ko 3:18Téi ma sinunu ukheruna sirona kéka soe, inka setí ankan Tiyarafenu akhafanaí ukhé tiféuno. Yisas Karaisi ma erin nain damú inté ukhein bukhafa vasá bá tifante rafu mai ída afová ukhé tifé umpo véi ma erin nain damúi fura sé ben an davé tifékun mi mai ma vaintá béi fara vantí oná tifanté uno. Mai van ma mumunan in nain kéká anon Yisas Karaisi ma avusese ukhein an den avusese ukhen banten mino.
Umeí ma iyain nanin banta anon Tiyarafenui man baya yurafuriyan mino. Mai fara vara seyo, ume avúavá ma variyain mai Tiyarafenui man bayan durafuriyan mino. * Yon 1:29; 1Pi 2:22‑24; 1Yn 2:2Yisas Karaisimpin ída ume vákan mi setisi ume yo arútintano van béi erikhayai siretí ankan afová ukha ono. Máan tukhantin béin má ma van nain nanin banta ano ída umeí iyan banten mino. Inká ume avúavá ma varen oriyan bain kayo ano véin ída afová en onten mino.
Téi ma sinunu ukheruna iyampon kayo oe, ída vá áesin manáa kéká ano siretin mákáden tavifá aviren orino. Yisas Karaisi funtákein bantan bákan ben an ma yákein nanin banta anon puntákein avúavá ana varé iyan mino. * Yon 8:44Máan tiyan mifo vanasi ano ma fara umeíen oriyan banten mai ma araíintá umeí ukhein bantan Ban Anon bákan mi veni kékái vá uno sen aní iyan mino. Máan tiyan mifo Ban Anoni yoran ma varé ein morun asuse ono van mi Tiyarafenu Anin mano eren mino. * 1Yn 5:18Tiyarafenui kékápin ma afoká ukhein nanin banta ano veni avúavá bái váken ída umeíen oriyan bá é iyan mino. Tiyarafenun pintéi afoká ukhen pasen betí ankan ída umeíen oriyan banten mino. 10 Máan tukhanti inte kékasá Tiyarafenu ina van ná inká inte kékasá Ban Anon nina van nafi mai saréan afová ó tifanté uno. Tiyarafenui man baya ánain ma ída vákuren ma inká afá aváen nan ma ída anunu iyain kéká mai ída Tiyarafenu akhafana ino.
Ena Vá Ma Avabá In Maran In Baya Ino
11  * Yon 13:34Esé araíintá ma inikharé é tiferuna vaya mai ena vasá avábá in maran onon tikharen mino. 12  * Esé 4:8Keni ma Ban Anoni kékasí uven ma ve afá aruan purein an ída vá dá tifano. Mai fará béin aruan puren nafino. Mai fara va ino. Keni namu avúavá bariyan maen be afá ano funtákein avúavá bariyaréin pasen mi máan ten mino. 13  * Yon 5:18-19Máan tukhein nará mumunan tiyofi sifá tiváeyan noe, varará nanin banta ano ma siretin namu uantantiya mai van ída vá anú duman duman ono.
14  * Yon 5:24Mumunan tiyofi sifá tiváeyan ma avábá ó tifanté mairái furin pinté esanté para ma ayun ban oriyan ban aunampin oré uno sé afová ó tifanté uno. Máan ó tifanté umpo avábá in avúavá ma ída vain kéká ano fara fúken ban mino. 15  * Rev 21:8Mana vanta ano ma monó nanin banta ma namuroí uanté iyain mai vetin mi aruan puriyan mino. Banta ma aruan puriyain kékápin mi ayun ma fara van aunan ída váka siretí ankan afová ukha ono. 16  * Yon 13:1; Kar 1:4Yisas Karaisi ma ve aunan tetin timikhein mai fura avábái vá tetí ankan afová ukhé tiféuno. Máan ma ukhein nará teti siyofi sifá tiváen naro siré tetisi saunan má dere vá ampiádá tifano. 17  * Diu 15:7Máan tukhen mifo mana vanta ano ma kokhon danasinta kaúdáken ma amusin iyantin ma ve afá aváe ano manáa yana san ma o afasí ukhantin ma ída aya inten mai inté uren ná Tiyarafenui avábá ano mai vantafin banten nafino.
18  * Yem 2:15-16Téi ma sinunu ukheruna iyampon kayo oe, setí ankan ída vá bayafó ana ena avábá iyá uno sé tifan numpo sivútivá pókesá pura sé aní ó tifano. 19 Pura sikhein avúavá ánain mi vákuriyan mino sen tetisi sivútivá anon aní intíi afová iyáké ída feranton kasaé Bafan avorá o mantá tifanté uno. 20 Máan tiyákun maen tetin tú bá inin má ano ma ume nanin banta ono sen tisimiyantí maé ída feran kasaé ben avorá o mantanté uno. Mai fara vara seyo, Tiyarafenu ano setin tú bá inin má esantakhen pasen pefái minó afová ukhen mino.
21  * Ibu 4:16Téi ma sinunu ukheruna sirona kéka soe, setin tú bá inin má ano sisimen ma ída umeí ukha ono ma sin nain manon ákona simintí ída feran kasaé Tiyarafenu avorá o mantá tifanté uno. 22 Mantakhé oo yaiyiyáké béi ma amusin ukhein danasinta anan bariyá tifékun pasen mi inan ma senuna yaná kasaen timinten mino. 23  * Yon 6:29; 13:34Béi ma sikheiní esá ben anin Yisas Karaisin avíká mumunan iyá ena nanin banta vasá avábá in maran ó tifano. Máan ma in avúavái veni man baya van mino. 24  * 1Yn 4:13Tiyarafenui man baya ánain ma vákuriyain kayo anon béin má manafin bákan inká béi vetin má ban mino. Kantá Aunan ma setin timikhein manon aní íkái Tiyarafenu ano setin má ban mino sé afová ukhé tiféuno.

*3:1: Yon 1:12-13; 16:3

*3:2: 2Ko 3:18

*3:5: Yon 1:29; 1Pi 2:22‑24; 1Yn 2:2

*3:8: Yon 8:44

*3:9: 1Yn 5:18

*3:11: Yon 13:34

*3:12: Esé 4:8

*3:13: Yon 5:18-19

*3:14: Yon 5:24

*3:15: Rev 21:8

*3:16: Yon 13:1; Kar 1:4

*3:17: Diu 15:7

*3:18: Yem 2:15-16

*3:21: Ibu 4:16

*3:23: Yon 6:29; 13:34

*3:24: 1Yn 4:13