AJEU
Ageu
Ekarotopo
Jeimamyry 538me ehtoh po oehpyra ro Jezu Kyrixtu ahtao Izyraeu tõ tooehpitose ropa Papironia poe namotome ehxĩpo. Tytapyĩkõ tyrise eya xine Jerusarẽ po, yrome osenetupuhpyra toh nexiase Ritonõpo Tapyĩ poko, tonahkase aexihpyryme. Mame jeimamyry 520mã po oehpyra ro Jezu Kyrixtu ahtao, Ritonõpo omiry tokarose urutõ Ajeu a. Ritonõpo Tapyĩ tyripose ropa eya. Mokaro tonehpose ropa eya Ritonõpo a. Morara ahtao kure toto rĩko ropa Ritonõpo mana, kure toto ehtohme ropa, toto emãtohme roropa. Osepeme Ajeu nexiase urutõ Zakaria maro.
Sero pape ao
Ritonõpo tapyĩ tyripose ropa 1.1-15
Kure ehtoh eraximatoh poko 2.1-23
1
Tytapyĩ tyripose ropa Ritonõpo a
Jeimamyry asakoromã po tuisame Tariu toehse ahtao Perexia esẽme, ẽmepyry osemazupu, nuno 6mã po, Ritonõpo tõturuse Ajeu a. Moro omi tonyohse Ritonõpo a kowenatu, Juta tõ tuisary Zoropapeu a, Saratieu mũkuru, Oturukety imehxo Exikety a roropa, Jozue, Jozatake mũkuru. Ritonõpo, Jamihmehxo Exikety ynara tykase:
— “Tapyi Kurã ritoh ropa exipyra ro mana,” ãko ahno tõ mana.
Morara exiryke ynara tykase Ritonõpo Ajeu a:
— Juta tomo, kure oya xine nae tapyi tõ kurã tao ehse amarokomo, apupari risẽ tao, Ytapyĩ Kurã tonahse ahtao? Osenetupuhtoko! Otara toehse oya xine nae? Õkyryrykõ puhturu arykãko matose tuhke repe, yrome pitiko apoĩko matose. Tonahsẽ nae matose repe, yrome tuesapare exipyra matose. Uwa eukuru nae matose repe, yrome ipune pyra mana etỹtohme. Upo nae matose yrome õseworitoh pune pyra mana kuenime toehse ahtao. Erohketõ epehpyry ipune pyra mana ise toehtoh epekahtohme.
Morara exiryke ynara ãko Ritonõpo, Jamihmehxo Exikety:
— Osenetupuhtoko, otara toehse oya xine nae? Seromaroro ytotoko ypy tõ pona, wewe enehtohme Ytapyĩ Kurã ritohme ropa. Tãkye exĩko ase moro Tapyi poko, mame moro tao toahmasẽme exĩko ase, imehxo jehtoh ekarõko mã toto.
— Õkyryrykõ itamurume apoiry se mexiatose repe, pitiko rokẽ tapoise oya xine. Mame moro pitiko aroryhtao tapyi taka “puu” karyke ya, anapyrykõ tonahkase ya emero exisasaka. Oty katohme moro tyrise ya? Atapyĩkõ kurãkary poko rokẽ matose, yrome Ytapyĩ poko, “Oty kara,” matose, onukurãkara matose, tykararahse ahtao. 10 Morara exiryke konopo oehpyra, otupikõ pona õkyryry pitiko rokẽ exĩko mana. 11 Konopo onenehpopyra exiase otupikõ pona, ypy tõ pona roropa; tonore tyripose ya anarykahpyrykõ pona tiriiku tõkehko te, uwa zoko tomo te, oriwera tomo, emero anarykahpyrykõ pona sero nono po. Awãnohtohkõme nexiase, onokyro tõ maro okyno tõ maro otyro tõ anarykatyãkõ maro emero porehme.
Ritonõpo nyripohpyry omipona ahno toehse rahkene
12 Mame Ritonõpo nyripohpyry omipona toehse toh nexiase. Zoropapeu, Saratieu mũkuru, Oturukety imehxo exikety Jozue, Jozatake mũkuru, emero ahno maro, Papironia poe aehtyamo. Zae Ritonõpo omiry tonetupuhse eya xine, inekarohpyry urutõ Ajeu a, moro omipona toehse toh rahkene. 13 Mame Ritonõpo omihpyry tokarose Ajeu a Juta tomo a, ynara tykase ynororo:
— Amaro xine exĩko ase. Ywy Ritonõpo oturuno.
14 Mame Ritonõpo poe orẽpyra toehse kowenatu Zoropapeu, Saratieu mũkuru, Juta tõ esemy. Tyjamitunuru tokarose Ritonõpo a eya. Morohne tokarose roropa Oturukety imehxo exikety a, Jozue a, Jozatake mũkuru te, ahno a roropa emero Papironia poe aehtyamo a roropa. Toytose toto, toerohpitose toto, Ritonõpo Jamihmehxo Exikety Tapyĩ Kurã riry poko, 15 ẽmepyry 24me ehtoh po, nuno 6mã po, jeimamyry asakoromã po tuisame Tariu toehse ahtao.