32
1 Etatoko ke, kapu, nono roropa;
otato ehtoko jotururu poko.
2 Ãmoreparykõ ya omipona ehtoko;
konopo oepyry sã exĩko mana otyro pona,
axitaku sã exĩko mana onahpoty poko.
3 Ritonõpo eahmãko ase,
esety imehxo mana.
Ipoetory tõ oturũko mã toto
imehxo Ritonõpo ehtoh poko.
4 Oewomanekõme Ritonõpo mana;
kure kuhse inyrihpyry mana,
zae rokẽ rahkene.
Anamonohpyra mana,
azahkuru pyra roropa mana ipunaka.
5 Yrome ipoetory tõ tyyrypyrykõ poko toehse toh nexiase.
Aerypymahpyryme toehse toh nexiase,
aomiry omipona pyra.
Naeroro ipoenõ sã pyra mã toto,
ahno popyra tyyrypyhpyke exiketomo.
6 Ahno putupyra exiketomo,
tuaro pyra roropa exiketomo,
moro sã Ritonõpo Oesẽkõ riry se hmatou?
Omykõme mana, Orihpõkõme mana
ahnome imoihme oehtohkõme.
7 Osenetupuhtoko pake ehtopõpyry poko,
tuhke jeimamyry pake ahtao.
Omykomo a ekaropotoko:
“Otara toehse pake ahtao?”
Ekaropotoko tamuhpomãkomo a pake ehtopõpyry poko.
8 Ahno tapiakase ahtao Ritonõpo Imehxo Exikety a,
nono tokarose eya xine esarykõme,
tynenyohtyã tymenekase eya toto esẽme ehtohme.
9 Yrome Jako poenõ, ipakomotyã roropa
tymenekase eya typoetoryme toto ehtohme.
10 Tonese toto eya tytahse toto ahtao ona tonorẽ po,
onokyro tõ osekatõ kõ esao.
Towomase toto eya, ipyno toehse;
typynanohse toto eya tonuru ewomary samo.
11 Typoenõ amorepary sã piano a toto ytoryhtao pohpohme,
mame taporiry ke totapuruhmakase,
typoenõ apoĩko aepukaryhtao.
Moro sã typoetory tõ pynanohnõko Ritonõpo Kuesẽkõ mana.
12 Toto tarose eya toiroro,
takorehmane maro pyra,
imepỹ ritõ maro pyra.
13 Ypy tõ esẽme typoetory tõ tyrise Ritonõpo a,
otyro epery tupito tõ po tonahse eya xine.
Ano zeni tokarose eya xine topu tõ rãnao.
Oriwera tõ urome toperytase nono po,
topu tohpe exikety po.
14 Tauhpase toto pui tõ suhsuru ke,
poti tõ suhsuru ke roropa.
Okyno pũ kurã tokarose eya xine,
kaneru tomo, poti tomo,
pui tõ roropa, tiriiku kurã roropa,
uwa eukuru jehnahpyry kurã roropa.
15 Tymõkomoke toehse Ritonõpo poetory tomo,
tytineruke toehse, tomãse toto,
tupune toehse, tuesapare roropa.
Mame Ritonõpo turumekase eya xine;
Towomanekõ omipona se pyra toehse toh nexiase, typynanohnekomo.
16 Imehnõ neponãmarykõ ke Ritonõpo tyhtomapose eya xine.
Tynyrityã xihpyry eahmaryke eya xine
tohne Ritonõpo tyripose eya xine.
17 Okyno tõ totapase eya xine jahkatohme tynekarorykõme joroko tomo a,
Ritonõpo a pyra, imehnõ neponãmarykomo a.
Mokaro waro exipitopyra toh kynexine,
zuaro pyra itamurukõ roropa toh kynexine.
18 Tuenikehse toto Towomanekõ poko,
Tumykõ poko, isene toto Tyrihpõ poko.
19 Moro eneryke tyya tohne toehse Ritonõpo.
Typoenõ turumekase eya,
imũkuru tomo, ẽxiry tõ maro.
20 Ynara tykase ynororo:
“Mokaro rumekãko ase,
moromeĩpo enẽko ase otara exĩko toh nae?
Ajoajohpe toto exiryke,
jomiry omipona pyra mã toto ipunaka.
21 Tynyrihpyrykõ ke tyhtomapose ywy eya xine,
zumoxike toehse ywy toto neponãmarykõ eahmaryke eya xine.
Morara exiryke zumoxike toto ripõko ase roropa ahno poko imoihmãkõme exiketõ kara,
tohne toto ripõko ase,
imehnõ tuaro hkopyra exiketõ ke.
22 Tohne jehtoh apoto zukãko sã mana,
senohne emero enahkapõko mana sero nono po;
ypy tõ apõ zahkãko roropa mana,
ijahkapõko mana aorihtyã esary pona.
23 “Toto pona popyra ehtoh enehpõko ase, enahpỹme,
toto tuarimapõko ase etuarimatoh ke itamurume.
24 Omise konõto emitapãnõko mã toto,
oxirohnõko mã toto,
tyrohsẽ konõto ekurãkapỹ ke toto enahkapõko mana.
Onokyro tõ enehpõko ase toto esekatohme,
okoi tõ roropa orihmato exiketomo, toto esekatohme.
25 Jarao orihnõko mã toto osetapary poko,
tapyi tao orihnõko mã toto enaromỹke.
Aimo tõ orihnõko, orymo tõ roropa,
poetome exiketomo, tamuhpomãkõ roropa.
