1 Allempoña Jesúspaʼ ahuoʼ yom̃taʼn saʼp Galileaso, ñeñt̃ara saʼp otenet Tiberias. 2 Allñapaʼ cot̃aʼneñ shonteʼ acheñeneshaʼ t̃arroʼmar ñetpaʼ oʼ entuoñet poʼpartsoña att̃o aʼcrratyerran allohuen ñeñt̃ atsnaʼtyets. 3 Oʼña c̈hap yom̃taʼn Jesúsñapaʼ ahuos aspent̃o, allña anorros epuet pueyochreshaʼ. 4 Allempopaʼ oʼ c̈hapmoch pascuapo allempoch alla cosherrerr judioneshaʼ. 5 Jesúsña cohuatsa aʼyopaʼ entapan shonteʼ acheñeneshaʼ ñeñt̃ onac̈hets ñeshonet̃. Allempoñapaʼ atet̃ otan Felipe:

—Errahuachcaʼ yerañt̃aña pant̃eʼ ñeñt̃chaʼ rros acheñeneshaʼ ñeñt̃ oʼ huac̈haʼta.

6 Ñehua, Jesúspaʼ eʼñe poʼtomña atet̃ ot t̃arroʼmar ñapaʼ eñoteñ atet̃chaʼ p̃a. 7 Felipeñapaʼ atet̃ och:

—Amaʼt epoch c̈harroch c̈harraʼ denario*Denariopaʼ quelle ñeñt̃ allpon tsaʼtenet pamt̃arr ñeñt̃ taruasets all paʼnyo. alloch yerañt̃a panpaʼ amaʼt pueshmetat̃ollapaʼ amat̃eʼ rraʼyeseto.

8 Pueyochreshaʼña Andrés ñeñt̃ paʼmoʼnasheñ Simóm Pedropaʼ ñañapaʼ atet̃ och:

9 —Arr puesheñarr huepueshachorpaʼ echenancaʼye amnar pan ñeñt̃ cebada ñam̃a epa cac. Att̃apaʼ amat̃eʼ yepataneto, acheñpaʼ shonteʼcaʼye.

10 Jesúsñapaʼ atet̃ otanet:

—T̃eʼpaʼ sotanet anorrc̈haʼtetepaʼ.

Ñehua, allpaʼ eʼñe cohuen emmoʼraten pasetmaʼ. Ñetñapaʼ anorrchaʼtet. Yacmaneshaʼpaʼ ñatoʼ amnarocht̃eʼ mil eñall. 11 Jesúsñapaʼ chetan panpaʼ parasyosoʼtam̃pes, allempoñapaʼ apan pueyochreshaʼ. Pueyochreshaʼñapaʼ epatyeset allohuen acheñeneshaʼ ñeñt̃ anorrc̈hets all. Att̃ecma p̃a allempo apaʼyesanet ñam̃a cac. Allohuenetpaʼ eʼñe agaphuahuet ñeñt̃ allpon muenaʼyeset. 12 Allempoña oʼ rrallmeʼchuetpaʼ allohuenetpaʼ eʼñepaʼtchaʼ yetrraʼtuahuet. Eʼñe yetuahuetpaʼ Jesúsñapaʼ atet̃ oterranerr pueyochreshaʼ:

—T̃eʼpaʼ oʼch saʼyapac̈herr ñeñt̃ shotnaʼtyets ñeñt̃ saʼpchatyes allochñapaʼ amach es pertatso.

13 Allempoña aʼyapac̈herret ñeñt̃ shotaʼtatyeset c̈hepaʼtchaʼ chorrats c̈harraʼ puechena epa cañt̃er ñeñt̃ aʼpchatet all rratanet amnar pan cebada. 14 Att̃o orrtatanet poʼpartsoña acheñeneshaʼñapaʼ atet̃ otyeset:

—Añña poʼñoc̈hpaʼ ñeñt̃caʼye aʼm̃teneʼ Yompor poʼñoñ ñeñt̃ atarr yecuen oʼch huapa añe patsro.

