SALMOS
Tx'olbil Xo'l Yi Liwre'j
Yi liwre'j, i'tz chibitzbil yi e' xonl Israel. Ej nin at wi'nin oración tul. Ja xcon sajle'n tu nintz cya'n kajwutz tan tak'le'n k'ej Ryos te yi na cho'c tan nachle'n Ryos tulak chicmon. Ncha'tz i'tz jun liwr tetz poesia, nin na jilon mas tib Ryos swutz alchok jilwutz liwr yi at tul Yol Kataj. At 150 salmo tul yi liwre'j, nin at o' wekl yi liwr.
Yi na tzaj wi' yi wi'tzbil capítulo te jujun wekla'tz na tzajpon tan jun nka cobox versículo yi na tak' k'ej tu k'ajsbil tetz Kataj Ryos.
Te yi 150 salmoa'tz, at jun c'oloj yi stz'ibnak yi rey Luwiy. Ej nin at cobox yi stz'ibnak yi rey Salomón, nin at coboxt yi chitz'ibnak coboxt yaj. Poro ilenin na na'wsaj chibi' tul e'chk salmoa'tz yi nchitz'ib.
At wi'nin jilwutz salmo: At yi ni'cu'n tu jun bitz yi na tak' k'ajsbil tetz Ryos, yi na xcon tan c'u'laje'n i'. Ej nin at salmo yi na xcon tan jakle'n ẍch'eybil ketz. Ncha'tz at salmo yi ba'n na xcon ka'n tan jakle'n cuybil kapaj nka tan jakle'n chicaws yi e' kacontr.
Yi weklil yi liwre'j
Yi bajx wekl i'tz (Cap. 1–41).
Yi ca'p wekl i'tz (Cap. 42–72).
Yi toxe'n wekl i'tz (Cap. 73–89).
Yi cyaje'n wekl i'tz (Cap. 90–106).
Yi to'i'n wekl i'tz (Cap. 107–150).
BAJX WEKL TE E'CHK SALMO
1
1:1—41:13
Yi e' yi at banl Kataj squibaj
1 Ba'n cyeri e' yi qui na chixom te cyajtza'kl yi e' mal nak,*Sal 34:14.
yi qui na chixcye' cu'n tan xtxumle'n cyajtza'kl yi e' juchul il,
yi qui na chic'ole' ẍchixo'l yi e' yi na el k'ej Ryos cya'n.
2 Ma na cho'n ajlij chic'u'l te yi ca'wl Kataj yi kaRyosil.
Nin sk'ejl tu lak'bal na chitzan cyera'tz tan xtxumle'n yi e'chk ca'wla'tz.
3 Yi e'a'tz, ni'cu'n tzun quitane'n chi jun wi' tze' yi awij stzi' a'.†Job 29:19; Jer 17:7-8.
Yi jun tze'a'tz na tak' wutz yi na opon tiempil.
Nin qui'c jun k'ej najk num yi xak.
Ni'cu'n tzun quitane'n cyakil yi e' balaj wunaka'tz, na na wutzin cyakil yi na chiban.
4 Ma yi e' wunak yi cachi' cyajtza'kl, cho'n quitane'n cyetz chi tane'n xak xtze',‡Job 21:18; Jer 13:24; Os 13:3. yi na ben tan cyek'ek'.
5 Cha'stzun te yil tz'oc Ryos tan ma'le'n cyajtza'kl yi e'a's, quil chinimsaj chic'u'l tan chicolol quib, na quibe' tajlal yi e' balaj.
6 Yi e' balaj nak, q'uicy'le'n che' tan Ryos.§Pr 4:18-19; Nah 1:7; Mt 7:13-14.
Ma yi e' mal nak, ẍchisotzok cyera'tz.