22
ܠܪܝܫ ܓܘܕܐ ܕܙܡܪ̈ܐ. ܥܠܔ ܐܲܝܠܸܬ ܫܵܚܲܪ. ܡܙܡܘܪܐ ܕܕܘܝܕ.
1 ܐܲܠܵܗܝܼ، ܐܲܠܵܗܝܼ، ܩܵܡܘܿܕܝܼ ܫܒ݂ܝܼܩܸܢܘܼܟ݂،
ܪܸܚܩܵܐ ܡ̣ܢ ܦܘܼܪܩܵܢܝܼ ܘܡ̣ܢ ܗܹܡܸܙܡܵܢܹ̈ܐ ܕܓܥܵܝܬܝܼ؟
2 ܐܲܠܵܗܝܼ، ܒܸܩܪܵܝܵܐ ܝܘܸܢ ܒܐܝܼܡܵܡܵܐ ܘܠܹܐ ܝܘܸܬ ܓ̰ܲܘܘܼܒܹܐ،
ܘܒܠܲܝܠܹܐ، ܘܠܲܝܬ ܫܠܵܝܬܵܐ ܐܸܠܝܼ.
3 ܘܐܲܢ݇ܬ ܩܲܕܝܼܫܵܐ ܝܘܸܬ،
ܝܵܬܒ݂ܵܢܵܐ ܒܫܘܼܒ݂ܚܹ̈ܐ ܕܐܝܼܣܪܵܐܹܝܠܔ.
4 ܒܝܼܘܼܟ݂ ܣܒܝܼܪܗܘܿܢ ܐܲܒ݂ܵܗܵܬܲܢ̈،
ܣܒܝܼܪܗܘܿܢ ܒܝܼܘܼܟ݂، ܘܦܘܼܨܝܵܝ ܠܘܼܟ݂.
5 ܐܸܠܘܼܟ݂ ܡܘܼܩܘܸܚ ܠܗܘܿܢ، ܘܦܝܼܫ ܠܗܘܿܢ ܦܘܼܪܩܹܐ،
ܒܝܼܘܼܟ݂ ܣܒܝܼܪܗܘܿܢ، ܘܠܵܐ ܢܟ݂ܝܼܦ ܠܗܘܿܢ.
6 ܐܝܼܢܵܐ ܐܵܢܵܐ ܬܸܘܸܠܥܵܐ ܝܘܸܢ ܘܠܵܐ ܐܢܵܫܵܐ،
ܠܵܘܡܵܐ ܕܒܲܪܢܵܫܵܐ ܘܡܘܼܣܠܝܼܵܐ ܒܥܲܡܵܐ.
7 ܟܠܵܝܗܝ ܚܵܙܝܵܢܝܼ̈ ܟܹܐ ܡܲܣܚܸܪܝܼ ܒܝܼܝܼ،
ܟܹܐ ܡܲܦܟ̰ܸܠܝܼ ܦܘܼܡܵܐ، ܟܹܐ ܫܵܥܫܝܼ ܪܹܝܫܵܐ، ܒܹܐܡܵܪܵܐ:
8 ”ܕܵܪܹܐ ܣܲܒ݂ܪܹܗ ܥܲܠܔ ܡܵܪܝܵܐ، ܕܗ̇ܘ ܦܲܨܹܐ ܠܹܗ،
ܫܒ݂ܘܿܩ ܦܲܪܸܩ ܠܹܗ ܒܗ̇ܝ ܕܟܹܐ ܒܵܣܡܵܐ ܠܹܗ ܒܝܼܹܗ.“
9 ܣܵܒܵܒ ܐܲܢ݇ܬ ܝܼܘܸܬ ܦܲܠܛܵܢܝܼ ܡ̣ܢ ܒܲܛܢܵܐ،
ܘܥܒ݂ܝܼܕ ܠܘܼܟ݂ ܕܣܵܒܪܹܢ ܒܝܼܘܼܟ݂ ܥܲܠܔ ܨܲܕܪ̈ܵܢܹܐ ܕܝܸܡܝܼ.
10 ܕܝܼܘܼܟ݂ ܗܘܹܐ ܠܝܼ ܡ̣ܢ ܡܲܪܒܥܵܐ،
ܐܲܠܵܗܝܼ ܝܘܸܬ ܐܲܢ݇ܬ ܡ̣ܢ ܒܲܛܢܵܐ ܕܝܸܡܝܼ.