15 Jesúsñapaʼ eñotanet ñetpaʼ añ muenenet oʼch huapoñetpaʼ oʼch rromoset oʼch noset ñeñt̃chaʼ paʼm̃chaʼtaret̃er pet. Ñeñt̃oʼmarña Jesúspaʼ aʼnahua ahuerr all aspent̃o eʼñe ñapuet̃.

16 Allempoña ellerren pueyochreneshaʼñapaʼ ahuanerret saʼpatop̃ño. 17 Aʼtac̈haʼtuerret poʼnoñt̃opaʼ oʼch ahuam̃perret yom̃taʼn, Capernaumonet̃. Allñapaʼ alla checmetam̃p̃set. Jesúsñapaʼ ama huerraʼ all alloʼtsaʼyenet. 18 Allñapaʼ orrnotam̃pesnomuet, saʼpñapaʼ c̈ha emoʼyarerta. 19 Ñetñapaʼ echotnomuet saʼp amnar amapaʼ pechapt̃eʼ kilómetro allñapaʼ machayot̃epaʼtchaʼ entapet Jesús chopeʼchnen enot̃ oño. Oʼ allameʼttsam̃a p̃an noñt̃. Ñetñapaʼ c̈hepaʼtchaʼ mechaʼtapet. 20 T̃arraña ñapaʼ atet̃ otosanet:

—Nacaʼye oʼ nohuapa, amach att̃a sem̃chaʼtatstapno.

21 Ñetñapaʼ mueneñetañ oʼch agapapet noñt̃ot̃, eñotostsetpaʼ oʼ c̈hapña noñt̃ yom̃taʼn all sechenet.

22 Tsapat̃ña acheñeneshaʼ ñeñt̃ alla aʼpatsa yom̃taʼn ñetpaʼ eñoteñet eʼñe pat̃rra noñt̃ allo aʼtac̈haʼt Jesús pueyochreshaʼ ñam̃a Jesúspaʼ enteñet amacaʼ aʼtapo noñt̃o epuet pueyochreshaʼ eʼñe ñapt̃ochayeta ahuanmuet. 23 T̃arraña noñt̃ec̈hnoñapaʼ c̈hocma huac̈hena Tiberiasot̃, oʼ c̈hapuet allameʼtets all rret ellerro pan ñeñt̃ parasyosoʼtam̃pes Partseshaʼ Jesús. 24 Allempoña acheñeneshaʼ ñeñt̃ alloʼtsen ñetñapaʼ oʼhuañ eñchet Jesús pueyochreshohuen. Ñetpaʼc̈hoʼña allent̃a aʼtac̈haʼtet ñamet noñt̃o, ahuam̃p̃set Capernaumonet̃, oʼch eʼneretaʼ Jesús.

25 Allempoña entoset yom̃taʼnpaʼ atet̃ otoset:

—Maestro, ¿esempoʼtña pec̈herrña p̃a arrma?

26 Jesúsñapaʼ atet̃ otapanet:

—Na poʼñoc̈hpaʼ oʼch notapas, sapaʼ amacaʼye añecpayeʼ seʼnenno att̃o oʼ norrtatonas nepartsoña. Sapaʼ añecpacaʼyeña seʼnenen att̃o oʼ nerratuas pan oʼ eʼñe seyetua. 27 T̃eʼpaʼ oʼch notas, sapaʼ amach aña semaʼyoc̈hratsto yocrram̃ ñeñt̃ eʼnuapoʼ. Añchaʼña semaʼyoc̈hra socrram̃ ñeñt̃ ama eʼnuapahuoyaye; ñeñt̃ña alloch sapaʼ corretsasach socsheñeshocmañen eʼñe t̃ayot̃eñ amaʼt errponañohuen. Ñeñt̃ña socrram̃paʼ nach sapuerreʼ Ñeñt̃en Acheñetosets t̃arroʼmar Apapaʼ oʼ llesenserren na Ñeñt̃en Acheñetosets arr patsro.

28 Acheñeneshaʼñapaʼ atet̃ otereterr:

—Errot̃enuachcaʼ yep̃aña ñeñt̃ cohuen enten Yompor.

29 Jesúsñapaʼ atet̃ oterraneterr:

—Ñeñt̃ cohuen enten Yomporpaʼ oʼch sameʼñaʼna na ñeñt̃en llesensen.

