PƆLƱ KALATA'N
M'Ɔ TIAN YƖ NNYUAN
M'Ɔ HƐLƐLƖ NWANLƖN
KOLƖNTƖ ASƆNƖN MMA'N-MƆ'N
M'ɔ wɔ nun'n
Mɔ Pɔlʋ hɛlɛlɩ yɩ́ alimʋa kalata'n nwanlɩn Kolɩntɩ asɔnɩn mma'n-mɔ yuelɩ'n, ɔ sʋanlɩn Timote ɛlɔ kɛ ɔ hɔ́ nɩ́an like'n m'ɔ helelɩ bɛ́ kɛ bɛ yɔ́'n. Timote hɔlɩ walɩ a, amannɩɛ'n m'ɔ bɔlɩ helelɩ Pɔlʋ nɩn a nyɔ man fɛ. Ɛhɩ a, Pɔlʋ muonun kɔ han yɩ́ nwʋn kɔ hɔ kɔ tʋ Kolɩntɩ asɔnɩn mma'n-mɔ kɛ bɛ káci bɛ́ abalabɔ'n. Mɔ Pɔlʋ hɔlɩ juli ɛlɔ'n, asɔnɩn nɩn anun sʋanlan'n kʋn kɔ gua Pɔlʋ anyunnun asɩ ɔ kɔ man yalɛ kɔ han yɩ́ (yɩ́ ti 2.5-11, 7.12). Pɔlʋ kɔ sa kɔ a Efɛzɩ ndɛ-ndɛ. Efɛzɩ ɛbɛlɛ, Pɔlʋ “anyɩn la ɛmʋɩn nun kpa” Kolɩntɩ asɔnɩn mma'n-mɔ dunman nun, ɔ kɔ hɛlɛ kalata kun biekun kɔ nwan bɛ́ ɔ kɔ gua bɛ́ ayile (2.4; 7.8). Kalata sɔ'n, ɛnɛ ɔ'a minlin. Titɩ yɛ̂ Pɔlʋ falɩ manlɩn yɩ́ maan ɔ hɔlɩ ɔ. Ɛhɩ anzin, Pɔlʋ kɔ hɔ Masedʋanɩn mân nun ɔ nʋn Titɩ m'ɔ sʋanlɩn yɩ́ Kolɩntɩ'n kɔ yia. Titɩ kɔ bɔ amannɩɛ fɛ kɔ hele Pɔlʋ kɛ Kolɩntɩ asɔnɩn mma'n-mɔ a tɩ yɩ́ ɛjɔlɛ nɩn abʋ b'a kaci bɛ́ abalabɔ'n. Mɔ Pɔlʋ tɩlɩ amannɩɛ sɔ'n, ɔ kɔ hɛlɛ kalata ɛhɩ kɔ nwan Kolɩntɩ asɔnɩn mma'n-mɔ. Kalata nɩn anun, Pɔlʋ lɛ kele Kolɩntɩ Asɔnɩn'n m'ɔ bɔlɩ'n kɛ ɔ kulo bɛ́, ɛsɛ ɔ kulo kɛ ɔ nʋn bɛ́ bɛ́ nʋan sɛ bɛ́ nwʋn.
Pɔlʋ a hye kalata sɔ nɩn anun nsan. Alimʋa lɩka dɩɛ'n (yɩ́ ti 1-7), ɔ lɛ da Nyanmɩan asɩ kɛ ɔ'a cɩcɩ yɩ́ lʋa wɔ yɩ́ ɛfɛ'n-mɔ anun. Ɔ sanlɩn kɛ bile'n m'ɔ walɩ bɛ́ afian nɩn a tu. Pɔlʋ lɛ kacɩ bɛ́ yɩ́ junman'n m'ɔ lili wɔ bɛ́ afian'n, ɛsɛ ɔ lɛ kele bɛ́ kɛ ɔ kulo bɛ́.
Lɩka'n m'ɔ tɔ sʋ nnyuan'n (yɩ́ ti 8-9), Pɔlʋ lɛ kan kɛtɩ'n m'ɔ di kɛ bɛ tʋ bɛ kɔ man Zoluzalɛmʋn asɔnɩn mma'n-mɔ nɩn anwʋn ɛjɔlɛ. Yɩ́ ti, ɔ lɛ sɛlɛ bɛ́ kɛ bɛ mán bɛ́ sa lʋ́.
Lɩka'n m'ɔ tɔ sʋ nsan'n (yɩ́ ti 10-13), Pɔlʋ lɛ sa yɩ́ nɩn kpa wɔ ato mmɔfʋɛ'n-mɔ mɔ bɛ tʋn yɩ́ ɛsʋan anwʋn. Kalata nɩn agualɩɛ nun, Pɔlʋ lɛ bisa bɛ́ ahɩn ɛsɛ yɩ́ nwan ɔ 'ba hɔ fua bɛ́ nwʋn biekun.
1
Ahɩn ebisa
1 Mɩ́n Pɔlʋ, mɔ Nyanmɩan Kpili a hulo kɛ n gáci Zozi Kilisi bɔfʋɛ'n, mɩn nʋn yɛ́ nianman Timote yɛ̂ yɛ lɛ kɛlɛ kalata ɛhɩ ɔ.
