12
ܡܘܗܒ݂ܬ̈ܐ ܪ̈ܘܚܢܝܐ
1 ܐܲܚܘܿܢܘܵܬܝܼ̈، ܒܘܼܬ ܡܵܘܗܒ݂ܵܬܹ̈ܐ ܪ̈ܘܼܚܵܢܵܝܹܐ ܠܹܐ ܒܵܥܹܝܢ ܕܗܵܘܹܝܬܘܿܢ ܕܠܵܐ ܝܕܵܥܬܵܐ. 2 ܟܹܐ ܝܵܕܥܝܼܬܘܿܢ ܕܐܝܼܡܲܢ ܕܚܲܢܦܹ̈ܐ ܝܬܘܿܢ ܗܘܵܘ، ܟܹܐ ܦܵܝܫܝܼܬܘܿܢ ܗܘܵܘ ܓܪܝܼܫܹܐ ܘܠܘܼܒܠܹܐ ܠܨܵܢܲܡܹ̈ܐ ܕܠܵܐ ܩܵܠܵܐ. 3 ܒܘܼܬ ܐܵܗܵܐ ܡܲܕܘܼܥܵܘܟ݂ܘܿܢ ܝܼܘܸܢ، ܕܠܲܝܬ ܐܢܵܫܵܐ ܕܗܲܡܙܸܡ ܒܪܘܼܚܵܐ ܕܐܲܠܵܗܵܐ ܘܐܵܡܹܪ: ”ܡܘܼܚܪܸܡܵܐ ܝܠܹܗ ܝܼܫܘܿܥ.“ ܘܠܵܐ ܐܘܼܦ ܚܲܕ ܒܸܬ ܐܵܡܹܪ: ”ܝܼܫܘܿܥ ܡܵܪܝܵܐ ܝܠܹܗ،“ ܐܸܠܵܐ ܒܪܘܼܚܵܐ ܕܩܘܼܕܫܵܐ.
4 ܐܝܼܬ ܡܵܘܗܒ݂ܵܬܹ̈ܐ ܦܪ̈ܝܼܫܹܐ، ܐܝܼܢܵܐ ܐܝܼܬ ܚܲܕ ܪܘܼܚܵܐ. 5 ܐܝܼܬ ܚܸܠܡܲܬܹ̈ܐ ܦܪ̈ܝܼܫܹܐ، ܐܝܼܢܵܐ ܐܝܼܬ ܚܲܕ ܡܵܪܝܵܐ. 6 ܐܝܼܬ ܦܘܼܠܚܵܢܹ̈ܐ ܦܪ̈ܝܼܫܹܐ، ܐܝܼܢܵܐ ܐܝܼܬ ܚܲܕ ܐܲܠܵܗܵܐ ܕܟܹܐ ܦܵܠܹܚ ܟܠܔ ܡܸܢܕܝܼ ܒܟܠܵܝܗܝ ܐܢܵܫܹ̈ܐ. 7 ܐܝܼܢܵܐ ܩܵܐ ܟܠܔ ܐܢܵܫܵܐ ܦܝܼܫܵܐ ܝܠܹܗ ܝܘܼܗܒ݂ܵܐ ܓܸܠܝܵܢܵܐ ܕܪܘܼܚܵܐ ܠܝܘܼܬܪܵܢܵܐ ܟܠܵܢܵܝܵܐ، 8 ܣܵܒܵܒ ܩܵܐ ܚܲܕ ܦܝܼܫܬܵܐ ܝܠܵܗ̇ ܝܘܼܗܒܹܠܬܵܐ ܗܹܡܸܙܡܵܢ ܕܚܸܟ݂ܡܬܵܐ ܒܝܲܕ ܪܘܼܚܵܐ، ܘܠܗ̇ܘ ܐܚܹܪܢܵܐ ܦܝܼܫܬܵܐ ܝܠܵܗ̇ ܝܘܼܗܒܹܠܬܵܐ ܗܹܡܸܙܡܵܢ ܕܝܕܵܥܬܵܐ ܗܲܪ ܒܝܲܕ ܗ̇ܘ ܪܘܼܚܵܐ. 9 ܠܚܲܕ ܐܚܹܪܢܵܐ ܦܝܼܫܬܵܐ ܝܠܵܗ̇ ܝܘܼܗܒܹܠܬܵܐ ܗܲܝܡܵܢܘܼܬܵܐ ܗܲܪ ܒܗ̇ܘ ܪܘܼܚܵܐ، ܘܠܗ̇ܘ ܐܚܹܪܢܵܐ ܡܵܘܗܲܒ݂ܬܵܐ ܕܒܲܣܲܡܬܵܐ ܗܲܪ ܒܗ̇ܘ ܪܘܼܚܵܐ. 10 ܠܚܲܕ ܐܚܹܪܢܵܐ ܥܒ݂ܵܕܬܵܐ ܕܚܲܝ̈ܠܹܐ ܓܘܼܪܹ̈ܐ، ܠܗ̇ܘ ܐܚܹܪܢܵܐ ܢܒ݂ܝܼܘܼܬܵܐ. ܠܚܲܕ ܐܚܹܪܢܵܐ ܦܪܵܫܬܵܐ ܒܹܝܠܔ ܪ̈ܘܼܚܹܐ، ܠܗ̇ܘ ܐܚܹܪܢܵܐ ܠܸܫܵܢܹ̈ܐ ܦܪ̈ܝܼܫܹܐ، ܘܠܗ̇ܘ ܐܚܹܪܢܵܐ ܦܲܫܲܩܬܵܐ ܕܠܸܫܵܢܹ̈ܐ. 11 ܐܝܼܢܵܐ ܐܲܢܹܐ ܟܠܵܝܗܝ ܦܘܼܠܚܵܢܹ̈ܐ ܕܚܲܕ ܪܘܼܚܵܐ ܝܢܵܐ ܐܲܚܟ̰ܝܼ، ܘܟܹܐ ܦܲܠܸܥ ܠܟܠܔ ܐܢܵܫܵܐ ܐܲܝܟ݂ ܕܒܵܣܡܵܐ ܠܹܗ.