30 Ñetñapaʼ atet̃ otereterr:

—Errot̃enot̃uachcaʼ pegateyña pepartsoña ñeñt̃chaʼ yentpaʼ att̃ot̃chaʼ yameʼñap̃a. P̃apaʼ esuañacaʼ petsoten. 31 Ya yatañneshañpaʼ rraʼyeseteʼt̃ ñeñt̃ maná all amayo atet̃caʼye anuaret̃ Yompor poʼñoñ ahuat̃ot̃eñ: “Rratyesaneteʼt̃ pan ñeñt̃ apaneteʼt̃ Yompor pueʼntañot̃.”

32 Jesúsñapaʼ alla oterraneterr:

—Eʼñe poʼñoc̈h oʼch notas: Ama Moisésoyeʼ apahueteʼt̃eña pan ñeñt̃ huetsa entot̃. Nacaʼye Nompor sapueneʼña ñeñt̃ eʼñe poʼñoc̈h socrram̃ sepen. Añ socrram̃paʼ entot̃ña huena. 33 Naña socrram̃ sepen ñeñt̃en oʼ apuerres Nompor, napaʼc̈hoʼña entot̃ nohuapa Yomporeshot̃ allochñapaʼ acheñeneshaʼña arr patsropaʼ ñetñapaʼ corretsetach.

34 Ñetñapaʼ atet̃ otereterr:

—Ayochreshat̃e yapaʼc̈hoʼña c̈hocmach p̃apuey ñeñt̃ corramets.

35 Jesúsñapaʼ alla oterraneterr:

—Napaʼ na corram̃tsotets alloch eʼñe socrra. Eseshaʼch huapatsa nesho ñetña amaʼt ahuat̃apaʼ amach alla cheporrerreteʼt̃e. Eseshaʼch nameʼñerraya na ñetña amaʼt ahuat̃apaʼ amach alla oñpaʼterreteʼt̃e. Ñehua, ñeñt̃paʼ añ notenes, eseshaʼch nameʼñerraya na ñetñapaʼ c̈hocmach eʼñe cosherret pueyoc̈hreto, amaʼt ahuat̃apaʼ amach alla es eʼnerreteʼt̃e. 36 T̃arraña napaʼ oʼ notuas: Sapaʼ oʼ sentnoñ amaña sameʼñenno. 37 Allohuen acheñeneshaʼ ñeñt̃ oʼpatatenna Apapaʼ ñetñapaʼ ameʼñerrnetchaʼ. Eseshaʼch nameʼñerraya ñetñapaʼ amach alla nehuaporeʼterraneto. 38 T̃arroʼmar napaʼ ama añecpayeʼ nohuapoña entot̃ att̃och oʼch aña atet̃ nep̃os ñeñt̃ nemnen na. Napaʼ añecopña nohuapa oʼch atet̃ neperr ñeñt̃ atet̃ muenen Nompor ñeñt̃ nellsenserreʼ. 39 Ñeñt̃paʼ atet̃ muenen Nompor ñeñt̃ nellsenserreʼ: Amachña c̈ha naʼchencatereña acheñeneshaʼ ñeñt̃ ora allpon oʼpatatenna na, c̈hochña ello netantaterrñañ esempohuañen. 40 Añmapaʼ ñeñt̃ña muenen Nompor: Erraʼtsenchaʼ neñoterreʼ ñerraʼm ameʼñerrnetchaʼ na ñeñt̃en Yompor Puechemeren, ñetñapaʼ corretsetach pocsheñeshocmañen t̃ayot̃eñ amaʼt errponañohuen. Ñetñapaʼ c̈hocmach netantaterranet esempohuañen.

41 Att̃o Jesúspaʼ otenanet, “Napaʼ na corram̃tsotets ñeñt̃en huapatsa entot̃”, judioneshaʼñapaʼ pocuanaʼteñot̃et otatseʼtyeñet. 42 Ñeñt̃paʼ atet̃ otyeset:

—Añmapaʼ añacaʼye Jesús, José puechemer, ñeñt̃ pompor ñam̃a pachor eʼñecaʼye yechmeʼteñ. T̃eʼñapaʼ esoʼmareʼtña oten ñapaʼ entot̃oʼ huapa.

