“Mynyhme ehtoko, jomiry etatoko, moe nono põkomo!

Ajamitunurukõ ikurãkatoko ropa,

mame osehtoko jẽpataka õsewomatohkõme ynetaryme.

Oximõme sehtone kuoturutohkõme zae ehtoh enetupuhtohme.

2 “Onoky a mokyro tuisa tonehse xixi tũtatoh wino imehnõ poremãkaponeme?

Onoky poe orẽpyra mã ynororo emero rokẽ nono poremãkapory poko, tuisa tõ poremãkapory poko roropa?

Typyre ke tytapema ke roropa toto etapãko mana putoh katoh riry samo,

sapararahme toto aropõko tiriiku pihpyry arory sã tyryrykane a.

3 Toto ekahmãko mana, orẽpyra sã ytõko ynororo;

axĩ roropa ytõko mana ipupuru nono epozakuroko samo.

4 Onoky morohne poko tõsenetupuhse emero tyripotohme?

Onoky moino ro apitorymã poe morohne poko tõsenetupuhse morara ehtohme seromaroro?

Ywy, Ritonõpo, moroto exine apitoryme,

morarame ywy, Ritonõpo, moroto exĩko ase sero etyhpyry po.

5 “Ynyrihpyry tonese moero nono põkomo a,

enaromỹke toehse, tykytyky tykase toto.

Naeroro oximõnõko mã toto tooehtohkõme.

6 “Tyneponãmarykõ rinanõ atakorehmãko mã toto,

tykatonomorykõ maro oseahmãko mã toto.

7 Morarame mokyro wewe axikane ynara ãko uuru poko erohkety a: ‘onyrihpyry kure mana.’

Mokyro kurimene etapane mate ke ynara ãko osexihmapone a:

‘Emese kure mase, moro onyrihpyry kure mana!’ ãko.

Tyneponãmary rĩko mã toto esaka exixihmãko epukara ehtohme.”

8 Yrome ynara ãko Ritonõpo Izyraeu tomo a:

“Ypoetoryme mase, ynymenekatyãme matose;

jepe Aparão pakomotyãme matose.

9 Kuenepyatose moino, sero nono etyhpyry poe, imeimehnõ nonory poe,

mame ynara ase oya xine: ‘Ypoetoryme matose.’

Tymenekase matose ya, orumekara xine exiase.

10 Enaromyra ehtoko amaro xine jexiryke;

oserehpyra ehtoko, Oesẽkõme jexiryke.

Ajamihtanohtorỹko ase, ãkorehmatorỹko roropa;

oewomatorỹko ase, opynanohtorỹko ase japotunuru ke.

11 “Mokaro ozehnotokõ emero typoremãkasẽme exĩko,

epyrypakehnõko mã toto;

mame osetapaketõ amaro xine emero tonahkasẽme exĩko,

orihnõko mã toto.

12 Ozehnotokõ zupiryhtao oya xine onenepyra exĩko matose,

mokaro emero arypyra exĩko tonahse exiryke.

13 Ywy ase Ritonõpo Oesẽkomo;

oemary apoĩko ase, ynara ãko ase oya xine:

‘Enaromyra ehtoko, ãkorehmatorỹko ase.’ ”

14 Ynara ãko Ritonõpo mana typoetory tomo a:

“Pisarara matose jamihme pyra roropa,

yrome enaromyra ehtoko;

ywy ase Ritonõpo, Izyraeu tõ Esẽ kurano,

Opynanohnekõme ase, oewomatorỹko ase.

15 “Makina tiriiku ipikatoh sã oritorỹko ase,

tyere exikety kurimene risemy, pohsuime exikety ke:

ypy tõ akuhmõko matose toto enahkatohme;

emorymãkõ poro ytõko matose,

putoh katoh sã exĩko mã kehko.

16 Typahse kehko kakoxi ahtao oya xine,

tarosẽme exĩko mana tyryrykane a,

mame wirikane a sapararahme typahsẽme exĩko mã kehko.