11 ܠܵܐ ܪܵܚܩܹܬ ܡܸܢܝܼ ܒܗ̇ܝ ܕܩܘܼܪܒܵܐ ܝܠܹܗ ܥܵܘܩܵܢܵܐ،
ܒܗ̇ܝ ܕܠܲܝܬ ܗܲܝܸܪܵܢܵܐ.
12 ܩܵܡ ܚܲܪܕܝܼ ܠܝܼ ܬܵܘܪܹ̈ܐ ܪܵܒܵܐ،
ܩܵܡ ܟܵܪܟ݂ܝܼ ܠܝܼ ܬܵܘܪܹ̈ܐ ܙܲܪ̈ܒܵܢܹܐ ܕܒܲܝܫܵܢ.
13 ܦܬܝܼܚ ܠܗܘܿܢ ܥܲܠܝܼ ܦܘܼܡܵܝܗܝ،
ܐܲܝܟ݂ ܐܲܪܝܵܐ ܦܵܪܘܿܛܵܐ ܘܓܲܪܓܸܡܵܢܵܐ.
14 ܐܲܝܟ݂ ܡ̈ܝܼܵܐ ܦܝܼܫ ܠܝܼ ܫܘܼܦܟ݂ܵܐ،
ܘܫܪܹܐ ܠܗܘܿܢ ܟܠܵܝܗܝ ܓܲܪܡܝܼ،
ܗܘܹܐ ܠܹܗ ܠܸܒܝܼ ܐܲܝܟ݂ ܫܲܡܲܥ،
ܦܫܝܼܪܹܗ ܒܓܵܘܵܐ ܕܨܲܕܪܝܼ.
15 ܒܪܝܼܙ ܠܹܗ ܐܲܝܟ݂ ܦܹܚܵܪܵܐ ܚܲܝܠܝܼ،
ܘܠܸܫܵܢܝܼ ܫܸܥܝܵܐ ܝܠܹܗ ܠܫܵܡܵܟܝܼ،
ܘܩܵܡ ܡܲܬܒܸܬ ܠܝܼ ܠܥܲܦܪܵܐ ܕܡܵܘܬܵܐ.
16 ܒܗ̇ܝ ܕܩܵܡ ܚܲܪܕܝܼ ܠܝܼ ܟܲܠܒܹ̈ܐ،
ܟܸܢܫܵܐ ܕܒܝܼܫܹ̈ܐ ܩܵܡ ܟܵܪܟ݂ܝܼ ܠܝܼ،
ܒܙܝܼܥ ܠܗܘܿܢ ܠܐܝܼܕܵܬܝܼ̈ ܘܠܐܲܩܠܵܬܝܼ̈.
17 ܡܵܨܹܝܢ ܡܵܢܹܝܢ ܟܠܵܝܗܝ ܓܲܪ̈ܡܝܼ،
ܐܵܢܝܼ ܓܘܼܫܸܩ ܠܗܘܿܢ ܘܚܝܼܪܗܘܿܢ ܒܝܼܝܼ.
18 ܦܘܼܠܸܥ ܠܗܘܿܢ ܓ̰ܘܼܠܝܼ̈ ܒܹܝܠܵܝܗܝ،
ܘܥܲܠܔ ܠܒ݂ܝܼܫܬܝܼ ܕܪܹܐ ܠܗܘܿܢ ܦܸܫܟܵܐ.
19 ܘܐܲܢ݇ܬ، ܝܵܐ ܡܵܪܝܵܐ، ܠܵܐ ܟܵܠܹܝܬ ܪܸܚܩܵܐ،
ܝܵܐ ܚܲܝܠܝܼ، ܡܲܠܝܸܙ ܠܗܲܝܲܪܬܝܼ.
20 ܦܲܨܝܼ ܡ̣ܢ ܣܲܝܦܵܐ ܠܓܵܢܝܼ،
ܡ̣ܢ ܐܝܼܕܵܐ ܕܟܲܠܒܵܐ ܐܝܼܚܝܼܕܵܝܘܼܬܝܼ.
21 ܦܲܪܸܩ ܠܝܼ ܡ̣ܢ ܦܘܼܡܵܐ ܕܐܲܪܝܵܐ،
ܘܦܲܨܝܼ ܠܝܼ ܡ̣ܢ ܩܲܪ̈݇ܢܵܢܹܐ ܕܪ̈ܲܝܡܹܐ.
22 ܒܸܬ ܗܲܩܹܝܢ ܫܸܡܘܼܟ݂ ܠܐܲܚܘܿܢܘܵܬܝܼ̈،
ܒܓܵܘܵܐ ܕܟܸܢܫܵܐ ܒܸܬ ܫܲܒܚܸܢܘܼܟ݂.
