1 Eaꞌ Sol nomonas atifis naloma amom magaha Stiven nagagaꞌi.*Ap 7:58, 8:4; Ap 11:19

Nogota atamba esis amam nematawa sandaiwaꞌma esis Kristen sagape Jerusalami, sahas sasoꞌas akafimi nimanimi luꞌwami. Eaꞌ isimba atis deiꞌ esis sagahapifanai asafaꞌ safeꞌagon hiꞌalagon atona biana ma anamba itap luꞌupa Judiai Samaria. Apaꞌ amom aposel atom ataꞌ mapani atapim Jerusalem. 2 Anom amam magaila waf Godi andeandeꞌi mofaꞌ Stiven mawana, mandaꞌ lef luꞌwani ma anen. *Ap 9:1,13, 22:4; Ap 26:9-11 3 Apaꞌ Sol nandaꞌ maol naꞌi nohambombaga esis Kristen. Anen nafeꞌ nawis ifagw hiagwi atona atin nofaꞌai amam nematawa hiasi sagahapifanai. Eaꞌ nahondoꞌas nofaꞌas nafeꞌ nandaꞌas sandaꞌ kalabus.*Ap 6:5

4 Esis Kristen safaꞌ safeꞌagon hiꞌalagon walemb hielimbi analemb daindaialemb sawalapa basef buꞌwafi Godi saꞌipasef. 5 Eaꞌ Filip nowala nafeꞌ anambel wambel itap luꞌupa Samaria nawalipasa basef buꞌwafi naꞌi Jisas anen Krais, God nandandepana nasapaꞌana nagafiꞌii. 6 Amam nematawa hiasi sameꞌ basefa anen asati banagami anen nandaꞌami eaꞌ sagahembeꞌ andeandeꞌma basef ananifi. *Mt 10:1; Mk 16:17 7 Banagami amamba naꞌamba. Amam nematawa hiasi ambagof awami magapaisi, ambagof amamba mandaꞌam wiwa maꞌoh kwapeteꞌ endilisi aꞌ makwaha esis mawisi mafaꞌ mafeꞌ. Eaꞌ epes isimba lagof boꞌwagah awamisi, anis isimba bihitagof fofowagalamasi, esis hiasi asataga boꞌwes wapani. 8 Eaꞌ deiꞌ esis wambel ambalemba sofaꞌ dagala luꞌwani.

9 Eaꞌ anona aman nape agilinama Saimon. Aman anamba fowaꞌ nandaꞌ naohi ufiali nape atapina nafiꞌi nataga deiꞌ nemaf afamba. Eaꞌ nandaꞌ ukup esis amam nematawa Samariaisi a malamafeꞌ hiahiam aꞌowaꞌ. Aman anamba naꞌias naꞌi, “Aeꞌ aman dembiwai.” 10 Eaꞌ esis amam nematawa hiasi agof akasi a agufisi, esis hiasi hiꞌalas sandahembeꞌma naꞌamba atina sagameꞌ basef Saimoni. Saꞌias saꞌi, “Aman anamba anen nofaꞌ banagami amamba dembinai Godi sofalam sagaꞌi banagami luꞌwamii.”

11 Eaꞌ esis banagesa sagameꞌ basef ananifi. Deiꞌ main, nimaguf hiafi anen nandaꞌ waf fafifafi hiafi banagafi koꞌop ufial eaꞌ satelef aꞌ nomonas salasafeꞌ hiahias.

12 Eaꞌ Filip nawalipasa basef buꞌwafi esis hiasi. Nawalipasa agol Jisas Kraisi ma sogawis nomona maol Godi nope Dembinai nugumafias. Eaꞌ sahapifa basef ifimba sofaꞌ baptais. 13 Eaꞌ aman anamba Saimon wapani nahapifa Jisas aꞌ nofaꞌ baptais nape naloma Filip. Anen nati Filip nandaꞌ ametal banagonai naninani siꞌi God nandaꞌani, eaꞌ aꞌ okom hiahaom mapaona.