ܚܕ ܦܓ݂ܪܐ، ܪܒܐ ܗܕܡ̈ܐ
12 ܗܲܪ ܕܵܐܟ݂ܝܼ ܕܦܲܓ݂ܪܵܐ ܚܲܕ ܝܼܠܹܗ، ܐܝܼܢܵܐ ܐܝܼܬ ܠܹܗ ܪܵܒܵܐ ܗܲܕܵܡܹ̈ܐ، ܐܘܼܦ ܐܸܢ ܕܗܲܕܵܡܘܼ̈ܗܝ ܪܵܒܵܐ ܝܢܵܐ ܐܝܼܢܵܐ ܟܹܐ ܥܵܒ݂ܕܝܼ ܚܲܕ ܦܲܓ݂ܪܵܐ، ܗܵܕܟ݂ܵܐ ܝܠܵܗ̇ ܐܘܼܦ ܒܡܫܝܼܚܵܐ. 13 ܣܵܒܵܒ ܐܲܚܢܲܢ ܟܠܲܢ ܦܝܼܫ ܠܲܢ ܥܡܝܼܕܹܐ ܒܚܲܕ ܪܘܼܚܵܐ ܓܵܘ ܚܲܕ ܦܲܓ݂ܪܵܐ، ܐܸܢ ܝܗܘܼܕܵܝܹ̈ܐ ܝܲܢ ܝܵܘܢܵܝܹ̈ܐ، ܐܸܢ ܥܲܒ݂ܕܹ̈ܐ ܝܲܢ ܚܹܐܪܹ̈ܐ. ܟܠܲܢ ܦܝܼܫ ܠܲܢ ܡܘܼܫܬܝܼܹܐ ܚܲܕ ܪܘܼܚܵܐ،
14 ܣܵܒܵܒ ܦܲܓ݂ܪܵܐ ܠܹܐ ܝܠܹܗ ܦܝܼܫܵܐ ܥܒ݂ܝܼܕܵܐ ܡ̣ܢ ܚܲܕ ܗܲܕܵܡܵܐ ܐܸܠܵܐ ܡ̣ܢ ܪܵܒܵܐ. 15 ܐܸܢ ܐܲܩܠܵܐ ܐܵܡܪܵܐ: ”ܣܵܒܵܒ ܠܹܐ ܝܘܵܢ ܐܝܼܕܵܐ، ܐܵܢܵܐ ܠܹܐ ܝܘܵܢ ܚܲܕ ܣܵܗܡܵܐ ܡ̣ܢ ܦܲܓ݂ܪܵܐ،“ ܠܹܐ ܒܵܛܠܵܐ ܕܗܵܘܝܵܐ ܚܲܕ ܣܵܗܡܵܐ ܡ̣ܢ ܦܲܓ݂ܪܵܐ؟ 16 ܘܐܸܢ ܢܵܬܵܐ ܐܵܡܪܵܐ: ”ܣܵܒܵܒ ܠܹܐ ܝܘܵܢ ܥܲܝܢܵܐ، ܐܵܢܵܐ ܠܹܐ ܝܘܵܢ ܚܲܕ ܣܵܗܡܵܐ ܡ̣ܢ ܦܲܓ݂ܪܵܐ،“ ܠܹܐ ܒܵܛܠܵܐ ܕܗܵܘܝܵܐ ܚܲܕ ܣܵܗܡܵܐ ܡ̣ܢ ܦܲܓ݂ܪܵܐ؟ 17 ܐܸܢ ܟܠܹܗ ܦܲܓ݂ܪܵܐ ܗܵܘܹܐ ܗܘܵܐ ܥܲܝܢܵܐ، ܐܲܝܟܵܐ ܒܸܬ ܗܵܘܝܵܐ ܗܘܵܐ ܫܡܵܥܬܵܐ؟ ܘܐܸܢ ܟܠܹܗ ܦܲܓ݂ܪܵܐ ܗܵܘܹܐ ܗܘܵܐ ܢܵܬܵܐ، ܐܲܝܟܵܐ ܒܸܬ ܗܵܘܝܵܐ ܗܘܵܐ ܫܩܵܠܬܵܐ ܕܪܹܝܚܵܐ؟ 