26 Sapararahme toto aropõko ase sero nono poe,
tykase repe, toto poko imehnõ wenikehtohme,
27 yrome toto eunopyry se pyra exiase epetõkara a,
ynara kary etary se pyra exiase ajohpe:
‘Ritonõpo poetory tõ typoremãkase kyya xine,
Ritonõpo a pyra tonahkase toto.’ ”
28 Putupyra exiketõ sã Izyraeu tõ mana,
tuaro pyra exiketõ sã ipunaka.
29 Tuaro toto ahtao, enetuputyry oty katohme tonahkase toto,
zuaro roropa toto exiry oty katohme tuãnohse toto ya.
30 Oty katohme miumãkõ toepase toh nexiase
toiro rokẽ topetõkara winoino?
Oty katohme 10 miumãkõ toepase,
tokahmase ahtao asakoro ahno a?
Towomanekomo a turumekase toto exiryke;
tokamose toto Ritonõpo a epetõkara a.
31 Kuepetõkara neponãmarykõ jamihme hkopyra mã toto,
Kuewomanekõ sã pyra;
morara ãko roropa mã kuepetõkara.
32 Popyra mã toto, Sotoma põkõ ehtopõpyry samo,
Komora põkõ maro;
uwa zoko sã mã toto,
topere popyra exikety samo,
itunety, orihmatõ sã roropa.
33 Okoi zekaxiri eukuru risẽ sã mã toto,
okoi kyryry orihmatõ risẽ samo.
34 Topetõkara nyrihpyry poko wenikehpyra Ritonõpo mana,
toto wãnohtoh eraximãko mana toto wãnohtohme.
35 Imỹpõko Ritonõpo mã rahkene;
toto wãnohnõko rahkene.
Okynã pyra osetapãko epetõkara mã toto oximõme.
Okynã pyra typoremãsẽme exĩko mã toto.
36 Typoetory tõ pynanohnõko Ritonõpo mana,
tyjamihkehse toto ehtoh eneryhtao eya.
Typoetory tõ pyno exĩko mana
typoremãkase toto exiryke.
37 Mame typoetory tomo a ekaropõko mana:
“Otoko na oneponãmarykomo?
Otoko oewomanekõme onenetuputyhpyrykomo?
38 Okyno tõ totapase oya xine
jahkatohme onekarorykõme eya xine,
uwa eukuru jehnahpyry maro.
Ah noehno toto seromaroro ãkorehmatohkõme.
Ah tururume noehno toto opynanohtohkõme!
39 “Tuaro ehtoko:
Ywy rokẽ ase, Ritonõpo;
imepỹ ritõ pyra mana ysamo.
Etapãko ase, aorihtyã ẽsemãkapõko roropa ase;
apurõko ase, ikurãkãko ropa ase.
Tyriry se jehtoh onytyoromasaromepyra imehnõ mana.
40 Seromaroro jemary anỹnõko ase kakoxi, kapu aeino,
jomiry etapõko ase, isene exikehpyra exiketyme jahtao ynara tyrĩko ase:
41 Ytapemã zemime exikety aehtõko ase,
zae apiakapitõko ase.
Jepetõkara epehmãko ase,
yse pyra exiketõ wãnohnõko ase yzehno toto exiryke.
42 Tuhkãkõ wõko ase,
ypyre tõ ekurihpãko mana munu ke,
jepetõkara etapãko ytapemã mana.
Epasaromepyra exĩko mã toto,
osetapaketomo ymaro;
tapoise exiketõ totapasẽme exĩko mã toto.”
43 Atãkyematoko imeimehnõ nono põkomo,
Ritonõpo poetory tõ maro!
Imỹpõko Ritonõpo mana,
typoetory tõ etapahpõkõ wãnohnõko mana.
Imỹpõko mana,
topetõkara wãnohnõko mana.
Yrome typoetory tõ rypyry korokãko mana.
44 Moro eremiatoh ke turuse Moeze a Jozue maro, Num mũkuru, imoihmãkõ netaryme.
Moeze nyripohpyry tõ etyhpyryme
45 Mame tõtyhkase Moeze Izyraeu tõ amorepary poko, Ritonõpo omiry poko, 46 ynara tykase ynororo:
— Osenetupuhtoko senohne emero poko, ãmorepatopõpyrykõ poko ya seroae. Emero tymerose Ritonõpo nyripohpyryme omipona opoenõkõ ripotohme oya xine. 47 Senohne ynamorepatopõpyry tõ omime rokẽ pyra mana, isene oehtohkõme mana. Aomiry omipona awahtao xine okynahxo isene exĩko matose moro nono po, tuna Joatão takuohse ahtao oya xine, moro apoitohme.
48 Moro ẽmepyry ae ro ynara tykase Ritonõpo Moeze a:
49 — Ytoko ypy tõ Aparĩ pona, taro Moape tõ nonory po, ypy Nepo pona onuhko, pata Jeriko etonie. Moro emory poe Kanaã nonory enẽko mase, ynekarory Izyraeu tomo a. 50 Moroto ypy po orihnõko mase, orui, Arão orihtopõpyry samo ypy Hoa po. 51 Amarokomo, asakoro ro a, tamonohse yneneryme oya xine, Izyraeu tõ ẽpataka. Meripa tunary enatyry pũto awahtao xine, moe pyra pata Kate poe, ona tonorẽ Zim po, imehxo jyripyra mexiatose. 52 Morara exiryke amekeino rokẽ moro nono enẽko mase, ynekarory Izyraeu tomo a. Yrome morotona ytopyra ekurehnõko mase.