14 Amom aposel magape Jerusalami mameꞌ basefa esis Samaria asofaꞌ basef Godi. Naꞌamba masapaꞌ Pitai Jon mafeꞌma esis. 15 Amom biam miliana mandabetena Goda nogatopalopa esisa sogofaꞌ Ambal buꞌunai Godi. 16 Deiꞌ main, Ambal Godi ina deiꞌ nawisa esis, ataꞌ owaꞌatin. Esis sofaꞌ baptais atisa agol Jisasi atogol. *Ap 19:6 17 Eaꞌ amom biam mawamona lagofa esis eaꞌ sofaꞌ Ambal buꞌunai Godi. 18 Eaꞌ Saimon nati amom aposel biam mawamona lagof atogofa esis sofaꞌ Ambal Godi. Naꞌamba anen nofaꞌ moni ananini nafiꞌmai amom naꞌipam naꞌi, 19 “Ipaꞌ bipa peseꞌe banagami amamba aeꞌ wapani ma aeꞌ iꞌi egawamona lagofa anin epena, negefaꞌ Ambal buꞌunai Godi.”

20 Owaꞌ Pita naꞌipana naꞌi, “Hiahaom fasimi God nagasoꞌasam dowaf siꞌi preseni, amamba inaꞌ okom mandandaꞌ naꞌi ilama negatalom otamba ineꞌimbai? Owaꞌatin. Aeꞌ aꞌi otamba ineꞌimbai beloma inaꞌ pefeꞌ wambel awambili hel. *Sam 78:37 21 Inaꞌ owaꞌ boꞌwenama nigawisa maol inimba Godi afaꞌ wandaꞌania, owaꞌatin endilisi! Deiꞌ main, okom ineꞌinai ina usiꞌinama naep Godi, owaꞌatin. 22 Inaꞌ newaꞌ alafugama waf afamba awafi ineꞌifi nembema nembel nefeꞌma God. Eaꞌ nendabetena Dembinai ma nokwaha kofagema amamba ma okom ineꞌimi magapoma waf awafii. *Hi 12:15 23 Deiꞌ main, aeꞌ ati inaꞌ kowalena aꞌowaꞌ ma presen hiahaom fasimi God nagasoꞌapami. Eaꞌ nembel ineꞌimbili awambela isimba, waf afamba awafi afewaꞌena atapif nape siꞌi kalabus.”

24 Eaꞌ Saimon nagwa basef naꞌi, “Ipaꞌ bipa pendabetena Dembinai ma anen nogatopalopa aeꞌ. Ama hiahaom amamba ipaꞌ pagaꞌiami ina aꞌ motagame, owa!”

25 Eaꞌ amom biam maꞌipasa basef Dembinai Jisas Kraisi esis amam nematawa. Ama main, motanima mondowasaꞌ Jerusalem. Magafeꞌ ufiaꞌw, mawalapa basef buꞌwafi Godi walemb hielimbi esis Samaria.

26 Eaꞌ anona ensel Dembinaii naꞌipa Filip naꞌi, “Inaꞌ nendendombola negafeꞌ gani waꞌol awin natopaꞌ negembaꞌma, ma ufiaꞌw kwaꞌwaha Jerusalem kwiliana kwagafeꞌ Gasama. Ufiaꞌw akwamba fowaꞌ esis sagafeꞌakwi. Deiꞌ aꞌ owaꞌ. Ufiaꞌw akwamba kwape anamba wafigima fataupigima.”*Ais 56:3-7

27 Eaꞌ Filip nosafel aꞌ nafeꞌ. Eaꞌ natagama anona aman Itiopiainai ufiaꞌw akwamba. Anen aman dembinai nugumafi otamba hiambai ma kwin akwamba dembeꞌwi gavman kugumafi esis walemb hiagoma Itiopiai, sofalaꞌw sagaꞌi Kandesi. Aman anamba nimbewaꞌ nafiꞌi Jerusalema nandaꞌ lotu, 28 deiꞌ naꞌi notanima nefeꞌ. Anen natoma karis ananimi siꞌi wilkar eaꞌ natoma nati basef fagail buk Baibeli fowaꞌ profet Aisaia nandaꞌafi aꞌ nafeꞌ. 29 Eaꞌ Ambal buꞌunai Godi naꞌipa Filip naꞌi, “Inaꞌ foꞌo felefeleꞌma aman anamba nefeꞌ neloma wilkar nanimba.”

