19
Pauru Epezu po ehtopõpyry
Morarame Aporu Korĩto po ahtao, Pauru toytose osemae pata tõ poro Epezu pona. Moroto Jezu poetory tõ tonese eya. Mame mokaro a tõturupose Pauru. Ynara tykase ynororo eya xine,
—Ritonõpo a Tuzenu tokarose oya xihne, Jezu enetuputyryhtao oya xihne? tykase Pauru toto a tõturupose.
—Kũ. Tuaro pyra reh ynanahse Ritonõpo zuzenu poko, tykase toto tozuhse Pauru.
—Onoky omi poe tõpurihkase matou? tykase Pauru eya xine.
—João namorepatopõpyry poe rokẽ tõpurihkase yna, tykase toto.
Ynara tykase Pauru eya xine,
—João omi poe tõpurihkase awahtao xine kure repe, oorypyrykõ turumekase oya xine ahtao. Yrome ynara tykase João tuhkãkomo a, “Okomino imepỹ oehnõko mana Ritonõpo mũkuru. Mokyro enetupuhtoko oesẽkõme,” tykase João, Jezu poko, tykase Pauru eya xine.
Morarame morara etaryke tyya xine tõsẽpurihkapose ropa toto eya, Jezu Kyrixtu enetuputyryke tyya xine. Morarame toto zupuhpyry pona Pauru a tomary tyrise ahtao, tomõse Ritonõpo zuzenu toto kurohtaka. Tyotyorõkõ omiryae tõturuse toto Ritonõpo zuzenu poe. Ritonõpo omiry poko roropa tõturuse toto. Morotõkõ tuhke hkopyra kynexine, 12me orutua komo.
Mame juteu tõ atamorepatoh taka Pauru toytose. Orẽpyra tõturuse toto a. Oseruao nuno taropose eya toto amorepary poko Ritonõpo tuisame exiry poko. Yrome imehnõ Pauru omipona pyra kynexine, Jezu enetuputyry se pyra toh kynexine tosẽkõme. Pauru namorepatopõpyry Jezu poko typoihtose eya xine tuhkãkõ netaryme. Morara exiryke mokaro turumekase Pauru a, Jezu poetory tõ maro tõturutohme. Mame kokoro rokẽ tamorepapitose toto Pauru a Tiranu namorepatoh tao. 10 Moroto asakoro ikonopory taropose Pauru a toto amorepary poko rokene. Emero morotõkõ Aziapõkõ tutuarõtase Ritonõpo omiry poko, juteu tomo, juteutõkara, enara.
11 Pauru tyjamihtanohse Ritonõpo a kurãkõkara kurãkatohme ropa eya. 12 Morarame Pauru wino kamisa pitiko tarose toto a, upo roropa tarose kurãkõkara apotohme, toto kurãkatohme ropa. Moro a tukurãkase ropa toto Ritonõpo poe. Joroko tõ roropa tutũtase ropa zae xine.
Xikiwa mũkuru tomo
13 Mame juteu tõ kynexine pata tõ poro ytoketomo. Pyaxime toh kynexine. Joroko tõ tũtanohpory ropa waro sã toh kynexine. Mokaro Pauru poenopyry se kynexine repe. Yrome Jezu waro pyra toh kynexine.
—Joroko tõ tũtanohpory waro ynanase ahno ae, tykase toh repe. Mame ynara tykase toto jorokohpano a,
—Joroko, otũtako ropa mokyro ae Jezu omi poe, Pauru nekarohpyry omi poe, tykase toh repe. 14 Morara tykase Xikiwa poenomo 7mãkomo. Jũkõ juteu. Ritonõpo maro oturuketyme kynexine, tamuximehxo exikety.
15 Yrome joroko a tozuhse toto,
—Jezu waro ase, Pauru roropa. Yrome awaro xine pyra ase, tykase joroko eya xine.
16 Mokaro pona tarĩnase jorokohpã orẽpyra. Tyyryhmase roropa toto itamurume eya. Toepase toto ikurũke tupoke pyra, typitypipokurukõke. 17 Mame mokaro ryhmatopõpyry poko jorokohpano a tutuarõtase toto, morotõkomo, juteu tomo, kyreku tomo, enara. Tõserehse toto porehme.
—Imehxo Jezu mana, tykase toto. Ajoajohpe Jezu onekaropyra toehse toh rahkene. 18 Morarame tuhke Jezu enetupuhnanõ tooehse tyyrypyrykõ rumekary se toexirykõke. 19 Tuhke pyaxiamo a roropa tykyryrykõ tonehse, typapẽkõ maro, jahkatohme, imoihmãkõ ahno ẽpataka. Atapona pape epehpyrỹpyry 5 mirião motye tyahkase eya xine. 20 Tuhke Jezu omipona toehse toh kynexine aomiry jamihme exiryke.