18 ܐܝܼܢܵܐ ܐܵܕܝܼܵܐ، ܐܲܠܵܗܵܐ ܡܘܼܪܝܸܙ ܠܹܗ ܠܗܲܕܵܡܹ̈ܐ ܕܓܵܘ ܦܲܓ݂ܪܵܐ ܟܠܔ ܚܲܕ ܒܕܘܼܟܹܗ، ܐܲܝܟ݂ ܕܒܣܝܼܡ ܠܵܗ̇ ܠܹܗ. 19 ܐܸܢ ܗܵܘܝܼ ܗܘܵܘ ܟܠܵܝܗܝ ܚܲܕ ܗܲܕܵܡܵܐ، ܕܵܐܟ݂ܝܼ ܒܸܬ ܗܵܘܹܐ ܗܘܵܐ ܦܲܓ݂ܪܵܐ؟ 20 ܐܝܼܢܵܐ ܐܲܝܟ݂ ܕܝܼܠܹܗ، ܐܝܼܬ ܪܵܒܵܐ ܗܲܕܵܡܹ̈ܐ ܐܝܼܢܵܐ ܚܲܕ ܦܲܓ݂ܪܵܐ ܝܠܹܗ.
21 ܥܲܝܢܵܐ ܠܹܐ ܡܵܨܝܵܐ ܐܵܡܪܵܐ ܠܐܝܼܕܵܐ: ”ܠܹܐ ܝܘܵܢ ܣܢܝܼܩܬܵܐ ܐܸܠܵܟ݂ܝ،“ ܘܪܹܝܫܵܐ ܠܹܐ ܡܵܨܹܐ ܐܵܡܹܪ ܠܐܲܩܠܵܐ، ”ܠܹܐ ܝܘܸܢ ܣܢܝܼܩܵܐ ܐܸܠܵܟ݂ܝ.“ 22 ܐܸܠܵܐ ܒܘܼܫ ܙܵܘܕܵܐ، ܗܲܕܵܡܹ̈ܐ ܕܟܹܐ ܚܵܫܒܲܚ ܠܗܘܿܢ ܒܘܼܫ ܡܚܝܼܠܹ̈ܐ، ܐܝܼܬ ܣܢܝܼܩܘܼܬܵܐ ܒܘܼܫ ܪܵܒܵܐ ܥܲܠܵܝܗܝ. 23 ܘܐܵܢܝܼ ܗܲܕܵܡܹ̈ܐ ܕܟܹܐ ܚܵܫܒܲܚ ܠܗܘܿܢ ܒܘܼܫ ܒܵܨܘܿܪܹ̈ܐ ܓܵܘ ܦܲܓ݂ܪܵܐ، ܒܘܼܫ ܙܵܘܕܵܐ ܟܹܐ ܡܝܲܩܪܲܚ ܠܗܘܿܢ، ܘܐܵܢܝܼ ܗܲܕܵܡܹ̈ܐ ܕܢܟܸܦܬܵܐ ܝܢܵܐ، ܒܐܵܕܵܒܘܼܬܵܐ ܟܹܐ ܚܵܫܒܲܚ ܠܗܘܿܢ، 24 ܟܲܕ ܗܲܕܵܡܲܢ̈ ܕܐܝܼܩܵܪܵܐ ܠܲܝܬ ܠܗܘܿܢ ܣܢܝܼܩܘܼܬܵܐ، ܐܝܼܢܵܐ ܐܲܠܵܗܵܐ ܡܘܼܪܝܸܙ ܠܹܗ ܗܲܕܵܡܹ̈ܐ ܕܦܲܓ݂ܪܵܐ، ܘܝܘܼܗܒܹܠܔ ܠܹܗ ܐܝܼܩܵܪܵܐ ܙܵܘܕܵܐ ܠܗܲܕܵܡܹ̈ܐ ܕܝܼܗܘܵܘ ܣܢܝܼܩܹܐ، 25 ܕܠܵܐ ܗܵܘܹܐ ܦܘܼܠܵܓ݂ܵܐ ܓܵܘ ܦܲܓ݂ܪܵܐ ܐܸܠܵܐ ܟܠܔ ܗܲܕܵܡܵܐ ܐܵܟܹܠܔ ܚܲܡ ܗܲܪ ܕܗ̇ܘ ܐܚܹܪܢܵܐ. 26 ܐܸܢ ܚܲܕ ܗܲܕܵܡܵܐ ܓ̰ܲܢܓ̰ܸܪ، ܟܠܵܝܗܝ ܗܲܕܵܡܹ̈ܐ ܟܹܐ ܓ̰ܲܢܓ̰ܸܪܝܼ ܥܲܡܹܗ، ܘܐܸܢ ܚܲܕ ܗܲܕܵܡܵܐ ܦܵܐܹܫ ܡܝܘܼܩܪܵܐ، ܟܠܵܝܗܝ ܗܲܕܵܡܹ̈ܐ ܟܹܐ ܦܵܨܚܝܼ.
