3
Jerusarẽ wãnohtopõpyry, ipynanopyry roropa
1 Myhene Jerusarẽ! Popyra ehtoh oehnõko oya mana. Tosẽ omipona pyra exikety, zae ehtoh poko pyra exiketõ ke pehme tooehse mase. Opõkõ ryhmaneme roropa mase! 2 Tosẽ, Ritonõpo omiry onetara pata Jerusarẽ nexiase. Zae pyra toehtoh kurãkapory se pyra nexiase roropa eya. Typynanohnekõme Ritonõpo onenetupuhpyra nexiase. Takorehmatoh se pyra roropa nexiase eya. 3 Ituisarykõ reão tõ sã mã toto, aryryãko mã toto. Apiakane tõ jou tõ samo, zehno exiketõ sã mã toto. Okyno tosekase ahtao eya xine tõnõko mã toto etyhpyry pona, akoĩpyry onynomopyra ehtohme ẽmepyry pona. 4 Urutõ kõ epyrypaketõme mã toto; onekunohtõkõme roropa mã toto. Tapyi Kurã rĩko nuriame mã toto oturuketomo. Ritonõpo nyripohpyry omipona pyra mã toto. 5 Yrome Ritonõpo moroto ro mana, pata po. Zae ehtoh poko exikehpyra mana. Zae pyra ehtoh poko pyra mana. Kokoro rokẽ ẽmehnõko moroto mana, anamonohpyra roropa mana, zae ehtoh ripõko kyya xine mana; yrome zae pyra exiketõ popyra toehtohkõ onurumekara mã toto, ehxiropyra roropa mã toto.
6 Ritonõpo ynara ãko mana:
— Ahno tõ tonahkase ya, pata tõ tykararahse, nono pona toto typahse ya, tapyi tõ kaetokohxo exiketõ, erase tõ esary, osema tõ roropa. Pata tõ patãpome toehse mã kehko, tytaõke pyra ipunaka. 7 Ynara tõsenetupuhse ywy: “Seromaroro jomihpyry omipona exĩko ypoetory tõ mana. Zae pyra toehtopõpyrykõ kurãkapõko mã toto ya. Wenikehpyra exĩko mã toto tuhke rokẽ tuãnohtopõpyrykõ poko ya.” Yrome orẽpyra toh nexiase popyra ehtoh poko toehtohkõme.
8 Naeroro ynara tykase Ritonõpo:
— Eraximatoko, ẽmepyry oehnõko mana. Owõnõko ase imeimehnõ nonory põkõ hxirotohme. Ynara osenetupuhno tyritohme: ahno tõ emero oximõme tyripõko ase, imoihme emero tutuisake exiketõ ehtohme toto wãnohtohme. Toto zehno jehtoh waro exĩko mã toto, toto wãnohtoh kuãnõko ase toto pona. Sero nono porehme tonahkasẽme exĩko mana apoto ke, zehno jehtoh ke.
9 — Morarame ahno tõ kurãkãko ropa ase tyneponãmarykõ eahmakehtohme eya xine. Ywy rokẽ jeahmãko mã toto Tosẽkõme. Jomiry omipona toto ripõko ase, jomiry omipona toto ehtohme emero porehme yronymyryme. 10 Mame ypoetory tõ sapararahme aexityã imeimehnõ nonory tõ poro oehnõko mã toto tynekarorykõ ekarotohme ya. Moino oehnõko mã toto moe pata tõ poe, Etiopia nonory poe. 11 Moro ẽmepyry toehse ahtao, amarokõ, ypoetory tõ ehxirokehnõko matose, tuhke jurumekatopõpyry pokoino oya xine. Ynara exiryke owino xine epyrypaketõ oũko ase, imehnõ motye kure osekaroketomo, mokaro panõ osenepyra ehtohme amaro xine. Jũme epyrypaketõme exipyra exĩko matose jesary po, ypy kurã po. 12 Ahno nomõko ase Jerusarẽ po, imehnõ pyno exiketomo, zae ehtoh poko se exiketõ roropa, Tosẽkõme jenetupuhnanomo. 13 Mame mokaro Izyraeu tõ akoĩpyry jũme popyra ehtoh poko pyra exĩko mã toto, ajohpe pyra exĩko mã toto. Imehnõ enekunopyry se pyra exĩko mã toto. Inapyrykõ ipune exĩko mana, towomaneke exĩko mã toto, imehnõ zuno pyra exĩko mã toto.
Eremiatoh Ritonõpo eahmaryme
14 Atãkyematoko, Jerusarẽ põkomo!
Izyraeu tomo, eremiatoko Ritonõpo eahmaryme!
Oseahmatoko yronymyryme.
15 Awãnohtohkõ totypohkapose Ritonõpo Oesẽkomo a.
Oepetõkara tonyohse eya typoetory tõ winoino.
Ritonõpo Oesẽkõ, Izyraeu tõ Tuisary, amaro xine mana.
Popyra ehtoh oepyry zuno pyra exĩko matose.
16 Ẽmepyry oehnõko mana: ynara ãko mã toto Jerusarẽ põkomo a:
“Enaromyra ehtoko, Xião põkomo, penekehpyra ehtoko, orẽpyra ehtoko.
17 Ritonõpo Oesẽkõ amaro xine mana.
Jamihme mana, opynanohtorỹko mana.
Tãkye exĩko mã opoko xine.
Opyno xine toexiryke isene oritorỹko roropa mana.
Eremiãko mana tãtãkyemaryme opoko xine, oseahmatoh ritoh samo.”
18 Ynara ãko Ritonõpo mana:
“Omuhpe exiketõ oseahmatoh poko oximõme enehpõko ase,
omuhpe pyra, ohxirotopõpyrykõ tonahse.
19 Moro ẽmepyry toehse ahtao mokaro wãnohnõko ase oryhmahpõkomo.
Ahmitahpyryme exiketõ pynanohnõko ase.
Sapararahme aexityã enehnõko ropa ase.
Toehxirose mexiatose emero rokẽ po,
yrome moromeĩpo oeahmatorỹko imehnõ mana.
Imehxo exiketõme oritorỹko mã toto.
20 Moro ẽmepyry toehse ahtao oximõme oenehtorỹko ase oenehtohkõme ropa ononorykõ pona.
Kure rokẽ oritorỹko ase, amarokõ emãtohme ropa.
Imehxo oehtohkõ waro exĩko imehnõ mana, emero nono põkomo.
Õmirykõ etary se exĩko imehnõ mana imeimehnõ nono põkomo.”
Ywy, Ritonõpo, oturuno.