1 Morarame oseruao jeimamyry taropose ahtao tuisa Xiro a Perexia tuisaryme, ywy, Tanieu, Ritonõpo omiry etase; jesety akorõ Peutesazaame nexiase. Ritonõpo nekarohpyry ya zae nexiase, yrome tupime nexiase enetuputyry ya. Mame tuaro enetupuhtoh tokarose ya enepotoh ae. 2 Morara ahtao oseruao semana ae Jerusarẽ poko ihnamõko exiase. 3 Tonahsã tomepore exikety onenahpyra exiase, tõsẽ onõpyra, eukuru jehnahpyry onẽpyra exiase. Jũsety onekurinara exiase, enara.

4 Mame ẽmepyry 24 aehtoh po, nuno osemazupu po tuna Tikere ehpio po exiase, xikihme. Mame 5 ahno enease tupoke karimutumã ke, mauru panõ risemy. Zamareary uuru kurã risemy nexiase. 6 Zoko zemime nexiase topu kurã typyne exiketõ samo, ẽmyty nexiase nenenehkane samo, enuru tõ ezuru sã nexiase apoto samo, apory tõ, jaxiry tõ roropa metau sã nexiase zemime exiketõ samo, aomiry nexiase imoihmãkõ omiry samo.

7 Ywy ro rokẽ moro enepotoh enease. Mokaro ymaro exiketõ morohne onenepyra toh nexiase, yrome tõserehse toh nexiase, toepase toh nexiase otonẽtohme. 8 Ywy toiroro exiase moro enẽko, osenuruhkatoh enẽko. Jẽmyty karimutume toehse enaromỹke jexiryke, jamihme pyra toehse ywy ipunaka. 9 Ritonõpo nenyokyhpyry omiry etaryhtao ya epukase nono pona, toorihse samo jẽmyty nono pokoxi. 10 Mame imepỹ emary a tanỹse ywy jesekumuru pona jemary nono pona ro, tykytyky ãko ro exiase. 11 Mame ynara tykase mokyro Ritonõpo nenyokyhpyry ya:

— Tanieu, opyno Ritonõpo mana ipunaka, tonehpose ywy eya oturuse amaro. Xikihme exiko, jomiry etako tomeseke samo.

Naeroro towõse ywy xikihme, tykytyky ãko exiase. 12 Mame ynara tykase ynororo ya:

— Enaromyra exiko, Tanieu. Õtururu totase Ritonõpo a, ẽmepyry apitorymã poe, oesekumuru po tõturupitose awahtao eya, tuaro oehtohme. Tooehse ywy õmiry pokoino. 13 Yrome Perexia nonory ewomane a takorekehkase ywy 21me ẽmepyry ae ehtoh po. Morarame toiroro jexiryke etonatoh poko Perexia nonory ewomane tõ maro, Mikeu, toiro Ritonõpo nenyokyhpyry imehxo exikety tooehse ya jakorehmase. 14 Seromaroro toeporehkase ywy oya ãmorepase imeĩpo oekyry tõ ehtoh poko. Moro enepotopõpyry oya imeĩpo ehtoh poko enetupuhtohme mana, tykase.

15 Morohne poko aotururuhtao ya mynyhme rokẽ exiase, tupue rokẽ exiase nono enẽko rokene. 16 Mõtoino rokẽ ypotapihpyry tapose tomary ke mokyro Ritonõpo nenyokyhpyry a, ahno panono a; morara ahtao oturupitoase, ynara ase eya:

— Tuisa, moro enepotoh pokoino tyjamihkehse ywy, tykytyky kakehpyra ase. 17 Otarahxo ke oturũko ha amaro? Opoetoryme jexiryke, oturusaromepyra ase oya. Typoremãkase sã ywy, jamihme pyra ase ipunaka, tupime ya joseremary.

18 Naeroro tomary ke tapose ropa ywy eya, tyjamihtase ropa ywy.

19 Ynara tykase ynororo ya:

— Opyno Ritonõpo mana, naeroro enaromyra exiko. Oewomaneme mana, torẽtyke pyra exiko. Emynyhmara exiko! Orẽpyra exiko!

Mame morara tykase ynororo ahtao kure pohto sã exiase ropa. Ynara ase eya:

— Oturuko ya, jamihme pohto kyriropa exiryke.

20-21 Mame ynara tykase ynororo ya:

— Zuaro hma oty katoh oehno oya? Oehno oya ouruse moro imerohpyry poko, Zae ehtoh Papẽ pokona. Yrome seromaroro ytõko ropa ase Ritonõpo omi poe etonase Perexia nonory ewomane maro. Mame moro etonatoh tõtyhkase ahtao, Ritonõpo nenyokyhpyry, Kerexia ewomane, oehnõko mana etonase ymaro. Yrome mokaro maro josetaparyhtao jakorehmane maro pyra ase ipunaka. Ritonõpo nenyokyhpyry, Mikeu rokẽ, Izyraeu tõ ewomane mã, jakorehmãko mana.