Imoity ajoajohpe ehtopõpyry Epezu po
21 Morarame pata tõ poro Pauru toytory se toehse, Masetonia poro, Kyrexia poro roropa Jerusarẽ pona ropa. Ynara tykase ynororo,
—Jerusarẽ poe Roma pona jytory se ase ipunaka, tykase. 22 Morarame asakoro takorehmananõ taropose eya Masetonia pona Timoteu, Eraxitu, enara. Yrome Pauru moroto kynexine, Azia po, okynã samo.
23 Morarame Jezu poetory tõ zehno toehse morotõkõ kynexine. 24 Moroto orutua kynexine esety Temetyriu. Parata tyrise eya Tiana kuhtohme, “Ritõ mosero,” katohme tyya repe. Moro poko rokẽ tinerutãko toh kynexine, imehnõ parata rinanõ maro. 25 Mokaro tykohmase tyya tõturutohme. Ynara tykase ynororo eya xine,
—Jepe tomo, sero poko rokẽ tinerutãko sytatose. 26 Yrome mokyro kahpyry omiry etãko matose. Enẽko roropa matose. Kynyrihpyrykõ rumekapõko mana imoihmãkomo a Epezupõkomo a rokẽ pyra, Aziapõkomo a roropa kynyrihpyrykõ rumekapõko mana, “Ritonõpo kara moxiamo, ahno nyrityã rokene,” ãko mana kynyrihpyrykõ poko. 27 Morara exiryke tyripokehnõko kyya xine toh mana myhene. Kuesẽkõ tapyĩ, Tiana tapyĩ kurã rumekapõko mana. Ise pyra exĩko mã toto porehme. Mame Tiana imehxo exikety orẽnõko mana. Azia patapõkõ ritõkõ pyra exĩko mã toto emero, tykase ynororo eya xine.
28 Morara kary etaryke tyya xine tyekĩtapãse toto. Tõmitase toto. Ynara tykase toto,
—Tiana imehxo mana, Epezupõkõ nohpory. Kuesẽkõ mosero, tykase toto. 29 Morarame patapõkõ emero kui kui tykase toto. Imoity ajoajohpe toehse. Kaju tõ tapoise eya xine Arixtaku maro amopỹ taka toto arotohme axiny. Kaju tõ Masetoniapõkõ kynexine, Pauru maro aehtyamo. 30 Mame moro taka Pauru tõmomyry se kynexine repe imoity maro. Yrome anamonohpopyra imarõkõ kynexine. 31 Aziapõkõ tuisary Pauru epe tõ kynexine. Tynymerohpyrykõ taropose eya xine Pauru neneryme, “Ytopyra exiko imoity htaka,” katopo. 32 Morotaõkõ opore oturũko toh kynexine. Toitoine Pauru tõ kerekeremãko kynexine. Imehnõ oturũko roropa tyoro, ajoajohpe sã toexirykõke. Tuhke zuarõkõ kara tooehse roropa morotona. 33 Morarame Arexãtere tupurohmase juteu tomo a mokaro ẽpataka. Toto mynyhpãkapory se kynexine tomary ke tõturutohme repe. 34 Yrome juteume aexiryke autururu etary se pyra toh kynexine. Toepanaikase toto. Opore tõturuse okynano.
—Tiana imehxo mana, Epezupõkõ nohpory. Ritõme mana, tykase toto.
35 Morarame pata esẽ omiry merone tooehse. Imoity tymynyhpãkapose tyya ahtao ynara tykase ynororo eya xine,
—Orutua komo, Epezupõkomo, kuetatoko. Tiana tapyĩ pyno sytatose tarõkõme kuexirykõke. Topu roropa kapu ae aepukahpyry pyno sytatose. Moro waro sytatose porehme, tykase ynororo toto a. 36 —Moro poko, “Ajohpe,” kasaromepyra imehnõ mana. Morara exiryke mynyhme ehtoko. Ajoajohpe pyra ehtoko. 37 Xiaro moxiã menehtou. Yrome Tiana tapyĩ onyryhmara toh mana. Onypoihtopyra roropa toh mana. 38 Naeroro moxiaro hxirory se Temetyriu tõ ahtao, parata rinanõ maro, ah ynaroro narõ toto terekatu ẽpataka. Tuisa konõto omihpyry omipona pyra toehse toto ahtao ihxirõko mã toto. 39 Yrome õturuporykõ se awahtao xine, tuisa omihpyry poko, oturupotoko terekatu tomo a, oximõme toehse toto ahtao. 40 Otarãme sero pokoino, ajoajohpe oexirykõ pokoino kykerekerematorỹko mã toto tuisa netaryme. Morarame otara ãko sytatou, tuisa konõto ezuhnõko? tykase ynororo eya xine.
41 Morara kary etaryke tyya xine toytose ropa toto tytapyĩkõ taka.