1 Ipaꞌ alipipai afaꞌipai endilisi, apaꞌ eaꞌ mofaꞌ basef ifimba Godi endilisifi banagafi. Eaꞌ mondelefata hiahaom amamba awami magape nomona alopi ambagof apeꞌisi eaꞌ mondape beꞌepa ombel mondahapama God mila waf endilisifi hililiꞌ aꞌowaꞌi.*Ap 20:33; 2 Ko 12:17

2 Ipaꞌ deiꞌ pendasoꞌafa opalef ipeꞌilifi. Afaꞌ ina wandaꞌ anin epen ipeꞌini awen aꞌa wahambombaga anin, ondololaepa anin epena hiahaom ananimi, owaꞌatin.*2 Ko 6:11-12 3 Aeꞌ agawalapa basefa ipaꞌ, ina aꞌipipa aꞌi kofagema ipeꞌimi atom, owaꞌatin. Aeꞌ aꞌias aꞌi afaꞌ waseꞌepa opalef afaꞌilifi ipaꞌ. Wandaꞌas naꞌamba ma iꞌi ipaꞌ pegagaꞌma, afaꞌ ogaꞌ ogalomepa. Apaꞌ iꞌi pegape namipama, afaꞌ wapani ope namofa olomepa. 4 Aeꞌ okom mandandaꞌmepa endilisi ipaꞌ pape andeandeꞌ. Andagala aꞌowaꞌ ma ipaꞌ. Nimanimi magatagama aeꞌi hiami, apaꞌ owaꞌ okom aeꞌami mapomago ipaꞌ, isimba atis deiꞌ sandaꞌ opaf aeꞌafi fape saꞌombel sonehe endilisi.*2 Ko 2:13

5 Fowaꞌ afaꞌ wafiꞌi ogataga itap luꞌupa Masedonia ma anamba wapani, alop afaꞌipi ina papoma nomaꞌw kwasakwasala, owaꞌatin. Nimanimi mamimami hiami matagamafa, saꞌi basef banagafi safitap salomafa. Eaꞌ ombel mahafa ukup palapafeꞌ.*2 Ko 1:3-4 6 Apaꞌ God nowaꞌ banaga epes isimba opalef nimanilifi nasapaꞌ Taitus natagamafa nowaꞌ banagafa. 7 Ina Taitus atona natagamafa deiꞌ God nowaꞌ banagafa, owaꞌatin. Ipaꞌ pewaꞌ banaga Taitus, isimba atis deiꞌ God nowaꞌ banagafa wapani. Taitus naꞌipafa naꞌi ipaꞌ ukup pehafel aꞌowaꞌ ma paꞌi pegatolowe eaꞌ opalef ipeꞌilifi falopa fowaꞌ pagaseꞌe akafimi aeꞌ. Eaꞌ nomonas ipeꞌisi sohafel aꞌowaꞌ ma pegape opalef atelef pegalome. Isimba atis deiꞌ sonahe aꞌowaꞌ ikilaꞌ fowaꞌ.*2 Ko 2:4

8 Endilisi aeꞌ egawa basefa pas andaꞌas saliꞌ sagafoꞌowi fandaꞌ opalef ipeꞌilifi iwanilif, apaꞌ aeꞌ ina opaf iwanifa isimba, owaꞌ. Endilisi, fowaꞌ aeꞌ nembel aꞌ nimanimbil apaꞌ deiꞌ owaꞌatin. Aeꞌ egawa pasa basef ifimba fandaꞌ opalef ipeꞌilifi nimanilif, apaꞌ owaꞌ, amambai nogota bandataimi atom. 9 Apaꞌ deiꞌ aeꞌ sonahe. Ina sonahema basefa pas isimba fandaꞌ ukup ipeꞌipi iwanip, owaꞌ. Aeꞌ andagalama amamba aꞌ mandaꞌepa eaꞌ pambema nelelemb pafeꞌma God. Aeꞌ egawa God atona nawalapai nimanimi amamba ipeꞌimi ma nagatopalopepa.*Mt 27:3-5; Hi 12:16-17

10 Waf Godi naꞌamba. Nimanimi maim anen nagawalapami mandaꞌapa mombema nelelemb mefeꞌma anen nokwahomapa waf awafi nofaꞌapa mogotanimai. Apaꞌ ina aꞌ nelelemb nimanilimba nimanimi amamba God nagawalapami, owaꞌatin. Apaꞌ iꞌi opalef nimanilifa waf itapafi, afambai daoꞌ awafi fagawalapai waf sagaꞌ sagafeꞌ wambel awambiliafi, hapaifi. 11 Ipaꞌ ukup pendape andeandeꞌma nimanimi amamba ipeꞌimi. God nandaꞌam mawalapai waf buꞌwafi fafifafi hiafi ma ipaꞌ. Amamba masoꞌmepa pasafel kwafalisa pegenandona waf ipeꞌifi. Ipaꞌ ambagof awagofa epen inimba ipeꞌini nandaꞌ waf awafii, isimba atis deiꞌ ombel mehepama basef agaꞌipipaefa okom wandafunai Godi. Opalef ipeꞌilifi falef aꞌowaꞌ ma paꞌi pegatolowe eaꞌ banagepama pigasindiꞌamona epes isimba sandaꞌ waf awafii. Ipaꞌ pagaloꞌma epen inimba napani laogon. Pandaꞌas naꞌamba deiꞌ ma pihimbaꞌma epes hiasi waf awafi kofagefa akepa ma hiahaom amamba mogatagamipai.

12 Eaꞌ endilisi fowaꞌ andaꞌmepago basef ifimba, aeꞌ ina okom mapoma epen inimba nandaꞌ waf awafii, aꞌa inimba nagameꞌ akafimi ma waf afambai, owaꞌ. Aeꞌ aꞌi waf ipeꞌifi fetaga fendawalap alihifa naep Godi ma pegegawaf andeandeꞌ naꞌamba. Ipaꞌ ukup paipailafa aꞌowaꞌ. Eaꞌ isimba atis aeꞌ fowaꞌ andaꞌmepago basef ifimba. 13 Waf afamba ipeꞌifi fandaꞌafa wandagala fowaꞌ banagafa.

Apaꞌ ina afaꞌ atofa wandagala, owaꞌ. Taitus wapani nandagala aꞌowaꞌ. Deiꞌ main, ipaꞌ hipai pandaꞌ ambal ananili aꞌ lapoma nomaꞌw. Afaꞌ wati isimba atis, asonahafa aꞌowaꞌ. 14 Fowaꞌ andagalaepa asaꞌma agof ipeꞌigufi luꞌwagofa nogohnaep Taitusi eaꞌ deiꞌ aeꞌ ina ambal aola waf afamba, owaꞌatin. Basef hiafi afaꞌ wagaꞌipipafi ifimba endilisifi. Eaꞌ naꞌamba atin basef fowaꞌ wagasaꞌma agof ipeꞌigufi ma nogohnaep Taitusi, ifimba wapani fataga fendasali alihif, ifimba endilisifi atif.*2 Ko 2:9

15 Fowaꞌ anen nafeꞌmago ipaꞌ, ipaꞌ hipai pasoꞌana opalef paila basef ananifi ombal mahepa ma pegasambalif. Anen ataꞌ okom mandandaꞌma isimba atapis deiꞌ okom ananimi maimailipa endilisi. 16 Deiꞌ aeꞌ andagala endilisi ma egegawa ipaꞌ hipai pandaꞌ waf hiafi andeandeꞌ datima.