Morarame moro sã toehse ahtao tãkye exĩko matose ywy, Ritonõpo Oesẽkõme jexiryke.

Mame jeahmãko matose, Izyraeu tõ Esẽ kurano.

17 “Mame ypoetory tõ etuarimaryhtao tuna zupiryhtao tutunazehnase toexirykõke,

yrome onenepyra;

esenary tonore toehse ahtao tuna se toexirykõke,

ywy, Ritonõpo toto omiry etãko ase,

ywy, Izyraeu tõ Esẽ jũme toto onurumekara exĩko ase.

18 Tuna enatyry tõ ripõko ase jakanahmã tõ po,

emorymãkõ rãnakuroko serere kane tõ rĩko ase, iporiry tõ roropa.

Mame ona tonorẽ tyripõko ase ikuhpome,

nono tonorẽ tuna pẽkamã ke exĩko tuhke.

19 Wewe tõ arykãko ase ona tonorẽ po:

apupari tomo, akaxia tõ roropa te, murta tomo, oriwera tõ roropa;

nono tonorẽ po pinieiro tõ ahtanohpõko ase, zĩporo tõ maro te, xipirexite tõ maro, enara.

20 Morohne enẽko ahno tõ emero,

zuaro exĩko mã toto morohne tyrise ya, Oesẽkomo a.

Kure osenetupuhnõko mã toto tuaro exĩko mã toto,

morohne emero rihpõme mã Ritonõpo, Izyraeu tõ Esẽ kurano.”

21 Ynara ãko Ritonõpo, Izyraeu tõ Esemy:

“Imeimehnõ neponãmary eahmananomo, osehtoko osekarotohme, osewomatohkõme.

22 Oneponãmarykõ enehtoko xiaro yna zurutohme:

otara exĩko nae taroino?

Zurutoko roropa õmihpyrykõ poko,

zuaro yna ehtohme õmihpyrykõ zae exiry poko,

morohne toehse ahtao õmihpyrykõ ae ro.

Yna zurutoko seromaroro,

otara exĩko nae taroino?

Morarame zuaro exĩko ynanase õmirykõ zae exiry poko te, zae pyra exiry poko, enara.

23 Kahtoko yna a, otara exĩko nae taroino?

Zuaro yna ehtohme ritõme nymyry oehtohkõ poko!

Kurãkõ riry se awahtao xine tyritoko,

popyra ehtoh riry se awahtao xine roropa,

enaromỹke yna ehtohme, yna osenuruhkatohme roropa!

24 Yrome ritõme pyra matose!

Tyriry waro pyra matose ipunaka!

Oneahmarykõ se pyra ase ipunaka, nuriame mã toto ya.

25 “Ya orutua tymenekase, xixi tũtatoh wino nono pono.

Jenetupuhne mokyro, enehpõko ase inikahpoe etonatohme topetõkara maro.

Ikurepato pona sã tuisa tõ pona itũtũmãko mana, oripo apuhne sã orino tũtũmary sã tupupurukõ ke.

26 Onoky a morohne mekaroatose: ‘ynara exĩko mana,’

zae oexiry waro yna ehtohme?

Morara kara mexiatose emero.

Õmirykõ onetapitopyra imehnõ mana moro poko.

27 Ywy, Ritonõpo, apitorymãme exiase Jerusarẽ põkõ zuruneme,

omi arone tonyohse ya Jerusarẽ pona ynara kase:

‘Oekyrykõ oehnõko ropa, tosaka xine,

oehnõko ropa mã toto!’

28 Zupiase ahno neponãmary rãnao

yrome jezuhsaromepyra toh nexiase.

Ekaropoase repe, yrome jezukuru waro pyra toh nexiase.

29 Mokaro ahno neponãmary tõ otyme kure?

Arypyra ipunaka, tyriry waro pyra mã toto!

Mokaro ahno naxikahpyry tõ isene pyra mã toto

tyjamihke pyra mã toto ipunaka.”