1 Ipaꞌ banagepa piliꞌ ukup pindaila epes hiasi peseꞌasa nelelemb esis. Eaꞌ ukup ipeꞌipi pendahafel endilisi ma pegefaꞌ presen hiahaom fasimi Ambal buꞌunai Godi nagaseꞌepami. Apaꞌ presen nagaliꞌi ma ipaꞌ pendaꞌ maol dindinipa pegefaꞌani, inimba naꞌamba. Presen Ambal Godi nosaꞌmepa ma pegawalapa basef Godi siꞌi profet.*1 Ko 12:31; 1 Ko 14:39 2 Apaꞌ mogawa epen ami naꞌi basefaꞌ anoga diga daiagai, anin ina nasoꞌas basef epes, owaꞌ. Anin naꞌipa God atona. Deiꞌ main, ina anin epen negawa diga agamba, owaꞌatin. Banagami Ambal Godi atom anin naꞌi basef ifimba fowaꞌ fape fandambahiꞌi. 3 Apaꞌ epen ami Ambal Godi nasaꞌmana nagaꞌi basef Godi siꞌi profeti, epen inimbai naꞌipasef nowaꞌ banaga hapif asasini eaꞌ fasaꞌmasa sondaꞌ waf fasifi fendaꞌ opalef asasilifi awanelef. 4 Epen ami nagaꞌi basefa anoga diga daiagai, anin newaꞌ banaga opaf ananifi atof. Apaꞌ epen ami Ambal Godi nasaꞌman nawalapa basef Godi siꞌi profet, inimba newaꞌ banaga esis sios amam nematawa Kristen.*Nam 11:29 5 Aeꞌ okom maꞌi ipaꞌ hipai hiꞌilipa piꞌi basefa anoga diga daiaga. Apaꞌ epen ami Ambal Godi nasaꞌmana newalapa basef Godi siꞌi profet, anin nikilaꞌ epen inimba nagaꞌi basefa anoga diga daiagai owaꞌ nembemef niꞌif alihifa. Deiꞌ main, iꞌi epen inimba owaꞌ nembemef niꞌif alihifa, basef ifimba ina fewaꞌ banaga esis sios amam nematawa Kristen sagameꞌafi, owaꞌatin. Apaꞌ iꞌi negambemef alihifa, daoꞌ basef ifimba fewaꞌ banagas.

6 Alipipai, ipaꞌ ukup pendameꞌ basef ifimba andeandeꞌ. Iꞌi aeꞌ efeꞌmago ipaꞌ ma egaꞌi basefa anoga diga daiaga, atiasi etopalopepa ewaꞌ banagaipa iꞌimama? Owaꞌatin. Apaꞌ iꞌi embemef igaꞌif, daoꞌ eseꞌepa anif basef God nigihimbaꞌmiefi eaꞌ eseꞌepa gawa fasini ipaꞌ aꞌa iwalipipama basef kofagefa Godi siꞌi profeta Ambal Godi nosaꞌme egawalipipafi.

7 Hiahawes ambal akasi, siꞌi batagwi gita, amamba eaꞌ naꞌamba atin siꞌi diga agamba hiagai. Iꞌi amom owaꞌ mogal melef mondaꞌ maguf fafifafi fetagaia, apaꞌ atiasi mogahembeꞌ mogawa maguf amamufi alihif miꞌimama? Owaꞌatin. 8 Iꞌi bugel alof owaꞌ fogal fiꞌi alihifa, amom mondaꞌ wandafi silisilawi mope mondandombola wandaf miꞌimama? Owaꞌatin. 9 Ipaꞌ wapani naꞌamba atin. Ipaꞌ iꞌi piꞌi basefa anoga diga esis owaꞌ sogogawagaia, atiasi sogawa basef ifimba kofagefa siꞌimama? Owaꞌatin. Atiasi basef ipeꞌifi fefeꞌ higililif dowaf. 10 Endilisi, diga hiaga haoga gape itap apaꞌe. Apaꞌ ina anoga diga falafugai dowaf, owaꞌatin. Basef kofagefa fape diga gagigagi hiagai. 11 Aeꞌ iꞌi owaꞌ egawa basef kofagefa anin epen nagaꞌiafia, atiasi anin okom mopoma aeꞌ niꞌi aeꞌ epen agaꞌi anoga diga anambel wambeli. Eaꞌ aeꞌ wapani okom mapoma anin iꞌi nagaꞌi anoga diga anambel wambili. 12 Ipaꞌ wapani naꞌamba atin. Ipaꞌ ukup paꞌi aꞌowaꞌ ma pegefaꞌ presen hiahaom fasimi Ambal Godi nagaseꞌepami. Eaꞌ ipaꞌ daoꞌ pendandaꞌ maol banagambel endilisi ma pegefaꞌ presen inimbai negewaꞌ banaga hapifa siosi.

