Pauluse eni Sulate ete Pilemone
Lepate Menai
Pauluse inatue sulate meije ete eni ebe Pilemone. Pilemone mere, tamata Kristene sae me rebe irue me kota Kolose. Eni tamata makerike sae me eni nane Onesimuse. Onesimuse inaya bei Pilemone lolete kota Roma. Kena mere, Pauluse ikusu bui me kota Roma le ilepae Sou Misete. Ite rekwa be elia mo po Onesimuse itetue Pauluse me kota Roma kai bei Pauluse eni hnaune, eono Onesimuse iono Kristene.
Eleki Pauluse ibeteke loko Onesimuse leke mise lesire ileu loko elake rebe ikerike eteije. Po Onesimuse rilai kena leu loko Pilemone, inoake be Pilemone ihukumeni le inaya beine. Pauluse ibeteke lokoi be ihukumeni mo. Pauluse ileki sulate etei, kai ikotie beini leke iampune Onesimuse. Hoko, Pauluse eni sulate ete Pilemone meije, ikotie bei Pilemone leke iampune Onesimuse. Ikotie Pilemone itrima suike Onesimuse kena cara misete, iono lokoi saka tamata makerike moneka po iono lokoi saka kwalini rebe esi maka hlaleke esa.
Isi
1. Hlamate (ayate 1-3)
2. Pauluse ikotie trima kasi bei Alla le Pilemone kai ikotie etei (ayate 4-7)
3. Pauluse ikotie bei Pilemone leke irana Onesimuse (ayate 8-22)
4. Hlamate mulini (ayate 23-25)
1
Hlamate
1-3
1-2 Auku ebe Pilemone, au Pauluse, au sakesa kai iteki kwali Timotiuse leki sulate meije etemu. Ale amiki ebe misete, kai ebe makerike kena layani Kristuse! Au leki lekwe ete iteki beta Apia kai ete iteki ebe Arkipuse rebe ilepae Sou misete ktili sakesa kai ite kai ilayani loko Allare ktili lupe itere neka masike supu susate boka bei tamata maketa. Au leki lekwe ete jemate toini rebe esi lupu me amu lumare. Au supu alese meije le au lepae Sou Misete kena Kristuse Yesuse.
Ami kotie loko iteki Alla Amate kai ete Tuhane Yesuse Kristuse ete imi be, “Tuhane Iriluke misete elake rame etesi kai lalesi ndene noma.”
Pauluse ikotie trima kasi bei Alla le Pilemone kai Ikotie etei
4-7
Pela au kotie bei Allare, au kotie ete ale lekwe, au kotie trima kasi ete Alla rame. Le au lene be aoki pusue tamata rebe esi hlaleke loko Allare kai ahlaleke loko Tuhane Yesuse rame. Kai au kotie le ale leke alayani mise sakesa kai tamata rebe hlaleke loko Allare hoko arekwa pusue yelu miseta rebe Alla Iriluke ete ite peneka le bei ahlaleke loko Kristuse. Kwali, laleku ndina kai au supu akbere titinai peneka le aoki tamata rebe esi hlaleke loko Allare. Kwali, aakberesi peneka.
Pauluse ikotie bei Pilemone leke irana Onesimuse
8-22
8-10 Hoko auku ebe, au kotie bei ale leke aono misete ete Onesimuse. Ilupe auku anare neka le ihlaleke loko Yesuse Kristuse bei au atetuke Sou Misete etei kena au mei bui laleije. Masike au rekwa be bei auku kbasare au pleta kena aono saisa rebe suke aonore le aure Kristuse Yesuse Eni maka ulake, po lesi bei mere au pake auku kbasare mo. Au kotie bei ale leke aonoe le ite oki lomai kai ite oki tamata rebe esi hlaleke loko Allare. Au meije tamata ntuane, meije au supu alese lekwe le au layani Kristuse Yesuse. 11 Kena akmenare ikerike tapa ale mise mo le inaya bei ale po pamuli meije namake ikerike tapa ite lua boka.
12 Masike au okini titinaije po meije au ulakeni leu suike lokomu. 13 Au suka irue kaiku ete meije leke iseli ale kena tapa au loko saisa rebe suke atapa au lokore, kena au mei bui lalei meije. Au supu alese le lepae Sou Misete. 14 Po au suka itapa au ete meije mo, sepo lalemu nesa kai au mo. Au suka titinai, sepo lalemu suka titinai kena itapa au. Au suka paksa ale mo.
15-16 Alla Isebeie Onesimuse ikeu bei ale toto mina piseu, leke ileu suike loko ale eti pela. Aranai batuke kena iono tamata makerike rebe kbasa sae mo ete ale moneka, po aranai lupe kwali rebe aokini. Au okini po suke aokini lesi leneka. Le ile amu tamata makerike kai ile tamata rebe Ioki Tuhane lupe ale neka.
17 Hoko, sepo anoake au be amu ebe rebe kerike ete Kristuse sakesa kai ale hoko Onesimuse ileu loko ale, aranai neka, ali lokoi lupe ali loko aure neka. 18 Sepo iono sala sasaisa ete ale, pise iutane sasaisa bei ale, abetekele eteku neka leke au seli etemu. 19 Au ruaku lekie ete meije kena balaku be au Pauluse, pine seli pusue Onisimuse eni utanaru etemu. Anete be autane bei au lekwe, mere lesi bei Onesimuse niere, rebe au tapa ale kena ahlaleke loko Yesuse. 20 Kwali Pilemone, au kotie bei ale leke atapa au mina le ite luare Tuhane Eni tamata. Aranai kai li lokoi mise lupe aakbere tamata jemate toini maketa lekwe, mere aakbere au le ite luare Kristuse Eni tamata. 21 Au leki sulate meije etemu, au hlaleke titinai be, saisa rebe au kotie bei ale, aonoe. Kai au rekwa lekwe be aono boka lesi bei rebe au kotiele.
22 Kai au kotie bei ale leke aknekae amu lumare esi sokati sae eteku, le au hlaleke ktili be bei imi kotie le au loko Allare Ilenele, hoko Iono au supu siri bei bui meije kai leu suike loko imi.
Hlamate mulini
23-25
23 Epaprase, rebe isupu alese mei bui lalei sakesa kai au le ilepae Sou Misete kena Kristuse Yesuse, ibeteke hlamate etemu. 24 Kai auku ebea kena layani sakesa, Markuse, Aristarkuse, Demase kai Lukase lekwe esi beteke hlamate etemu lekwe.
25 Au kotie loko Tuhane Yesuse Kristuse be, “Tuhane, Aono misete elake etesi noma.”
Hlamate, Pauluse