33
Kure oxiekyrymãkõ ripotopõpyry
1 Orihpyra ro tahtao kure rokẽ Izyraeu tõ oxiekyrymãkõ tyripose Moeze a, Ritonõpo poetory. Ynara tykase ynororo Izyraeu tõ netaryme:
2 Ritonõpo noepyase ypy Xinai poe;
Etõ epozakoxi tõnuhse ynororo xixi samo.
Saereh tykase ynororo typoetory tõ pona, ypy Parã poe.
Inenyohtyã 10 miumãkõ imaro tooehse.
Emary pũto apotunuru wino apoto zemime exikety nexiase.
3 Typoetory tõ pyno Ritonõpo mana,
toto ewomãko mana.
Porohnõko mã toto Ritonõpo ẽpataka atamorepatohme inyripohpyry tõ poko.
4 Ritonõpo nyripohpyry omipona sytatose,
Moeze nekarohpyry kyya xine,
Izyraeu tõ mõkomory kurã sã mana.
5 Tuisa konõtome toehse Ritonõpo, tynymenekatyã esẽme,
oximõme toehse oxiekyrymãkõ ahtao tutuisary tõ maro.
6 Rupẽ tõ poko ynara tykase Moeze:
“Ah, Rupẽ tõ isene exikehpyra nexĩ toto!
Ah mokaro tuhkehxo nexĩ toto.”
7 Juta tõ poko ynara tykase Moeze:
“Ritonõpo, Juta tõ otururu oya etako.
Oximaro toto tyriko ropa imehnõ Izyraeu tõ oxiekyrymãkõ maro,
toto akorehmako etonaryhtao topetõkara maro.”
8 Rewi tõ poko ynara tykase ynororo:
“Ritonõpo, tyriry se oehtoh enetupuhpõko mase Urim ke, Tumĩ maro opoetory tomo a, anamonohpyra exiketomo a, Rewi tomo a.
Tukuhse toh nexiase oya Masa po.
Mame tuna enatyry tõ pũto Meripa po zae toto ehtoh menepoase.
9 Anamonohpyra toh nexiase onetapohpyry omipona,
tumykõ pyno toehtohkõ motye opyno toh nexiase, takorõ tõ pyno ehtoh motye,
tumũkuru tõ pyno ehtoh motye roropa opyno nexiase toto.
Onyripohpyry tõ omipona toh nexiase.
10 Onyripohpyry tõ poko opoetory tõ amorepãko mã toto,
ixtaratu zahkãko mã toto oẽpataka,
okyryry apoto apõ po tynekarory tõ zahkãko mã toto.
11 Ritonõpo, kure rokẽ Rewi tõ tyriko,
orẽpyrahxo toto tyriko.
Toto akorehmako emero poko toto ahtao azamaro toto ehtohme.
Toto epetõkara enahkapoko jũme owõpyra ropa toto ehtohme.”
12 Pẽjamĩ tõ poko ynara tykase Moeze:
“Pẽjamĩ tõ pyno Ritonõpo mana, toto ewomãko roropa mana.
Toto pynanopyry poko kohmãnõko mana.
Toto rãnaome Ritonõpo mana toto ewomaneme.”
13 Joze tõ poko ynara tykase ynororo:
“Kure rokẽ Joze nonory tyriko, Ritonõpo,
konopo itamurume enehpoko,
tuna enatyry tõ ekaroko roropa eya xine nono ao!
14 Ritonõpo, otyro epery ekaroko eya xine tahpirãse exiketomo xixi ao toto tupi tõ po,
itamurume tonahsẽ kurã ekaroko eya xine apoitohme!
15 Ypy tõ po roropa, moino ro exiketomo, tonahsẽ kurã emãkapoko apoitohme eya xine.
16 Inonorykõ kure rokẽ tyriko, Ritonõpo, emero epo exiketõ roropa,
kure rokẽ ehtoh ekaroko, emero, eya xine!