13 Eaꞌ epen ami nagaꞌi basefa anoga diga daiagai anin nendandaꞌ betena Goda nogosoꞌan gawa negambema basefa diga agamba. 14 Deiꞌ main, iꞌi endaꞌ betena anoga diga daiaga, ambal aeꞌali atol landabeten, apaꞌ okom aeꞌami mape dowaf.*Ef 5:19 15 Eaꞌ deiꞌ atiasi endaꞌas iꞌimama? Aeꞌ endandaꞌ betena ambal aeꞌali eloma okom aeꞌami wapani. Aeꞌ endandaꞌ awalefa ambal aeꞌali eloma okom aeꞌami wapani. 16-17 Iꞌi ipaꞌ pinifela Goda ukup ipeꞌipi atip, ama anin epen owaꞌ nefaꞌ anin presen hiahaom fasimi Ambal Godi nagaseꞌepamia, deiꞌ atiasi anin negawa niꞌimama ma beten inimba ipeꞌini ma nigaꞌi endilisi? Owaꞌatin. Endilisi, iꞌi ipaꞌ pendabeten piꞌi basef fasifi aꞌowaꞌ, ina atiasi pewaꞌ banaga nembela epen inimbai, owaꞌatin. Deiꞌ main, anin ina negawa basef ifimba ipaꞌ pagaꞌiefi, owaꞌ. 18 Aeꞌ anifela God nimaguf hiafi ma aeꞌ agaꞌi basefa anoga diga daiaga. Ipaꞌ ina laꞌifipama pendaꞌope, owaꞌ. 19 Apaꞌ eloma esis sios mondakolas, aeꞌ aꞌi iꞌi basefa amef bandafi wanifif biafifa okom aeꞌami iwalipa esisa sogogawef. Ama aeꞌ iꞌi basefa amef laulaufi fetaga hihif 10,000 pelaifa anoga diga daiaga gagasiꞌi, eaꞌ hapaifi, falafifi atif.*Ef 4:14; Fl 3:15

20 Ipaꞌ alipipai, ipaꞌ ina pepe ukup pelapefeꞌ siꞌi awasi, hapaimi. Waf awafi, daoꞌ ipaꞌ ukup beꞌep pepe andeandeꞌ ukup peseꞌepaf siꞌi awasi. Apaꞌ nomonas ipeꞌisi sondataga siꞌi epes dambesi.*Ais 28:11-12 21 Anif basefa muꞌuli Godi fagail buki fagaꞌi naꞌamba faꞌi,

22 Deiꞌ apaꞌ mogawa presen inimba pagaꞌi basefa anoga diga daiaga, inimba ina ametal God nandaꞌana esis sagahapifanai, owaꞌ. Anen nandaꞌana epes isimba owaꞌ sogahapifanaia. Apaꞌ presen inimba Ambal buꞌunai Godi nasaꞌmepa pawalapa basef ananifi siꞌi profet, inimba ina ametal God nagasoꞌasan epes isimba owaꞌ sogahapifanaia, owaꞌ. Inimba ametal isimba sagahapifanai atis.*Ap 2:13

23 Eaꞌ iꞌi esis amam nematawa sios hiasi sondakolas atogona ama ipaꞌ hipai aꞌ piꞌi basefa anoga diga daiagama anis epes owaꞌ sogofaꞌ presen inimbaia o anis owaꞌ sogahapifa Kraisia sifiꞌi sope sogalomepa, atiasi asiꞌi, “Ipaꞌ ukup magahipai.”*Jo 16:8

24 Apaꞌ iꞌi Ambal buꞌunai Godi nasaꞌma ipaꞌ hipai ma pegawalapa basef Godi siꞌi profet ama iꞌi anin epen owaꞌ nogohapifa Kraisia o owaꞌ negegawa basef Godi andeandeꞌia nifiꞌi negawis, ama basef ipaꞌ hipaii atiasi feha nembel epen inimbai eaꞌ fewaloga opaf ananifi ma waf maif awafi fagapani.*Ais 45:14; Sek 8:23; Jo 4:19 25 Basef hiafi fape fandambahoꞌ okom ananimii, ifimba atiasi afetaga fendawalap alihifa anin nifiꞌi nindiwa nembawa nitimaloꞌ nefela agol Godi nowalapa basef naꞌamba niꞌi, “Endilisi atis, God nape nalomepa.”*1 Ko 12:8-10; Ef 4:12