23 ܙܕܝܼ̈ܥܹܐ ܕܡܵܪܝܵܐ ܫܲܒܚܘܼܢ ܐܸܠܹܗ،
ܟܠܹܗ ܙܲܪܥܵܐ ܕܝܲܥܩܘܿܒ݂ ܡܝܲܩܪܘܼܢ ܠܹܗ،
ܘܙܕܹܥܡܘܼܢ ܡܸܢܹܗ ܟܠܹܗ ܙܲܪܥܵܐ ܕܐܝܼܣܪܵܐܹܝܠܔ.
24 ܒܗ̇ܝ ܕܠܵܐ ܡܘܼܣܠܹܐ ܠܹܗ ܘܠܵܐ ܓܘܼܢܓܸܙ ܠܹܗ ܡ̣ܢ ܐܘܼܠܨܵܢܵܐ ܕܡܘܼܠܝܸܨܵܐ،
ܘܠܵܐ ܛܘܼܫܹܐ ܠܹܗ ܦܵܬܹܗ ܡܸܢܹܗ،
ܐܸܠܵܐ ܫܡܝܼܥ ܠܹܗ ܟܲܕ ܡܘܼܩܘܸܚ ܠܹܗ ܐܸܠܹܗ.
25 ܡ̣ܢ ܠܟܸܣ ܠܘܼܟ݂ ܝܼܠܵܗ̇ ܬܸܫܒܘܿܚܬܝܼ ܒܟܸܢܫܵܐ ܓܘܼܪܵܐ،
ܢܸܕܪ̈ܝܼ ܒܸܬ ܬܲܡܸܡܸܢ ܩܲܕܡ ܙܕܝܼܥܘܼ̈ܗܝ.
26 ܒܸܬ ܐܵܟ݂ܠܝܼ ܡܸܣܟܹܢܹ̈ܐ ܘܣܵܒ݂ܥܝܼ،
ܒܸܬ ܫܲܒܚܝܼ ܠܡܵܪܝܵܐ ܛܵܥܝܵܢܹ̈ܐ ܐܸܠܹܗ،
ܚܵܝܹܐ ܠܸܒܵܘܟ݂ܘܿܢ ܠܥܵܠܲܡ.
27 ܒܸܬ ܕܵܟ݂ܪܝܼ ܘܕܵܝܪܝܼ ܠܟܸܣ ܡܵܪܝܵܐ ܟܠܵܝܗܝ ܡܲܪ̈ܙܵܢܹܐ ܕܐܲܪܥܵܐ،
ܘܒܸܬ ܣܵܓ݂ܕܝܼ ܩܲܕܡܘܼܟ݂ ܟܠܵܝܗܝ ܫܲܪ̈ܒܵܬܹܐ ܕܐܸܡܘܵܬܹ̈ܐ.
28 ܒܗ̇ܝ ܕܠܡܵܪܝܵܐ ܝܠܵܗ̇ ܡܲܠܟܘܼܬܵܐ،
ܘܗ̇ܘ ܝܼܠܹܗ ܗܲܟܡܵܢܵܐ ܠܐܸܡܘܵܬܹ̈ܐ.
29 ܘܒܸܬ ܐܵܟ݂ܠܝܼ ܘܒܸܬ ܣܵܓ݂ܕܝܼ ܟܠܵܝܗܝ ܥܲܬܝܼܪܹ̈ܐ ܕܐܲܪܥܵܐ،
ܩܲܕܡܘܼܗܝ ܒܸܬ ܟܵܝܦܝܼ ܟܠܵܝܗܝ ܨܵܠܝܵܢܹ̈ܐ ܠܥܲܦܪܵܐ،
ܘܐܘܼܦ ܗ̇ܘ ܕܠܹܐ ܡܵܨܹܐ ܚܲܡܹܐ ܠܵܗ̇ ܓܵܢܹܗ ܚܵܝܬܵܐ.
30 ܙܲܪܥܵܐ ܒܸܬ ܦܵܠܹܚ ܐܸܠܹܗ،
ܒܸܬ ܗܲܩܝܼ ܒܘܼܬ ܡܵܪܝܵܐ ܠܕܵܪܵܐ ܕܐܵܬܹܐ.
31 ܒܸܬ ܐܵܬܝܼ ܘܒܸܬ ܡܲܕܥܝܼ ܙܲܕܝܼܩܘܼܬܹܗ
ܠܥܲܡܵܐ ܕܦܵܐܹܫ ܝܠܝܼܕܵܐ، ܕܗ̇ܘ ܥܒ݂ܝܼܕ ܠܹܗ ܐܵܗܵܐ.