2
Kyrixtu exixihmatopõpyry ekarory poko
1-2 Wekyry tomo, “Imepỹ poko Korĩtopõkõ anamorepara ase, Jezu Kyrixtu poko rokẽ toto amorepãko ase,” ase ukurohtao rokene, ytopyra ro jahtao oya xine. Jezu orikyhpyry poko ãmoreparykõ se nymyry exiase. Naeroro oehsene oya xine jahtao, jomiry tupime pyra nexiase. Jatamorepatopõpyry poko jepyrypary se pyra exiase, “Pauru otyro waro emero,” kara imehnõ ehtohme. Ritonõpo osenetupuhtoh ekarory se exiase oya xine. Zae omi ekarory se exiase. Apitoryme aomiry waro pyra exiatose. Yrome seromaroro jarao mana. Morara exiryke oya xine toytose jahtao, zehno exikety omiry sã pyra jomiry nexiase. Tykytyky tykase ywy zuno jehtopõpyryke azahkuru se pyra jexiryke Ritonõpo a. Zae omi ekaroase oya xine. Zuaro exiketõ omiry sã pyra jomiry nexiase. Yrome Ritonõpo jamitunuru ke kuamorepatose. Morarame jomiry etaryke oya xine otuarõtanohpoatose Ritonõpo zuzenu, tyjamitunuru eneporyke oya xine. Naeroro Jezu tonetupuhse oya xine, ahno tuarõnory ke pyra, Ritonõpo jamitunuru poe rokẽ Jezu tonetupuhse oya xine.
Zuaro Ritonõpo ehtopo
Ritonõpo zuzenu omipona exiketõ maro zuaro exikety sã oturũko ase. Yrome Jezu onenetupuhpynõ zuaro ehtoh sã pyra jomiry mana. Itãhpopãtyã zuaro ehtoh sã pyra roropa mana. Axĩtao rokẽ itãhpopãtyã mana sero nono po. Emero motye zuaro Ritonõpo mana. Aomiry ekarõko ase oya xine zuaro oehtohkõme. Pake tokare pyra Ritonõpo osenetupuhtopõpyry kynexine. “Umũkuru enetupuhnanõ kurãkãko ase aorikyryke toto myakãme. Umũkuru sã exĩko mã toto,” tykase Ritonõpo tyya rokene, sero nono onyripyra ro tahtao. Morara katopõpyry tokare pyra kynexine aporo. Seromaroro jarao mã rahkene. Yrome Ritonõpo osenetupuhtopõpyry waro pyra seropõkõ tuisary tõ kynexine. Zuaro tahtao xine Kuesẽkõ onexixihmapopyra toh exiry wewe pokona. Emero motye Kuesẽkõ kure exiry mana, tuisamehxo exiry, enara. Moro poko ynara tymerose Ritonõpo omiryme,
“Tynekarory kurã kurãkãko Ritonõpo mana
ekarotohme typyno exiketomo a.
Onenepitopyra seropõkõ mana,
onetapitopyra roropa,
onenetupuhpitopyra roropa mã toto Ritonõpo nyrihpyry kurã poko, tynekaroryme typyno exiketomo a,”
me tymerose. 10 Yrome moro poko kymarokõ tutuarõtanohpose Ritonõpo zuzenu a, Ritonõpo nenetuputyhpyry poko. Tuzenu tonehpose kukurohtaka xine zuaro kuehtohkõme. Emero oneto Ritonõpo zuzenu mana. Ritonõpo osenetupuhtoh waro mana zuaro pyra imehnõ ahtao ro. 11 Kuosenetuputyrykõ waro pyra imehnõ mana. Kymarokõ rokẽ zuaro. Moro saaro Ritonõpo zuzenu rokẽ Ritonõpo osenetuputyry waro mana. 12 Jezu enetupuhnõko sytatose. Naeroro Jezu onenetupuhpynõ zuzenu kukurohtao xine pyra mana. Ritonõpo zuzenu rokẽ tonehpose Ritonõpo a kukurohtaka xine, kuamorepatohkõme, emero inekarohpyry waro kuehtohkõme.
13 Morara exiryke ahno a rokẽ pyra tamorepase ynanase. Ritonõpo zuzenu a tamorepase ynanase. Naeroro kytamurukõ namorepatopõpyry ke pyra imehnõ amorepãko ynanase. Ritonõpo zuzenu namorepatopõpyry ke rokẽ Zuzenu nae exiketõ amorepãko ynanase. 14 Yrome Ritonõpo zuzenu maro pyra exiketõ inekarotyã anapoipyra mã toto onenetupuhpyra toexirykõke. “Otãto tynekarory ekarõko Ritonõpo nae?” ãko mã toto. “Oty katohme moro apoĩko mokaro nae?” ãko roropa toh repe oseya rokene, Ritonõpo zuzenu maro pyra exiketomo. Ynara exiryke, Ritonõpo zuzenu nae exiketõ rokẽ inekarotyã kure exiry enetupuhnõko. 15 Ritonõpo zuzenu nae awahtao xine emero rokẽ toehse ahtao zae ehtoh enetupuhnõko matose. Mame õmirykõ eunopyry se imehnõ ahtao oneunohpyra ekurehnõko mã toto, zae rokẽ oexirykõke. 16 Ynara tymerose Ritonõpo omiryme.
“Ritonõpo osenetupuhtopõpyry waro pyra imehnõ mana.
Amorepary waro ehsaromepyra roropa mã toto.
Tamorepaneke pyra ynororo mana ipunaka.
Tamoreme zuaro ynororo,”
ãko.
Mãpyra Kyrixtu poe osenetupuhnõko sytatose, kukurohtao xine Zuzenu exiryke.