43 Jesúsñapaʼ atet̃ otanet:

—Sapaʼ amach att̃a sotatseʼtannaʼtyesatsto. 44 Amaʼt eseshapaʼ amach errot̃enot̃ ameʼñerrneto ñerraʼm Nompor ñeñt̃ nellsenseneʼ ñerraʼm ña ama cot̃apeʼchaterrahueto cohuen. Ñetñapaʼ netantaterranetchaʼ esempohuañen. 45 Atet̃ quellquëʼt̃ ñeñt̃ aʼm̃tayeʼt̃ Yompor poʼñoñ ahuat̃, poʼquellcopaʼ atet̃ anuaret̃: “Allohuenetpaʼ Yomporchaʼña eñotaterrahuet.” Allohuen ñeñt̃chaʼ eʼm̃ñoterreʼ Nompor att̃och cohuen cot̃apeʼchaterranet, ñetñapaʼ nachña ameʼñerret.

46 ’Amaʼt eseshapaʼ ama puentareto Apa. Napt̃aña na ñeñt̃en huapatsa Yomporeshot̃ nentarcaʼyeña Apa. 47 Eʼñe poʼñoc̈h notenes: Eseshaʼch nameʼñerraya ñetñapaʼ corretsetach pocsheñeshocmañen t̃ayot̃eñ eʼñe errponañohuen. 48 Napaʼ na corram̃tsotets alloch eʼñe socrra. 49 Satañneshañpaʼ amaʼt rraʼyeseteʼt̃ ñeñt̃ maná all amayo, ñetñapaʼ oʼ collaʼhuenet. 50 T̃arraña ñeñt̃en soteneʼ t̃eʼ ñeñt̃ña eʼñe poʼñoc̈h socrram̃ ñeñt̃en huapatsa entot̃ allochñapaʼ eseshaʼch rreʼpaʼ ñetñapaʼ corretsetach t̃ayot̃eñ eʼñe errponañohuen. 51 Eʼñe poʼñoc̈h napaʼ na ñeñt̃en corram̃tsotets alloch eʼñe socrra ñeñt̃en huapatsa entot̃. Ñerraʼm eseshaʼ rreʼ añ corrametspaʼ ñetñapaʼ corretsetach t̃ayot̃eñ eʼñe errponañohuen. Añ corramets ñeñt̃chaʼ nepomuerr na acheñeneshacop arr patsro alloch eʼñe correnet, ñeñt̃paʼ añcaʼye nechets.

52 Judioneshaʼñapaʼ ñeñt̃oʼmarac̈hoʼ es otannaʼtyeset. Ñetñapaʼ atet̃ otyeset:

—Errot̃enot̃uachñacaʼ apueyña eʼñe ña poʼchets ñeñt̃chaʼ yerraʼ.

53 Jesúsñapaʼ alla oterraneterr:

—Poʼñoc̈h oʼch notas, ñerraʼm ama serrerrnano nechets Ñeñt̃en Acheñetosets, ñerraʼm ama sorrerrnano ñam̃a nerras, sapaʼ amat̃eʼ errot̃enot̃ socrroña sa. 54 Ñerraʼm eseshaʼ rreneʼ nechets ñam̃a ñerraʼm orrennanet nerras, ñetñapaʼ corretsetach t̃ayot̃en eʼñe errponañohuen, t̃arroʼmar nañapaʼ netantaterranetchaʼ esempohuañen. 55 T̃arroʼmar nechets ñeñt̃ eʼñe poʼñoc̈h corram̃tsotets; ñerraspaʼc̈hoʼña ñeñt̃ eʼñe poʼñoc̈h orrpapoʼ. 56 Ñeñt̃chaʼ rreneʼ nechets ñam̃a ñerraʼm orrennanet nerras ñetñapaʼ eʼñech parrocmatennet na, napaʼc̈hoʼña eʼñech neparrocmatenanet ñet. 57 Apa ñeñt̃ nellsenseneʼ ñapaʼ ama arromñat̃eshayaye, ñacaʼyeña napueneʼña att̃o napaʼc̈hoʼña corretsanach. Atet̃ nepena nam̃a, allohuen ñeñt̃ pocrram̃ nepeneʼ napaʼc̈hoʼña añ napuenanet att̃och ñetpaʼc̈hoʼña corretsetach ñamet. 58 Na ñeñt̃en socrram̃ sepen ñeñt̃en huapatsa entot̃. Ama att̃eyayno ñerraʼmrrat̃eʼ pan ñeñt̃ rreʼt̃ satañneshañ ahuat̃. Ñetpaʼ oʼ collaʼhuenet. Eseshaʼch eʼñe pocrram̃ nepeneʼ ñetñapaʼ corretsetach t̃ayot̃eñ eʼñe errponañohuen.