26 Ipaꞌ alipipai, deiꞌ basef ifimba akutaifi aeꞌafi fagape naꞌamba. Nemaf afamba pendakolas, presen inimba hiani Ambal Godi nagasoꞌapani napoma ipaꞌ hipai naꞌamba. Anin epen nendaꞌ anaf awaf, anin daian niꞌi anif basef Godi niwalipipa, a anin God nasoꞌana anif basefa negawalapef, eaꞌ anin daian negawa ma nigaꞌi anoga diga daiaga, a anin daian negawa ma negambema basef ifimba. Ipaꞌ pendandaꞌ hiahaom amamba hiami ma pegewaꞌ banaga hapif esis amam nematawa sios. 27 Iꞌi anis ukup pehafela sigaꞌi basefa anoga diga daiaga, bias aꞌa wanis sindaꞌi basef atona atin. Eaꞌ maꞌwis isimba. Apaꞌ ina aꞌ siꞌif atef, owaꞌi. Sindaꞌif atona atin. Ifimba eaꞌ maꞌuf. Eaꞌ anin epen atitin aꞌ nendambema basef ifimba. 28 Ama iꞌi owaꞌ anin epena negambemefa, daoꞌ epen inimba naꞌi nigaꞌi basefa anoga digai aꞌ nendasopama malogol ananigili ma basef ifimba ma esis sandakolasa. Bola anin atin niꞌif nendaloma God.*Ap 17:11; 1 Te 5:21

29 Apaꞌ amom profet biam o wanom Ambal Godi nasaꞌmama mogawalapa basef ananifi, amom aꞌ mondawalapef. Eaꞌ anom daiam mowawaloga basef ifimba. 30 Iꞌi anin epen tol nepe lotu nemeꞌ basefa God nihimbaꞌmana anif basefa epen inimba, daoꞌ aman anamba naliꞌ nalutu nagawalapa basefi aꞌ nondasopama malogol. 31 Ipaꞌ hipai Ambal Godi nasaꞌmepa pawalapa basef Godi siꞌi profet, ipaꞌ pewalapef atona atin piꞌif daindai ma epes hiasi semeꞌef solafefa fegewaꞌ banaga hapif asasini. 32 Epes ami sogofaꞌ presen inimba Ambal Godi nasaꞌmasa sogawalapa basef ananifi siꞌi profet, aꞌ sundumafi presen inimba andeandeꞌ. 33 Deiꞌ main, God ina nandaꞌ waf uluwalifi, owaꞌatin. Anen nandaꞌwaf usiꞌifi opalef atifilif fagape awanelifi.

Apaꞌ sios amam nematawa Kristen sunduwaꞌanima sogape,*1 Ko 11:3; 1 Ti 2:12; Ta 2:5 34 awo nematawa ina aꞌ ulutu wiꞌi basef, owaꞌi. Awo osopama malogof ope dowaf. Sios apaꞌ amam nematawa Godi waf eaꞌ afamba atef. Nematawa ina aꞌ ope wiliꞌma sios, owaꞌi. Ondape lafel siꞌi muꞌuli Godi nagaꞌias. 35 Iꞌi awo wiꞌi ogogawa anif basef kofagefa, bola ofeꞌma ifagw asasigwi aꞌ uhaliꞌ wauhupawa miꞌipawaef. Iꞌi anoꞌw nemataꞌw kondaꞌ basef ipaꞌ sios pandakolasa, waf afambai ambagof awogufafi.

36 Deiꞌ aꞌi ihaliꞌipa. Ipaꞌ kofagepama basef Godi? Ipaꞌ atipa pefaꞌ basef Godi a anis amam nematawa daias owaꞌ? Owaꞌatin.*1 Jo 4:6 37 Iꞌi epen ami okom mondandaꞌ niꞌi Ambal Godi nasaꞌman nawalapa basef Godi siꞌi profet, aꞌa niꞌi anin nefaꞌ presen anin daian, anin aꞌ nendegawa basef ifimba deiꞌ andaꞌef ipeꞌi, ifimba muꞌuli Dembinaii. 38 Ama iꞌi anin nindaiwaꞌma basef ifimba, ipaꞌ wapani pindaiwaꞌma anin.

39 Ipaꞌ alipipai aeꞌipai, ukup ipeꞌipi pendehafel endilisi ma Ambal Godi nosaꞌmepa pegawalapa basef ananifi siꞌi profet. Eaꞌ ipaꞌ ina pesopama ufiaꞌwa pigaꞌi basefa anoga diga daiaga, owaꞌi.*Kl 2:5 40 Apaꞌ ipaꞌ Kristen pendakolasa lotu, ipaꞌ pendandaꞌ maol andeandeꞌma atiasi dakolas ipeꞌini negataga boꞌwen.