Yɛ lɛ kɛlɛ yɛ nwan Nyanmɩan asɔnɩn mma'n-mɔ mɔ bɛ wɔ Kolɩntɩ kulo nɩn asʋ ɔ nʋn Nyanmɩan anwʋntɩɛ mma'n-mɔ kʋalaa mɔ bɛ wɔ Akayi mân bɔndɩn nɩn anun'n.
2 Yɛ 'bisa ɛmɔ ahɩn. Yɛ́ Sɩ Nyanmɩan Kpili nʋn yɛ́ Mɩn Zozi Kilisi, bɛ nwún ɛmɔ anwʋn anwunnvoe, ɛsɛ bɛ mán ɛmɔ alʋa cɩ́cɩ bɛ́ nwʋn.
Nyanmɩan cɩcɩ yɛ́ lʋa
3 Yɛ 'yɩ Nyanmɩan m'ɔ tɩ yɛ́ Mɩn Zozi Kilisi Asɩ nɩn ayɛ. Ɔ sanlɩn kɛ ɔ nwun yɛ́ nwʋn anwunnvoe, ɛsɛ ɔ cɩcɩ yɛ́ lʋa kpa bɔkɔɔ. 4 Ɔ cɩcɩ yɛ́ lʋa wɔ yɛ́ yalɛ elie kʋalaa anun. Ɔ man menian mɔ bɛ lɛ nwun yalɛ ngacile dɔʋn'n, yɛ́ lʋa mɔ Nyanmɩan a cɩcɩ'n, yɛ́ kʋsʋ yɛ cɩcɩ bɛ́ lʋa. 5 Kɛmɔ Kilisi dunman nun yɛ lɛ nwun yalɛ ngacile dɔʋn'n, yɩ́ sɔ kʋsʋ ala, ɔ cɩcɩ yɛ́ lʋa kpa. 6 Kɛ ɔ kɔ yɔ nán ɛmɔ a nyan bɛ́ ti nán ɛmɔ a lʋa a cɩcɩ'n, yɩ́ ti yɛ̂ yɛ lɛ nwun yalɛ ɔ. Sɛ yɛ́ lʋa a cɩcɩ a, yɛ kulo kɛ ɛmɔ kʋsʋ alʋa cɩcɩ bɛ tila bɛ́ ahʋnlɩn bɛ si abʋtalɛ wɔ yalɛ'n mɔ ɛmɔ lɛ nwun yɩ́ kɛ yɛ́ nɩn anun. 7 Yɛ sɩ kɛ kɛmɔ ɛmɔ lɛ nwun yalɛ kɛ yɛ́'n, yɛ le anyɩndasʋɛ kpa kɛ ɛmɔ alʋa 'ba cɩcɩ kɛ yɛ́ lʋa a cɩcɩ'n.
8 Anianman-mɔ, yɛ kulo kɛ ɛmɔ nwun nun kɛ yalɛ mɔ yɛ nwunlin yɩ́ Azi mân nun'n, ɔ tɩ man nzɛmɩndɛ. Yalɛ'n mɔ yɛ nwunlin yɩ́'n bʋlɩ yɛ́ sʋ dede bɔbɔ yɛ́ nwan yɛ́ dɩɛ a yue. 9 Yɛ nwun yɩ́ kɛ anɩn yɛ́ ewue cɩan a ju. Yalɛ sɔ'n tʋlɩ yɛ́ nán Nyanmɩan a hele yɛ́ kɛ ɔ nni man kɛ yɛ susu yɛ́ ti yɛ gua yɛ́ muonun yɛ́ nwʋn sʋ. Nan yɩ́ lɩlɩ yɩ́, Nyanmɩan m'ɔ tinnge menian fi ewue nun'n y'ɔ di kɛ yɛ susu yɛ́ ti yɛ gua yɩ́ sʋ ɔ. 10 Yɩ́ yɛ̂ ɔ'a yɩ yɛ́ fi ewue sɔ nɩn anun ɔ. Ɔ'a le yɛ́ ti. Ɛsɛ yɛ le anyɩndasʋɛ kɛ Nyanmɩan 'de yɛ́ biekun. 11 Ɔ sanlɩn kɛ ɛmɔ muonun 'ba sɛlɛ Nyanmɩan bɛ bʋka yɛ́. Ɛbɛlɛ nɩn anun, Nyanmɩan 'ba tie menian dɔʋn mmʋtʋɛ'n mɔ bɛ lɛ yɔ bɛ man yɛ́'n. Ɔ 'di junman sɔ'n man yɛ́ ɔ man menian dɔʋn da yɩ́ asɩ.