27 ܗܵܕܟ݂ܵܐ، ܐܲܚܬܘܿܢ ܝܼܬܘܿܢ ܦܲܓ݂ܪܵܐ ܕܡܫܝܼܚܵܐ، ܘܟܠܔ ܚܲܕ ܡܸܢܵܘܟ݂ܘܿܢ ܗܲܕܵܡܵܐ ܝܠܹܗ ܓܵܘܹܗ. 28 ܘܡܘܼܬܸܒ݂ ܠܹܗ ܐܲܠܵܗܵܐ ܓܵܘ ܥܹܕܬܵܐ ܩܲܕܡܵܝܬܵܐ ܫܠܝܼܚܹ̈ܐ، ܘܕܬܪܹܝ ܢܒ݂ܝܼܹ̈ܐ، ܘܕܬܠܵܬܵܐ ܡܲܠܦܵܢܹ̈ܐ؛ ܒܵܬܪ ܗܵܕܵܐ ܥܵܒ݂ܕܵܢܹ̈ܐ ܕܚܲܝ̈ܠܹܐ ܓܘܼܪܹ̈ܐ، ܘܐܵܢܝܼ ܕܐܝܼܬ ܠܗܘܿܢ ܡܵܘܗܒ݂ܵܬܹ̈ܐ ܕܒܲܣܲܡܬܵܐ، ܘܐܵܢܝܼ ܕܡܵܨܝܼ ܗܲܝܸܪܝܼ ܠܐܚܹܪ̈ܢܹܐ، ܘܐܵܢܝܼ ܕܐܝܼܬ ܠܗܘܿܢ ܡܵܘܗܲܒ݂ܬܵܐ ܕܬܲܓܒܲܪܬܵܐ، ܘܐܵܢܝܼ ܕܗܲܡܙܸܡܝܼ ܒܠܸܫܵܢܹ̈ܐ ܦܪ̈ܝܼܫܹܐ. 29 ܩܵܡܘܿ ܟܠܵܝܗܝ ܫܠܝܼܚܹ̈ܐ ܝܢܵܐ؟ ܝܲܢ ܟܠܵܝܗܝ ܢܒ݂ܝܼܹ̈ܐ ܝܢܵܐ؟ ܝܲܢ ܟܠܵܝܗܝ ܡܲܠܦܵܢܹ̈ܐ ܝܢܵܐ؟ ܝܲܢ ܟܠܵܝܗܝ ܥܵܒ݂ܕܵܢܹ̈ܐ ܕܚܲܝ̈ܠܹܐ ܓܘܼܪܹ̈ܐ ܝܢܵܐ؟ 30 ܝܲܢ ܟܠܵܝܗܝ ܐܝܼܬ ܠܗܘܿܢ ܡܵܘܗܒ݂ܵܬܹ̈ܐ ܕܒܲܣܲܡܬܵܐ؟ ܝܲܢ ܟܠܵܝܗܝ ܟܹܐ ܗܲܡܙܸܡܝܼ ܒܠܸܫܵܢܹ̈ܐ؟ ܝܲܢ ܟܠܵܝܗܝ ܟܹܐ ܦܲܫܩܝܼ؟ 31 ܛܥܹܝܡܘܼܢ ܡ̣ܢ ܟܠܹܗ ܠܸܒܵܘܟ݂ܘܿܢ ܡܵܘܗܒ݂ܵܬܹ̈ܐ ܒܘܼܫ ܓܘܼܪܹ̈ܐ.
ܐܝܼܢܵܐ ܐܵܕܝܼܵܐ ܒܸܬ ܡܲܚܙܸܢܵܘܟ݂ܘܿܢ ܐܘܼܪܚܵܐ ܒܘܼܫ ܨܦܵܝܝܼ.