Mame Ritonõpo, aosenepohpyry omoxino zahkety panõ htae, kure rokẽ toto tyriko!
Ah morohne kurãkõ emero kure oehtoh nexĩ Joze ekyry tomo a,
imehxo Joze toehse exiryke turui tõ motye!
17 Kure potu mana pui orutua wãtasenãme exikety samo, tyretyke exikety samo.
Iretyry mã miu motye Manase pakomotyamo, tuhke miumãkõ roropa Eparaĩ pakomotyamo.
Mokaro maro Joze tõ osetapãko topetõkara maro,
toto purohmãko mana sero nono poro porehme.”
18 Zepurõ tõ poko, Isakaa tõ poko roropa ynara tykase Moeze:
“Tymõkomoke Zepurõ tõ tyripoko tõsepekatyry poko imehnõ nono põkõ maro.
Isakaa tõ tymõkomoke tyripoko tõsepekatyry poko toto ahtao Izyraeu tõ nonory po.
19 Imeimehnõ ahno eahmãko mã toto ypy pona aehtohme tosarykõ pona.
Moroto tynekarory tõ zahkãko mã toto,
Ritonõpo zamaro exiketomo.
Tytinerũ itamurume apoĩko mã toto tuna konõto wino te, isawã po roropa tuna konõto ehpio.”
20 Kate tõ poko ynara tykase ynororo:
“Kure rokẽ Ritonõpo mana, zumohxo Kate tõ nonory tyrise eya exiryke!
Kate tõ reão sã eraximãko topetõkara winoino apory apoitohme te, otarame zupuhpyry.
21 Nono kurehxo exikety tapoise eya xine, Ritonõpo nekarory po;
tuisa esary tokarose eya xine.
Ritonõpo omihpyry, inyripohpyry tõ roropa omipona toh nexiase, tõximõse ahno tõ tuisary tõ ahtao.”
22 Tã tõ poko ynara tykase ynororo:
“Reão mũkurume sã Tã tõ mana,
pyhseky ãko Pasã nonory po.”
23 Napatari tõ poko ynara tykase ynororo:
“Kure rokẽ Napatari tõ tyrise Ritonõpo a.
Inonoryme exĩko ikuhpo Karirea poe, ikurenaka.”
24 Asea tõ poko ynara tykase ynororo:
“Izyraeu tõ rãnao, Asea tõ imehnõ motye kure rokẽ tyrise Ritonõpo a.
Asea tõ pyno exĩko imehnõ oxiekyrymãkõ mana.
Inonory po oriwera tõ tuhke exĩko mana.
25 Ah ipatarykõ towomaneke nexĩ kehko omõtoh jamihmã ke, kurimene risẽ ke, metau risẽ ke roropa.
Apatarykõ põkõ ewomahpyryme exĩko mã toto.”
26 Izyraeu tomo, imepỹ ritõ pyra mana, Ritonõpo rokẽ mana!
Jamihme, Tuisamehxo, kapu akuohnõko mana akuru tõ po, ãkorehmatohkõme.
27 Ritonõpo, Jũme Exikehpyra Exikety, Kuewomanekomo, kuewomatorỹko mana tomary tõ ke.
Kuepetõkara aropõko mana kynenerykõme,
toto enahkapõko mana kyya xine.
28 Mame Izyraeu tõ towomasẽme exĩko mã toto tosarykõ po.
Osepeme exĩko mã toto tynonorykõ po.
Moroto tiriiku ahtãko,
uwa eukuru exĩko,
axitaku nono ehxikãko mana.
29 Izyraeu tomo, atãkyemãko matose!
Imehnõ asã xine pyra mana,
ahno typynanohse Ritonõpo Oesẽkomo a.
Oewomatohkõme Ritonõpo mana,
atapemãkõme roropa mana Oewomanekõme, orẽpyra oritohkõme roropa.
Tosekumurukõ po porohnõko oepetõkara mana,
osepynanohpõko oya xine.
Mame inonorykõ apoĩko matose ononorykõme.