30 Eaꞌ Filip nasagih nafeꞌ felefeleꞌma anen, aꞌ nameꞌ aman anamba natalifa basef ifimba Aisaia nandaꞌafi.

Eaꞌ Filip nahaliꞌana naꞌi, “Inaꞌ negawa basef ifimba kofagefa deiꞌ natalifif nagafiꞌii, aꞌa owaꞌ?”*Jo 16:13

31 Eaꞌ aman anamba nagwa basef naꞌi, “Iꞌi anin epen owaꞌ nihimbaꞌmefa, deiꞌ egawa basef ifimba iꞌimama?”

Eaꞌ naꞌipa Filip naꞌi, “Inaꞌ lotai netoma neloma aeꞌ.”*Ais 53:7-8

32 Basef ifimba duꞌwanif Godi anen nagatalififi fagaꞌiasa Jisas faꞌi, “Esis saoꞌwana nafeꞌ siꞌi sipsip ama saꞌi sohana nogagaꞌ. Anen siꞌi sipsip noganai esis sahapilana sagatopaꞌmana auf ananimi, anen ina nandaꞌam feꞌ atin naꞌoh, owaꞌatin. Eaꞌ naꞌamba atina aman anamba, ina malogol gagalana, owaꞌatin. 33 Esis sapaꞌagana endilisi eaꞌ ina sandaꞌmana kota basef usiꞌifi, owaꞌ. Anen awasi akana ma anis sitilis soganifa basefas. Deiꞌ main, sahana nagaꞌ sagia ambal ananili ma ina ataꞌ nope itap wapani, aꞌowaꞌ.”

34 Eaꞌ aman anamba dembinai nugumafi maola kwini naꞌipa Filip naꞌi, “Aeꞌ aꞌi ihaliꞌina. Profet anamba naꞌi ami ma deiꞌ nandaꞌ basef ifimba? Naꞌifa anen atona aꞌa naꞌifa anin epen daian?”

35 Eaꞌ Filip naꞌi basef nawalapefa aman anamba. Nasumbai basef ifimba duꞌwanif Godi aman anamba nagaꞌiefi fafeꞌ fafeꞌ eaꞌ nawalapai basef buꞌwafi Jisasi.*Ap 10:47

36 Amom biam maꞌi mafeꞌ owaꞌ, matagama anemb walemb. Eaꞌ aman anamba naꞌipa Filip naꞌi, “Niti walemb ambamba betah. Deiꞌ ataꞌ main nape niliꞌama aeꞌ egefaꞌ baptais?”

37 [Eaꞌ Filip naꞌi, “Iꞌi inaꞌ nihapifana endilisi ma nembel ineꞌimbili, inaꞌ daoꞌ ila.”

Eaꞌ nagwamana basef naꞌi, “Aeꞌ ahapifa Jisas Krais anen nogamana Godi.”]

38 Eaꞌ naꞌias a main, wilkar negetawai, Filip naloma aman anamba dembinai misilaꞌ mafeꞌ mowala walemb. Eaꞌ Filip napisiꞌana. *1 Kin 18:12 39 Eaꞌ amom biam makwaha walemb mandagiai wataꞌita, kwafalis atis Ambal buꞌunai Dembinaii nofaꞌ Filip aꞌ nafeꞌ. Eaꞌ aman anamba dembinai ina ataꞌ natolona wapani, aꞌowaꞌ, dolomana. Eaꞌ anen sonahana nandagala naila ufiaꞌw ananiꞌwi nafeꞌ.*Ap 21:8

40 Apaꞌ Filip nafeꞌ nataga Asdot. Anen nafeꞌ taun anamba hiagoma ganigani nawalapa basef buꞌwafi Jisasi. Ama main, notanima nafeꞌ nataga wambel Sisaria.