Pɔlʋ 'ba tu yɩ́ Kolɩntɩ ɛhɔlɛ tɛmʋn'n sie
12 Anianman-mɔ, like m'ɔ man yɛ di ndutue'n y'ɔ le kɛ mân nɩn anyunnun ɔ nʋn ɛmɔ muonun afian, ɛnanndɩɛ m'ɔ tɩ kanlanman, m'ɔ tɩ fɔ́ʋ́n ɔ sɔ Nyanmɩan anyɩn'n yɛ̂ yɛ nʋn ɛmɔ nanndɩlɩ ɔ. Nán ngɛlɛ mɔ yɛ sɩ yɩ́ ti y'ɔ man yɛ nʋn ɛmɔ nanndɩlɩ sɔ ɔ, nan Nyanmɩan muonun y'ɔ bʋkalɩ yɛ́ ɔ. 13 Ɔ man yɛ ngan man ɛjɔlɛ ngacile fɩ́ɩ́ yɛ ngele man ɛmɔ kɛ mɔ ɛmɔ lɛ kɩnnga bɛ tie'n. Mɩn de mɩn di kɛ ɛmɔ 'ba tie dede bɛ gua yɩ́ bʋ. 14 Kɩkaala dɩɛ, ɛmɔ nyue man yɩ́ bʋ tɩ. Nan cɩan mɔ yɛ́ Mɩn Zozi 'ba a'n, ɛmɔ 'ba li yɛ́ nwʋn ndutue, yɛ́ kʋsʋ yɛ 'ba li ɛmɔ nwʋn ndutue.
15 Ɛhɩka ati yɛ̂ n vualɩ kɛ ahan mɩn 'ba fua ɛmɔ anwʋn maan ɛmɔ di ndutue sɔ'n fâ nnyuan nɩn ɔ. 16 Mɩ́n nwan ahan mɩn bɔ nun ɛmɔ anwʋn ɛlɔ nán m'an hɔ Masedʋanɩn, nán mɩn 'sa mɩ́n nzin an, ɛsɛ mɩn bɔ nun ɛmɔ anwʋn ɛlɔ biekun. Yɩ́ dɩɛ anɩn ɛmɔ gua mɩ́n atɩn maan mɩn kɔ Zude mân nun. 17 Atɩn mɔ m gbɛlɩ nɩn anɩn. Kɛmɔ m'an han kɛ mɩn 'ba nɩan ɛmɔ abʋsʋ mɔ n gɔlɩ man'n, anɩn ɔ kele kɛ mɩ́n nʋan nun tɩ nnyuan nnyuan ɔ? Anaan like mɔ n gɔ se kɛ mɩn 'yɔ'n, mɩn kaci mɩ́n nʋan kɛ mân nɩn anun menian'n-mɔ yɔ yɩ́ nɩn ɔ?
18 Sɛ ɔ tɩ ananhɔlɛ kɛ Nyanmɩan tɩ fɔ́ʋ́n an, like mɔ n gɔ han kɛ mɩn 'yɔ'n, mɩn yɔ. Like mɔ n gɔ han kɛ mɩn nyɔ man'n mɩn nyɔ man. 19 Ɔ sanlɩn kɛ Nyanmɩan Awa Zozi Kilisi mɔ mɩn nʋn Silasɩ nʋn Timote yɛ walɩ hanlɩn yɩ́ nwʋn ɛjɔlɛ'n yɛ helelɩ ɛmɔ'n, ɔ tɩ man sʋanlan m'ɔ kan ɛjɔlɛ a, anɩn ɛsɛ ɔ'a kaci yɩ́ nʋan ɔ. 20 Afɩ anɔhʋba'n kʋalaa mɔ Nyanmɩan bɔlɩ mɔ ɔ 'kpɩn sʋ'n, ɔ fi Zozi Kilisi. Zozi Kilisi dunman nun yɛ̂ yɛ kan amɩn yɛ wula Nyanmɩan anunminnyanmʋn ɔ. 21 Nyanmɩan muonun yɛ̂ ɔ'a fa yɩ́ Wawɛ Nwannzan-nwannzan'n m'ɔ wɔ yɛ́ nun'n ɔ'a man yɛ́ maan yɛ́ dedi'n mɔ yɛ le yɩ́ wɔ Kilisi anun'n tin ɔ. 22 Nyanmɩan a sie yɛ́ nzɔlɛ, ɔ'a fa Wawɛ Nwannzan-nwannzan'n ɔ'a wula yɛ́ ahʋnlɩn nɩn anun ɔ'a hele kɛ yɛ tɩ yɩ́ menian.
23 Ɛhɩ, Nyanmɩan Kpili di mɩ́n adanzɩɛ. Sɛ mɩɩn di ato a, ɔ hún mɩ́n. Mɩn ngulo man kɛ mɩn bɔ ɛmɔ alʋa, yɩ́ ti y'ɔ man m'an ngɔ man ɛmɔ abʋsʋ efua nɩn ɔ. 24 Yɛ ngulo man kɛ yɛ fa dedi'n yɛ tinndin ɛmɔ nán ɛmɔ a le a li. Ɔ sanlɩn kɛ ɛmɔ dedi'n ti kunngun kpa. Nan kɛ ɔ kɔ yɔ nán ɛmɔ a nyan salɩɛ'n, yɩ́ ti yɛ̂ yɛ kulo kɛ yɛ nʋn ɛmɔ di junman ɔ.