59 Arrpaʼ allohua ñeñt̃ atet̃ yec̈hatenan acheñeneshaʼ judioneshaʼ poʼprahuo all Capernaumo.

60 Allempoña atet̃ eʼmueñet atet̃ oten, shonteʼ pueyochreshac̈hnopaʼ atet̃ otyeset:

—Añ ñoñetspaʼ amacaʼye eʼñeyeʼ pocteyaye, amat̃eʼ eseshaʼ ameʼñayo.

61 Jesúspaʼ eʼñe pueyoc̈hro eñotanet c̈ha otatseʼtyen pueyochreshac̈hno, ñeñt̃oʼmarña atet̃ oterraneterr:

—Ñeñt̃ atet̃ notenespaʼ areʼt pocteyeʼ senteñe. 62 Taʼm, ¿errot̃enaʼtchaʼ sotña ñerraʼm poʼñoc̈h sentennoñ na Ñeñt̃en Acheñetsosets oʼch alla naʼterreñ ento allot̃ nohuapa ahuat̃? 63 Yecamquëñ alloña eʼñe poʼñoc̈h yocrrena. Yechetspaʼ amaʼt coñeʼt̃apaʼ ama sherbeno. Neñoñ ñeñt̃ neserrpareʼtatenespaʼ eʼñe poʼñoc̈h secamquëñecop ñeñt̃ña poʼñoc̈h alloch eʼñe socrra. 64 T̃arraña pantantaʼttsospaʼ amaña sameʼñenno.

Ñehua, Jesúspaʼ eʼñe allempot̃eñ eñotenan ñeñt̃chaʼ ama ameʼñerrtso. Eʼñe eñotenan ñam̃a ñeñt̃chaʼ pomuerreʼ. 65 Jesúspaʼ alla oterraneterr:

—Ñeñt̃oʼmarña napaʼ notaseʼt̃, amach eseshaʼ nameʼñerrayo ñerraʼm ama Apa cot̃apeʼchaterrahueto att̃och cot̃errnet.

66 Allempot̃eñña shonteʼ Jesús pueyochreshac̈hno puerrac̈herret ñeshot̃paʼ oʼhuañ chopeñeʼchenet parro. 67 Allempoña Jesúspaʼ atet̃ otan pueyochreshaʼ ñeñt̃ c̈harrasheña puechena epa:

—Sapaʼc̈hoʼ ¿semneñeʼt oʼch sepuerrerra sam̃a?

68 Simón Pedroñapaʼ atet̃ och:

—Partseshachaʼ, eseshaʼhuat̃eʼñacaʼye yoct̃aʼ. P̃apt̃acaʼye pechenña ñoñets att̃ochña yapaʼ corretsayach t̃ayot̃eñ errponañohuen. 69 Yapaʼ oʼcaʼye yameʼñap̃a. Yapaʼ yeñotenep̃ p̃apaʼ pepaʼtcaʼye Cristotets, ñeñt̃ep̃ Yompor Puechemerep̃.

70 Jesúsña atet̃ otanet:

—Napaʼ nacaʼyeña saʼcrerreʼña sa, c̈harrasheñas sepchena epa. Ñeñt̃ña puesheñarrpaʼ ñeñt̃paʼ oneñet̃enaʼtar.

71 Ñehua, Judasocop atet̃ eñora. Ñeñt̃ Judaspaʼ ñeñt̃ Simón Iscariote puechemer. Amaʼt ñeñt̃ aʼpchenahuetañ epa pueyochreshaʼ, puesheñarrpaʼ ñeñt̃chaʼ pomuerreʼ.