2
Yi wi'tz Ajcaw yi bixba'nt tan Ryos
1 ¿Mbi xac na chinil quib wunak tan xtxumle'n oyintzi'?*Yi rey Luwiy i' tz'ibanl tetz yi Sal 2, na ya'tz na tal Hch 4:25. I'tz jun profecía te yi mbi sbajok tzantzaj yil xe'tij Cristo tan cawu'n.
¿Mbi tzuntz na chitzan yi e'chk tnum tan xtxumle'n yi e'chk ajtza'kl yi quil chixcye' te'j?
2 Na ja je chimolol quib cyakil yi e' ajcaw yi ate' bene'n tzi'n wi munt.
Cyakil yi e' bajxoma'tz, junit tane'n chitxumu'n tan contri'n te'j Kajcaw yi bixba'nt tan Ryos tetz cyajcawil cyakil wunak.
Nin je chiyol yi e' contre'j:
3 “Kapak'le' cu'n yi e'chk caren yi at tan katz'amle'n.
Kac'aple' cu'n yi e'chk c'albil ketz.”
4 Ma yi Jun yi cho'n najlij tcya'j, tze'e'n tu' na ban i' scye'j.
Xbajtzi'e'n tu' na ban yi Kataj a'tz scye'j.
5 Cha'stzun te ja je' lajp wi' i' scye'j.
Nin ja saj colp wi' i' tan chiyajle'n.
Nin je yol i'e'j:
6 “In wetz, nchimbixban yi ajcaw yil cawun.
Cho'n bixewe'n wa'n tan cawune'n wi Sión,†“Sión”, na jilon te yi ama'l kale a'te't yi Templo tentz, ncha'tz na jop cyakil yi wi'wtz kale atit yi tnum Jerusalén. yi ama'l yi wi'nin xanil,” stzun Kataj Ryos bantz.
7 Ma jalu' swale' yi xtxolbil yi ja bixe' tan Kataj swe'j:
“Aẍ jun c'oloj incy'ajl.‡2S 7:14; Sal 89:26-27; 110:1-7; Mt 3:17; Ro 1:14; Heb 1:5; 5:5. Jalu' nno'c tetz ataj,” stzun i' swetz.
8 Ncha'tz tal:
“Jakaj cyakil yi e'chk tnum tetz aherens, nin swak'e' tzatz.
Ncha'tz swak'e' cyakil yi e'chk ama'l tzatz yi at bene'n tzi'n wi munt.
9 Che'lk cu'n cyakil yi ajcawa'tz awa'n swutz.
Xitwe' cu'n, chi na cu' pok'lo'n jun ẍwok' tan jun tx'amij yi ch'ich' cu'n,” stzun Wajcaw bantz swetz.
10 Cha'stzun te, e'u' ajcaw, yi e'u' wi'tz pujul chixo'l wunak bene'n tzi'n wi munt, quibit tzaju' inyol.
Lok tz'el chitxumu' te yi xtxolbila'se'j.
Lok cyocsaju' yi makbil chiwutzu'.
11 Lok cho'cu' jak' ca'wl yi Kataj.
Lok cyeku' ẍchi' i'.
Lok chixobu' tetz.
Na kol chibanu' yi xtxolbila'tz, chitzatzink tzunu'-tz.
12 Cyak'e'u' bin k'ej yi Cy'ajol, tan qui cyak'olu' ch'on tetz, nin tan qui chiquime'nu' ta'n.
Na yil je' lajp wi' i', cya'l jun yi nink clax tk'ab.
Ba'n cyeri e' yi cho'n k'uklij chic'u'l te'j i'.
*2:1 Yi rey Luwiy i' tz'ibanl tetz yi Sal 2, na ya'tz na tal Hch 4:25. I'tz jun profecía te yi mbi sbajok tzantzaj yil xe'tij Cristo tan cawu'n.
†2:6 “Sión”, na jilon te yi ama'l kale a'te't yi Templo tentz, ncha'tz na jop cyakil yi wi'wtz kale atit yi tnum Jerusalén.
‡2:7 2S 7:14; Sal 89:26-27; 110:1-7; Mt 3:17; Ro 1:14; Heb 1:5; 5:5.